Сыктывкарысь «ПРОГНОЗКОМИ» АНО-лӧн «АВА-мам» «Семья шӧрин» бара на збыльмӧдӧма висьлӧс кага быдтысь семьялы отсӧг сетӧм могысь президентлӧн грант весьтӧ выль уджтас. Та пӧрйӧ сійӧ шусьӧ «Мамин час».
Кыдзи висьталіс «Семья шӧринӧн» веськӧдлысь Наталья Миронова, висьлӧс кага быдтысь мамлы быть колӧ отсӧгыс, мед сійӧ эз кус да вӧлі вына. Та могысь уна во нин дасьтӧны ӧти уджтас бӧрся мӧдӧс.
–Миян президент Владимир Владимирович Путин пыр висьталӧ зумыд семья да семьялы отсӧг сетӧм йылысь. А кӧні быдмӧ висьлӧс кага, налы нӧшта ыджыдджык отсӧг колӧ. Ӧти-кӧ, кагалысь дзоньвидзалунсӧ бурмӧдны, а мӧд-кӧ, мамыслы отсавны. Колӧ сетны позянлун, мед сійӧ и ас вылас кад вичмӧдіс, мед ачыс шойччыштіс. «Мамин час» уджтассӧ аньяслы и сиим, – висьталӧ Наталья Миронова.
–Тіян специалистъяс ёна отсасьӧны висьлӧс челядь быдтысь семьялы. А тайӧ уджтасыслӧн вӧлі кутшӧмкӧ аслыспӧлӧслун?
–Кыдзи и пыр, миян специалистъяс ноксисны челядькӧд. Вӧліны и дзоньвидзалун бурмӧдӧмлы, и социальнӧй адаптациялы сиӧм занятиеяс. Но медтӧдчанаыс вӧлі мамӧс шойччӧдӧм. Психологическӧй кындзи вӧліны арт-терапевтическӧй тренингъяс, сідз шусяна культурно-досугӧвӧй чукӧртчылӧм-аддзысьлӧмъяс. Грант весьтӧ миян мамъяс ветлісны театрӧ, экскурсия вылӧ, налы нуӧдісны ки помысь вӧчасьӧм кузя мастер-классъяс, велӧдчим и асьным сцена вылын артистъяс моз ворсны да сёрнитны, котыртлім гажъяс, шуам, аньлы сиӧм да Ыджыд лун кежлӧ да сідз водзӧ.
Дерт, кыдзи и пыр, миян специалистъяс дорын нывбаба-мамъяс содтісны тӧдӧмлун, кыдзи бурджыка быдтыны-велӧдны висьлӧс каганысӧ.
–Тайӧ бара вӧлі сӧмын сыктывкарсалы?
–Сӧмын на кӧсйи пасйыны, мый тайӧ уджтасыс шымыртіс и Ухтаысь да Печораысь мамъясӧс. И аддзысьлӧмыс вӧлі эз ӧтуввез пыр, а специалистъяс ветлісны тайӧ каръясас. Чайта, тайӧ – миян шӧринлӧн зэв тӧдчана воськов водзӧ. Сыктывкарса мамъяскӧд кӧ, шуам, ёна нин зілям, туйдам найӧс и удж корсьны, и прӧст кад налы вичмылӧ, нянькаяс волывлӧны да. А республикаса мукӧд кар-районын кыдзкӧ оз на и эскыны, мый висьлӧс челядь быдтысь мамлы тшӧтш позьӧ сӧвмыны. А ми ӧні ас пример вылын син на син сёрнитім.
–Кутшӧм юалӧмъясӧн шыӧдчисны?
–Дерт, юалӧмыс уна. Абу гуся, мый кор бать-мам тӧдмалӧны кагаыслысь сьӧкыд диагнозсӧ, первой кадсӧ шӧйӧвошлӧны. А ми найӧс ышӧдам стӧч примеръясӧн, мый та дырйи позьӧ и нажӧвитчыны, и профессиональнӧя быдмыны, и прӧст кад кыпыда коллявны.
Сідзжӧ Наталья Миронова тӧдчӧдіс, мый «Мамин час» уджтас весьтӧ специалистъяс ветлывлӧмаӧсь висьлӧс кага дорӧ гортас, торйӧн накӧд ноксьӧмаӧсь, вӧлӧмаӧсь и шӧринын котырӧн аддзысьлӧмъяс.
–Зэв нимкодь, мый миян лоис нин бур команда, кӧні зільӧны и бурдӧдысьяс, и тренеръяс, и психологъяс, и нянькаяс, и волонтёръяс да мукӧд специалист. Позьӧ шуны, ми – семья, кӧні некод некодӧс оз эновт, пыр дасьӧсь сьӧкыд здукӧ отсавны. Аттьӧала ставнысӧ сьӧлӧмсянь уджалӧмысь, – пасйис Наталья Миронова.
Екатерина МАКАРОВА.
Снимокъясыс «ПРОГНОЗКОМИ» АНО-лӧн «АВА-мам» «Семья шӧринлӧн».