Комиын шуӧма вештыны спецоперацияса военнослужащӧйяслы да налӧн матыссаяслы санаторий-курортын бурдӧдчан путёвка донсӧ да сэтчӧ ветлан туйысь рӧскодсӧ.
Быдӧнлы путёвкасьыс мынтасны 55 сюрс шайтӧдз, туйсьыс – рӧскодсӧ артыштӧмӧн, но медунасӧ кызь сюрс шайт.
Санаторий-курортӧ путёвкасӧ СВО-са участниклы позьӧ босьтны служба вывсьыс гортас воӧм бӧрын либӧ отпуск дырйиыс. Дзоньвидзалун ёнмӧдны вермасны сылӧн семьяысь ӧти морт, а сідзжӧ спецоперацияын пӧгибнитӧмалӧн либӧ кувсьӧмалӧн бать-мамыс.
–Татшӧм услуганас могмӧдӧны миян регионса минздравлӧн да Коми Республикалӧн санаторийясын. Такӧд йитӧдын колӧ шыӧдчыны йӧзӧс доръян шӧринӧ сертификатла. Таво заводитчӧмсянь татшӧм документсӧ сетӧма спецоперацияса 69 участниклы, налӧн 400 рӧдвужлы да СВО-ын пӧгибнитӧмаяслӧн 45 бать-мамлы, – висьталіс регионса удж, занятосьт да йӧзӧс социальнӧя доръян министерствоӧн веськӧдлысьлысь удж вӧчысь Татьяна Майкова.
Санаторий-курортын бурдӧдчан сертификат босьтӧм могысь колӧ гижны шыӧдчӧм, таысь ӧтдор мед вӧлі паспорт да СВО-са военнослужащӧйкӧд рӧдвуж йитӧд йылысь документ (сетӧма кӧ суйӧр сайын).
А мед босьтны санаторий-курортӧ ветлан туйысь сьӧм, СВО-са участниклы да сылӧн матыссаяслы колӧ сідзжӧ гижны йӧзӧс социальнӧя доръян шӧринӧ шыӧдчӧм. Таысь ӧтдор колӧны паспорт, рӧдвуж йитӧд йылысь документ (сетӧма кӧ суйӧр сайын), санаторий-курортын бур-дӧдчӧм кузя договор да туй выв билетъяс.
2025 во заводитчӧмсянь санаторийӧ ветлан туйысь рӧскодсӧ вештӧма спецоперацияса 16 участ-никлы да налӧн 48 рӧдвужлы.
И путёвкасӧ, и туйcӧ шуӧма мынтыны вонас ӧтчыд. Та могысь колӧ шыӧдчыны декабрь 25 лунӧдз.
<> Гижӧдсӧ дасьтіс Александра АРТЕЕВА. Снимокыс ӧтуввезйысь.