Сыктыв районса Заозерьеысь Великӧй Отечественнӧй войнаын тышкасьысь Валентин Иванович Головӧс Россияса президент Владимир Путин нимсянь локтан Победа лунӧн чолӧмаліс Ростислав Гольдштейн.
–Сиа тіянлы, Валентин Иванович, уна во на овны да крепыд дзоньвидзалун. Аттьӧ тіянлы Ыджыд Вермӧмысь, война бӧрын зіль уджысь, республика сӧвмӧдӧмысь, чужанін радейтӧмысь. Ті – миян герой! – чолӧмаліс войнаын тышкасьысьӧс регионӧн веськӧдлысь.
Валентин Иванович Голов чужлӧма 1927 воын Тамбов обласьтын. Бать-мамыс водз кувлӧмаӧсь, и сійӧс тьӧтыс быдтӧма.
1944 вося ноябрын Валентин Ивановичӧс босьтӧмаӧсь Гӧрд армияӧ, декабрын примитӧма присяга, а сэсся веськалӧма фронт вылӧ.
Служитӧма сизим во, но Великӧй Отечественнӧй войнаын тышкасьысьӧн сійӧс шуӧмаӧсь сӧмын 2001 вося июнь 20 лунӧ да наградитӧмаӧсь «За победу над Германией» да юбилейнӧй медальясӧн.
1946-1951 воясӧ Валентин Иванович Голов служитӧма Кострома обласьтса военно-авиационнӧй базаын, сэні жӧ тӧдмасьӧма Анастасия Геннадиевна Кушмановакӧд.
Гӧтрасьӧмаӧсь, ӧта-мӧд бӧрся налӧн чужӧма куим челядь.
Заозерьеӧ семьяыскӧд Валентин Иванович локтӧма 1963 воӧ. Уджалӧма трактористӧн, слесарӧн, пӧрӧдчысьӧн, вӧр мастерӧн, ломтас-мавтас складӧн веськӧдлысьӧн. Пенсия вылӧ петӧма 1993 воӧ.
Таво дзоньталасны ветеран керка вевт, кыпӧдасны «гожся кухня».
