Комиын Росгвардияса да МВД-са складъясын чукӧрмӧма нёль сюрсысь унджык ружье, на лыдын 2,7 сюрсыс сэні – воысь дырджык нин. Став тайӧ арсеналсӧ кутшӧмкӧ помка вӧсна мырддьӧмаӧсь йӧзлысь, либӧ найӧ асьныс вайӧмаӧсь. Гӧгӧрвоана, сэні и дзик на выль ӧти да кык ствола ружьеяс, а мыйсюрӧ и сімӧма нин да оз нин шогмы лыйсьыны.
Сэк жӧ Россия Федерацияса оборона министерстволӧн Лунвыв военнӧй кытшсянь Комиын Росгвардия управлениеӧ да МВД-ӧ воӧма ӧкмыс шыӧдчӧм, корӧны ыстыны буретш татшӧм ружьесӧ. 644-ӧс бӧрйӧмаӧсь нин да мӧдӧдӧмаӧсь спецоперацияса боечьяслы. Кыдз петкӧдлӧ налӧн опытыс, беспилотниклы паныд водзсасьны пӧ ракета-зениткаысь да РЭБ-ысь ӧтдор позьӧ и вӧралан пищальӧн. Дрӧбйысь да вӧсньыд сутуга йитӧм картечысь Баба-ягаыд пыр и гатшасьӧ.
Кытчӧ позьӧ шыӧдчыны миян республикаса олысьяслы, медым ыстыны СВО-ын воюйтысьяслы ружье да пуля-порок?
Та йылысь регионса юралысьлӧн Общественнӧй приёмнӧйын висьталіс Коми Республикаын Росгвардия управлениеӧн веськӧдлысьӧс вежысь, ӧружиеӧн вӧдитчӧм бӧрся видзӧдан да лицензия шӧринӧн юрнуӧдысь Артём Махмутов.
–Оланпас серти йӧзлысь кутшӧмкӧ помка вӧсна мырддьӧм ӧружиесӧ да пуля-пороксӧ нёль тӧлысь кежлӧ сетам полициялы. Та бӧрын ыстам Росгвардияса складӧ. Во чӧжӧн кӧ некод эз шыӧдчы эмбурысла, миян специалистъяс видзӧдласны, шогмӧ-ӧ ружьеыс лыйсьыны. Жугалӧм-сімӧмсӧ утилизируйтасны. Шогманасӧ сетам государстволӧн военнӧй котыр-организациялы, тшӧтш и СВО вылӧ ыстӧм могысь. Беспилотник гылӧдны пӧ медся бура туйӧ 12-ӧд калибра пищаль.
Мортыс кӧ ас кӧсйӧм серти вӧзйӧ ружьесӧ СВО вылӧ, ставсӧ вӧчам зэв ӧдйӧ.
Та могысь ӧтуввезйын колӧ пырны Росгвардия сайтӧ да «Передача оружия в зону проведения СВО» онлайн-сервисын qr-код пыр юӧртны ас йывсьыныд да кутшӧм ружье кӧсъянныд сдайтны. Сутки мысти миян сотрудник йитчас тіянкӧд да юӧртас, кытчӧ колӧ локны.
Комиын татшӧм ногӧн вайӧмаӧсь нин 70 ружье. Росгвардияса сотрудникъяс асьныс нин ыстасны пищальсӧ военнӧйяслы.
Юркарын олысьяс вермасны шыӧдчыны и веськыда воинскӧй часьтӧ да тӧдмавны, колӧ-ӧ налы вӧралан ружьеныд. Босьтасны кӧ, командирыскӧд кырымалӧны ӧружиесӧ сетӧм йылысь сёрнитчӧм. Таӧдз быть колӧ волыны Росгвардияса лицензия юкӧнӧ, сьӧрсьыд босьтны паспорт, ӧружиеӧн вӧдитчан кабала-документ да петкӧдлыны ружьетӧ.
–А кодъяс вайӧны?
–Том и олӧма войтыр, чина и чинтӧм. Кодкӧ арлыд вӧсна оз нин вермы вӧравны, мӧдлы ружьеыс оз ков, а коймӧдлӧн некымын пищаль.
Сідз, Росгвардияса лицензия юкӧнӧ неважӧн шыӧдчис Ухтаса мэр Магомед Османов. Важӧн нин пӧ ньӧблі кык ружье, но вӧдитчыны наӧн кадыс абу. СВО вылын пӧ найӧ колӧныджык.
Февраль помын миян дорӧ шыӧдчис юркарса олысь да вӧзйис кык ствола ИЖ-58 ружье. 76 арӧса вӧралысь бура дӧзьӧритӧма сійӧс, весиг жаль пӧ сетнысӧ, но спецоперацияын зонъяслы сійӧ коланаджык.
–СВО вылӧ ыстӧм могысь ас вӧляӧн вайӧм ӧружиеысь некутшӧм сьӧм ӧд оз мынтыны?
–Россияын 1996 воын вынсьӧдісны ӧружие йылысь 150-ӧд номера федеральнӧй оланпас, а нӧшта кык во мысти – гражданскӧй да служебнӧй ӧружиеӧн вӧдитчӧм йылысь Россияса правительстволысь 814-ӧд номера постановление. Эм нӧшта Росгвардиялӧн 8-ӧд номера индӧд, кӧні стӧча пасйӧма, кыдзи колӧ видзӧдны ӧружиеӧн вӧдитчӧм бӧрся да мый быть колӧ вӧчны та могысь.
Бӧръя кадӧ Комиын сюрсысь торкӧмаӧсь ӧружиеӧн вӧдитчан оланпассӧ, и унджыкысьсӧ – буретш лицензиясӧ абу нюжӧдӧмаӧсь. Спецоперациякӧд йитӧдын мӧйму августын ӧружиеӧн вӧдитчан оланпасъясӧ пыртісны вежсьӧмъяс. На серти, мортыс кӧ сдайтіс ружьесӧ СВО вылӧ ыстӧм могысь, но оланпаскӧд йитӧдын сылӧн мыйсюрӧ абу лючки, сійӧс мездасны административнӧй кывкутӧмысь.
–Казьтыштӧй, кутшӧм мыжысь вермасны мырддьыны ружьесӧ?
–Бӧръя вежонӧ миян сотрудникъяс ӧружиеӧн вӧдитчанног торкалӧмысь мырддисны ӧкмыс ружье, лӧсьӧдісны кык административнӧй протокол.
Унаӧн вӧралігас воштӧны ружьесӧ. Татшӧмыс медсясӧ овлӧ тулысын, кор вӧралысьыс путкыльтчӧ пыжӧн.
Суис кӧ татшӧм ускӧттьӧ, сутки чӧжӧн колӧ юӧртны та йылысь Росгвардияӧ либӧ полицияӧ. Вӧйӧм ружьеыс кӧ кодлыкӧ югдас, да сыӧн вӧдитчӧмӧн вӧчасны мыж, кӧзяинсӧ вермасны кыскыны уголовнӧй кывкутӧмӧ.
Вежинныд кӧ оланінтӧ либӧ вуджинныд овны мӧд карӧ, кык вежонӧн колӧ шыӧдчыны Рос-гвардияӧ лицензияла.
Ӧружиеӧн вӧдитчан правилӧ торкӧмысь вермасны перйыны 5-10 сюрс шайт штрап.
–А ковмас кӧ ружьесӧ кытчӧкӧ нуны сьӧрсьыд?
–Ружьенас кӧ мунан кытчӧкӧ, сійӧс колӧ видзны сідз, медым эз веськав бокӧвӧй киӧ. Пищальтӧ колӧ нуны шогмана чехолын, футлярын либӧ заводса тубрасын. Та дырйи пуля-порокыс мед вӧлі торъя тубрасын.
Сьӧрсьыд позьӧ босьтны вит ружье да сюрс патрон. Суис кӧ мог нуны унджык, колӧ шыӧдчыны МВД-ӧ либӧ Росгвардияӧ да индыны, кытчӧ кымын пищаль да боеприпас нуан.
Вӧралігӧн, спортын ордйысигӧн, велӧдчӧм да тренируйтчӧм могысь лыйсигӧн ружьесӧ новлӧдлӧны зарадитӧмӧн чехол-кышӧдтӧг да предохранительӧн.
Оланпас серти талун позьӧ сетны ружьетӧ мӧдлы. Шуам, ёртыд кӧсйӧ вӧравны, а лыйсьынысӧ нинӧмӧн. Сылӧн кӧ эм та могысь колана кабала-разрешение, кыйсян кад кежлӧ позьӧ сетны ӧти пищаль да кырымавны та йылысь акт. Но ёртыд вермас вӧравны, орччӧн кӧ лоас ружье сетысьыс.
Асьтӧ дорйӧм могысь оз позь ветлӧдлыны кузь ствола пищальӧн. Сьӧрсьыд позьӧ новлӧдлыны сӧмын травматическӧй да газӧвӧй пистолет. Но и татшӧмнас оз позь локны велӧдчан учреждениеӧ, митинг, демонстрация да пикет вылӧ, уна йӧза гажӧдчан-шойччанінӧ.
–Мый нӧшта оз позь?
–Оз позь вӧдитчыны ӧружиеӧн, стволсьыс петан энергияыс кӧ 91 джоульысь вынаджык (вӧралан, спортивнӧй да асьтӧ доръян ружьелӧн этшаджык), магазинас либӧ барабанас кӧ тӧрӧ 10 патронысь унджык (спортивнӧйысь ӧтдор). Оз позь ыстыны ӧружие да пуля-порок пошта пыр, лӧсьӧдны ружье-пистолетад «глушитель». Войын лыйсян прицелӧн вермас вӧдитчыны сӧмын вӧ-ралысь. Оз позь вӧчны зонтик, бедь, ручка да мукӧд мыгӧра лыйсянтор.
Оз позь вӧдитчыны и жугалӧм ружьеӧн да важмӧм пуля-порокӧн. Воштінныд кӧ ружьетӧ, либӧ сійӧс гуисны, сутки чӧжӧн колӧ шыӧдчыны Росгвардияӧ.
Пармаӧ вӧравны мунігӧн сьӧрсьыд босьтӧй охотбилет да путёвка.
–Мый колӧ вӧчны, важ керка йирксьыд кӧ югдіс пӧльыдлӧн либӧ батьыдлӧн пищальыс?
–Шогмана кӧ, позьӧ гижны ас вылад. Та могысь, кыдзи и выль ружье ньӧбигӧн, ковмас петкӧдчывны врачьяслы, волыны Росгвардияӧ либӧ ыстыны шыӧдчӧмсӧ «Госуслуги» пыр.
Кыдзи и водзті, талун позьӧ сдайтны Росгвардияӧ либӧ полицияӧ ружье да пуля-патрон. Мед кӧть и важмӧма да сімӧма. Комиын вонас сдайтӧны сё гӧгӧр пищаль. Та могысь тӧлысьнас йӧзыслы мынтӧны 90 сюрс кымын шайт.
Лицензия службасӧ котыртӧмаӧсь 1969 воын. Таӧдз ӧружиесӧ некод абу гижавлӧма. Та вӧсна медсясӧ вайӧны 50-60 вося пищальяс. Мӧйму январсянь ас вӧляысь вайӧм ӧружиеысь мынтӧны унджык. Но сӧмын регистрируйттӧм ӧружиеысь да пуля-порокысь. Шуам, вӧрысь либӧ керка йирксьыд кӧ аддзинныд пищаль да вайинныд Росгвардияӧ либӧ полицияӧ.
Но ті кӧ вайинныд кувсьӧм нин верӧсныдлысь, батьныдлысь регистрируйтӧм ружьесӧ, сыысь нинӧм оз мынтыны. Сьӧм оз сетны и тыртӧм гильзаысь, капсульысь, зарад тупйӧдысь да с.в.
Мортыс кӧ ас вӧляысь вайис ружьесӧ, некутшӧм кывкутӧмӧ сійӧс оз кыскыны. Погона йӧз вайӧмторсӧ медводз ыстасны экспертиза вылӧ, медым тӧдмавны, эз-ӧ вӧдитчы сыӧн мыж вӧчысь. Та бӧрын утилизируйтасны.
Мыйкӧ кӧ кӧсъянныд тӧдмавны содтӧд, позьӧ шыӧдчыны 8(8212)21-20-26 номера телефон пыр выльлунсянь пекничаӧдз 9 асывсянь 6 час рытӧдз.
<> Николай РАЗМЫСЛОВ. Снимокъясыс ӧтуввезйысь.