Коми Республикаса Общественнӧй палаталӧн дас витӧд гражданскӧй форум дырйи Сыктывкарын котыртлісны «Молодая семья – демографический ресурс Республики Коми» площадка.
Чукӧртчылігас том йӧз, томулов да мукӧд общественнӧй котырын водзмӧстчысьяс видлалісны том семьяясын мытшӧд-падмӧгъяс да индісны найӧс бырӧдан-венан туйвизьяс.
–Тайӧ чукӧртчылӧмыс – гражданскӧй форум дырйи бӧръя, сизимӧдысь бӧрйӧм Общественнӧй палата уджлы аслыспӧлӧс кывкӧртӧд. Талунъя сёрниыс кызвыннас абу вӧчӧма нин йывсьыс, а мый колӧ на вӧчны водзӧ вылӧ. Збыльмӧдӧмторсьыс жӧ позьӧ пасйыны крепыд юанторйӧн вузасьӧм кузя оланпасӧ вежсьӧмъяс пыртӧмсӧ. Сы серти вӧлі пӧдлалӧма дас гӧгӧр сідз шусяна «наливайка», а медся тӧдчанаыс – шызьӧдӧма йӧзсӧ, казьтыштӧма ставныслы тайӧ гӧрӧд йывсьыс. Чайта, и талун ӧкмас уна колана вӧзйӧм, кодъясӧс збыльмӧдны мӧдас выльӧн бӧрйӧм палата нин, – висьталіс общественнӧй палатаӧн веськӧдлысьӧс вежысь Галина Лапшина.
Площадкадырся уджӧ босьтчытӧдз студентъясӧс медводз тӧдмӧдісны республикаын демография юкӧнын серпасӧн.
Талун регионысь муналӧны уджалан арлыда войтыр, чинӧ гижсьӧмӧн гозйӧдчысьыс, медводдзаысь кага вайысь аньыс да с.в. Комиын олысьяс пыр тшӧкыдджыка гижсьӧны 28-29 арӧсӧн да, та понда и медводдза кагасӧ чужтӧны пыр сёрӧнджык.
–Томулов дасьӧсь видлавны ёсь юалӧмъяссӧ. Найӧ кӧсйӧны водзӧ вылӧ котыртны шуда да судзсяна олӧма семья. И та кузя налӧн эмӧсь бур вӧзйӧмъяс. Торйӧн кӧ, оланін, культура, профессия босьтӧм кузя. Шуам, вӧзйисны пыртны загс уджӧ медиаторъясӧс, кодъяс кутасны бурӧдны юксьымӧнъя воӧм гозъяясӧс, – пасйис Общественнӧй палатаын семья, мам да челядь тӧжд-мог кузя комиссияӧн юрнуӧдысь Наталья Бутрим.
Тайӧ форум дырйиыс площадкаясын став вӧзйӧмторсӧ лоӧ пасйӧма резолюцияын да быдладорсянь донъялӧма, а сэсся нин вайӧдӧма регионса министерство-ведомствоӧдз.
<> Гижӧдсӧ дасьтіс Елена ПЛЕТЦЕР. Снимокъясыс ӧтуввезйысь.