Комиын куимсё кызь вит фермер овмӧсысь ӧти меститчӧма Войвыв кытш бердын – Инта районын.
Петрунь сиктын котыртӧма сійӧс Елена Артеева.
Ылі Войвылын абу кокни видз-мутӧ вӧдитны, и сэтчӧс олысьяс кутчысьӧны асланыс традицияясӧ, видзӧны кӧр. Тайӧ жӧ уджсӧ вӧчӧ и Елена. Петруньын сійӧ воӧм морт: Ухтаын школа помалӧм бӧрын велӧдчӧма Выльгортса видз-му овмӧс техникумын. Сэні жӧ тӧдмасьӧма и верӧспуыскӧд. И Алексей сэсся вайӧдӧма гӧтырсӧ Петруньӧ, Усва юбокса чужан сиктас.
Кыкнанныс уджалӧмаӧсь «Петруньскӧй» овмӧсын: Елена – зоотехникӧн, Алексей водзӧ нуӧдӧма кӧр видзысьяслысь династиясӧ. Сэсся Елена велӧдчӧма Кировын Вяткаса видз-му овмӧс академияын экономика факультетын.
Петруньысь мунны том гозъя абу мӧвпалӧмаӧсь, босьтчӧмаӧсь кыпӧдны сэні керка. 2006 воын стрӧитчӧм вылас налы торйӧдӧмаӧсь участок. Сэки жӧ пырӧдчӧмаӧсь «Оланін» программаӧ. Сы серти сиктын овны-уджавны кӧсйысь том семьяяслы да специалистъяслы керка кыпӧдӧм-ньӧбӧм могысь вӧлі вештӧны сьӧм.
2018 воын Коми Республикаса видз-му овмӧс министерство нуӧдіс конкурс, и Петруньысь гозъя петіс «Кӧр видзан традицияяс сӧвмӧдан медбур овмӧс» нимпасын вермысьяс лыдӧ. А 2019 вося декабрын Елена Артеева котыртіс фермер овмӧс. Верӧсыслӧн вӧлӧма нин таын опытыс. Алексейлӧн кӧр видзан стажыс матӧ кызь во, и уджын шедӧдӧмторъясысь сылы сетлӧмаӧсь республикаса юралыссянь аттьӧалана гижӧд. А Еленалы экономикаын тӧдӧмлуныс отсалӧма государствосянь отсӧг босьтігӧн вӧдитчыны «Электронный бюджет» да мукӧд юӧртан тэчасӧн.
Елена аддзӧ кад и гортгӧгӧрса удж вӧчны, гозъя быдтӧны картупель, свеклӧ, морков, ӧгуреч, помидор. Йӧрсӧ мичмӧдӧны и уна сикас дзоридзьяс.
Еленалӧн да Алексейлӧн пиыс ӧні велӧдчӧ Сыктывкарса университетын. Кор сылы вӧлӧма на 11 арӧс, пырӧдчӧма «Село – моя жизнь» фотоконкурсӧ. Снимок вылас детинкаӧс кытшалӧмаӧсь кӧрпиян.
2023 вося ноябрын гозъялӧн чужӧма Вероника ныв. Эскыссьӧ, Артеев семья и водзӧ кутас овны ӧтсӧгласӧн да ӧта-мӧд дорӧ ыджыд муслунӧн.
<> Гижӧдсӧ дасьтіс Павел Симпелев. Снимокъясыс ӧтуввезйысь.