Водзӧ тӧдмӧдам газет лыддьысьясӧс Сыктывдінысь аслыспӧлӧс йӧзкӧд. Та пӧрйӧ волім Зеленечӧ, педагогъяс Осиповъяс ордӧ. Семьяын традицияясӧн да челядь быдтанногӧн юксис кӧзяйкаыс — Алёна Витальевна.
Ӧти кӧлысь, мӧд кӧлысь…
Нывбаба чужлӧма Мылдінын, но ичӧтдырйиыс на семьянас вуджӧмаӧсь овны Сыктывкарӧ. Гырысь классъясын велӧдчысь Алёна Олегкӧд тӧдмасьӧмаӧсь ёртъясыслӧн кӧлысь дырйи. А сэсся пӧшти абу аддзысьлӧмаӧсь. Вочаасьӧмаӧсь, сӧмын кор ныв пырӧма босьтны водзӧ тӧдӧмлун Коми пединститутысь культурология факультетын, да зэв нимкодь лоӧма. Олег сэки ОБЖ факультетын коймӧд курсын нин велӧдчӧма.
Кутӧмаӧсь аддзысьлыны, парк-скверын гуляйтігмоз сёрнитӧмаӧсь велӧдчӧм да аскиалун йылысь. А сэсся и гижсьӧмаӧсь.
—Ӧтлаасим Олегӧс армияӧ босьттӧдз на, — казьтылӧ Алёна Витальевна. — Куті овны сылӧн бать-мам ордын, быдторйын мен отсасисны. Мамыс ас нылӧс моз и вочааліс. Пусим-пӧжасим ӧта-мӧд вежмӧн, кодлӧн кадыс вичмыліс, да та понда некор эг видчывлӧй. Колӧ шуны, сэки и мусмис ставнымлы чӧскыд сёян — духовкаын яя да кабачока пӧжалӧм картупель.
Ёртаси и верӧс чой Дашакӧд. Сійӧ вӧлі меысь неуна ичӧтджык, велӧдчис Ярославльса училищеын, а сэсся Коми пединститутын обществознание да культурогия велӧдысьӧ, и ме сылы таын отсаси. Дерт, и горт овмӧсын быдсикас удж-нок вӧчи. Сиктын ӧд чужлі да, унатор кужи. Олегкӧд гижасим электроннӧй пошта пыр, а ӧтчыд весиг часьтӧдзыс ветлі.
Быдтасъясыс нимкодьӧдӧны
Институтсӧ Алёна Осипова помалӧма 2015 воын. Быдмӧма нин Злата ныв. Верӧсыс сэки велӧдӧма Зеленечса школаын ОБЖ, котыртӧма кадетъяскӧд удж. Армияын служитӧм морт юк-сьӧма олӧмас колана кужанлун-сямӧн ныв-зонкӧд, котыртлӧма быдсикас смотр. Тренируйтӧма быдмысь войтырӧс и стройӧн ветлӧмын, и лыйсьӧмын. Мукӧд педагогыс хореографияӧ на велӧдӧмаӧсь.
Алёна Витальевна 2017 воын тшӧтш сюртчӧма педагог котырӧ. Культурология велӧднысӧ этша час урчитӧма да, вӧзйӧмаӧсь нӧшта продлёнка нуӧдны. Дерт, кӧсйысьӧма. Сійӧ воыс тшупӧма вежӧрас, школаысь медводдза кадетъяс петӧмаӧсь да.
—Верӧсӧй да мукӧд наставникыс ёна майшасисны, — казьтылӧ педагог. — Виччысим ӧд Сыктывкарысь ыджыд гӧсьтъясӧс, та вӧсна коліс ставсӧ котыртны лючки. Шуд вылӧ, ставыс бура артмис.
Колӧ шуны, миян корреспондентлы мойвиис веськавлыны тайӧ кыпыд гаж вылас. Шензьӧдіс и стройӧн ветлӧмыс, и бал дырйи мича йӧктӧмыс, Валентина Салийлӧн кывбур лыддьӧмыс да авиацияса ветеран Юрий Калининлӧн гитара улӧ сьылӧмыс.
—Ӧні татшӧм бал-смотрсӧ котыртлӧны тшӧкыда, и нимкодь, мый сыӧ пай пуктӧ и Олег верӧсӧй. Кадетъясыс век нимкодьӧдӧны наставниксӧ, районса да республикаса конкурсъясын пыр медбуръяс лыдынӧсь, — шуда нюмӧн ошйысискодь нывбаба.
Ныв котыр
Алёна Витальевна водзӧ уджалӧма школаын, а мыйкӧдыра мысти вежӧма квалификациясӧ, лоӧма педагог-организаторӧн.
2020 да 2023 воясӧ гозъялӧн чужӧмаӧсь Зара да Агата нылукъяс. Мамыс шуӧ, эгӧ пӧ весьшӧрӧ татшӧм мичаа нимтӧй, ыджыдджык нывъяс бур боксянь асьнысӧ петкӧдлӧны.
Сідз, кӧкъямыс арӧса Злата ворсӧ волейболӧн да, весиг босьтӧмаӧсь Сыктывкарса 1-ӧд номера комплекснӧй спортшколаӧ. Веськавнысӧ сэтчӧ абу кокни: нывка медводз сдайталӧма ГТО да мукӧд норматив, а талун кежлӧ сійӧс пыртӧма республикаса сборнӧйӧ. Тренировка вылас Златаӧс пырджык новлӧдлӧ батьыс, а корсюрӧ и ачыс автобусӧн воӧдчӧ.
—Нывным век юксьӧ миянкӧд майшӧдланторнас и вермӧмъяснас. Кывкутана ордйысьӧмъясын эз на петкӧдчыв, но батьыс ышӧдӧ, тренируйтчынытӧ пӧ сьӧкыд, сы пыдди ордйысьнытӧ кок-ньыдджык лоӧ, — висьталӧ Алёна Витальевна.
Унджык кад коллявны ывлаын
Осиповъяс ӧні олӧны верӧс бать-мамсьыс торйӧн, но тшӧкыда аддзысьлӧны-йитчывлӧны накӧд. Ассьыс мамсӧ Алёна Витальевна вайӧдӧма жӧ Сыктывкарысь Зеленечӧ.
Челядьсӧ быдтӧм кузя нывбаба шуӧ, колӧ пӧ лоны стрӧгӧн и сэк жӧ ошкыны вермӧмъясысь. Школаын да волейбол секцияын водзмӧстчӧм кындзи Злата вевъялӧ и бать-мамыслы ичӧт- джык чойясыскӧд отсавны. Ворсӧдӧ найӧс, медым мамыс шойччыштас ли горт гӧгӧрын нок-сьыштас.
—Ми зілям унджык кад коллявны ывлаын. Радейтам ветлыны Кӧччойягӧ вӧрӧ. Сувтӧдлам сэн палатка, пусям, ворсам. Злата да Зара окотапырысь мачасьӧны. А батьыс велӧдӧ найӧс вӧрын-вадорын колана гусяторъясӧ. Неважӧн походӧ ветлігӧн весиг чӧскыд юмовтор — маршмэллоу — дасьтім. Нывъяс зэв ёна радейтӧны вӧрӧ нопйӧн татшӧм петалӧмъяссӧ. Муртса гортӧ бергӧдчам, юасьӧны нин, кор пӧ мӧдысьсӧ мунам?
Ӧтчыд Осиповъяс медся дзоля Агатаӧс босьтӧмӧн шутёвтлӧмаӧсь Ухта бердса Парась тыясӧ. Гӧгӧр ставсӧ видзӧдалӧмаӧсь, нимкодясьӧмаӧсь мичнас да арт-объектъясӧн.
Алёна Осиповалӧн висьталӧм серти, челядь туйсьыс оз мудзны. Неважӧн лэбзьылӧмаӧсь Абхазияӧ. И весиг меддзоляыс кӧ пӧ няргыны босьтчылас, бурӧдысьыс век эм.
Спорт, поход, шылад
4 арӧса Зара тшӧтш унаторйын водзмӧстчӧ. Челядьлы да томуловлы шӧринын конструируйтны да серпасасьны велӧдчӧ.
—Златалы спорт медмуса, а Заралы — творчество. Шыладыс олӧманым эм жӧ. Батьыс уна во ворсӧ бас-гитараӧн «Разум спит» котырын. Ёртъясыскӧд тшӧкыда чукӧртчывлӧны, гижӧны сьыланкывъяс, ветлывлӧны Сыктывкарӧ репетируйтны. И весиг котыр ним вылас видзӧдтӧг налӧн юр вемыс некор оз узь, — нюмъялӧ Алёна. — Век мыйкӧ выльтор мӧвпыштӧны, дасьтысьӧны концертъяс кежлӧ. Юркарса «Маяковский» клубын весиг петкӧдчылісны, видзӧдысьяс ёна и ошкӧмаӧсь. Зэв бур, мый верӧс водзмӧстчӧ творчествоын!
Алёна Витальевна пуктӧма мог таво петны удж вылӧ аслас радейтана велӧдчысьясыс дорӧ. Кӧсйӧма сетны арӧса Агатаӧс яслиӧ, но мамыс ӧлӧдӧма, кагатӧ пӧ ме видза.
—Тӧдӧмысь, татшӧмӧн и колӧ лоны бур, шуда семьяыдлы, кӧні ставӧн пыдди пуктӧны да гӧгӧрвоӧны ӧта-мӧдсӧ, а колана здукӧ и отсӧг вылӧ воӧны, — кывкӧрталіс кӧзяйка.
<> Елена Музыкант. Снимокъясыс Осиповъяслӧн гортса архивысь.