Август 26 лунӧ Сыктывкарын Степан изэрдын чукӧртчылігӧн регионса юралысь Владимир Уйба сетіс торъя спецоперацияын служитысьяслы мӧдӧдӧм могысь УАЗ, ГАЗ да Mitsubishi автомашинаяс.
–СВО вылӧ Коми Республикасянь татшӧм гуманитарнӧй конвойыс абу нин медводдза, гӧгӧрвоам да, мый тадзи тшӧтш отсалам миян салдатъяслы пасьвартны нацистъясӧс да дорйыны Аймунымӧс, – пасйис чукӧртчӧмаяс дорӧ шыӧдчигӧн Владимир Уйба. – Техника ньӧбӧм вылӧ сьӧмсӧ чукӧртӧ «Добрая республика» фонд, воӧ и регионса предприятие-организацияяссянь, Комиын олысьяссянь. И ме зумыда эска, мый ӧтув, кыдз шуласны, став мирӧн, ми быть дорам ассьыным Победа. Спецоперацияын служитысьяслы зэв тӧдчана да колана миян отсӧгыс, и быд пӧрйӧ, кор передӧвӧйын аддзысьла накӧд, сьӧлӧмсяньыс аттьӧалӧны Комиын олысьясӧс.
Автомашина конвойыскӧд тшӧтш спецоперация вылӧ шуӧма мӧдӧдны маскируйтчан тывъяс, дронысь видзчысян шебрасъяс, медикаментъяс, лыдпаса радиостанцияяс, бензогенераторъяс, бинокльяс да передӧвӧйын колана уна мукӧдтор.
Торйӧн колӧ пасйыны, мый та пӧрйӧ ӧти автомашина вӧлі сетӧма спецоперацияса ветеран Андрей Стрекаловлы. Сійӧ сідзжӧ ветлӧма Украинаӧ СВО вылӧ, чорыда ранитчӧма тыш-косьын, ковмӧма вундыны коксӧ, но ловнас абу усьӧма. Фронтлы отсалӧм могысь босьтчӧма чукӧртны гуманитарнӧй груз. Аслас став нажӧтка вылас ньӧбалӧ спецоперацияын служитысьяслы медся коланатор да ачыс жӧ и автомашинанас нуӧ ставсӧ налы.
Коми Республикаса юралысьлӧн индӧд серти ефрейтор Андрей Сергеевич Стрекаловӧс спецоперацияын повтӧг тышкасьӧмысь пасйӧма «За верность долгу» медальӧн.
<> Гижӧдсӧ дасьтіс Александра АРТЕЕВА. Снимокъясыс ӧтуввезйысь.