Июнь 10-12 лунъясӧ Комиын мунас небӧгӧн вузасян регионъяскостса «Алӧй лента» III выставка-ярманга, кытчӧ воласны страна пасьталаысь лыддьысьысьяс, небӧг лэдзысьяс да гижысьяс.
Тайӧ тӧдчана чукӧртчылӧм дырйиыс медшӧр гӧсьтъясӧн лоасны Россияса гижысьяс Яна Вагнер, Яна Поляруш да Ирина Богданова.
Яна Вагнер нималӧ аслас «Вонгозеро», «Живые люди», «Кто не спрятался», «Тоннель» романъясӧн, Ирина Богданова – «Мера бытия», «Дом, где тебя ждут», «Жизнь как на ладони» небӧгъясӧн. Яна Поляруш тӧдса лыддьысьысьяслы да искусство радейтысьяслы кыдз режиссёр, сценарист, продюсер, небӧг лэдзысь («Альтер Эго Бук») да гижысь («Провокатор», «Ключи времени», «Теория и практика осознанных бесед с сыном—дочкой от 3 до 7 лет»).
Сыктывкарын, Емдінын да Кӧрткерӧсын библиотекаясын накӧд аддзысьлігӧн ӧнія литература радейтысьяслӧн лоас позянлун сетны налы ассьыныс юалӧмъяс, босьтны автограф да ньӧбны небӧгъяссӧ.
Литературалы сиӧм фестиваль дырйиыс жӧ шуӧма нуӧдны мастер-классъяс, викторинаяс да ворсӧмъяс.
Зэв тӧдчана, мый выставка-ярманга дырйиыс «гӧгрӧс пызан» сайын чукӧртчыласны издательствоясын да библиотекаясын уджалысьяс, власьт тэчасын зільысьяс да общественнӧй котыръясын водзмӧстчысьяс. Сёрниыс налӧн лоас сы йылысь, кутшӧм небӧг-гижӧдъяс виччысьӧны талун лыддьысьысьяс, да кыдзи водзӧ котыртны такӧд йитӧдын уджсӧ. Лоӧ видлалӧма и уна мукӧд юалӧм.
Литературалы сиӧм фестивальыс помасяс восьса енэж улын кыпыд гажӧн. Юркар чужан лунӧ Сыктывкарса шӧр бассейн дорын ярманга вылын позяс ньӧбны кыдз Коми Республикаысь, сідз и Россияса мукӧд регионысь гижысьяслысь небӧгъяс, сёрнитыштны авторъясыскӧд да босьтны налысь автограф.
Июнь 12 лунӧ жӧ лоӧ нимӧдӧма регионса издательствояслы йӧзӧдӧм «Алӧй ленталӧн» зарни джадж» конкурсын вермысьясӧс.
Тайӧ конкурсыс нуӧдсьӧ Коми Республикаса культура да архив удж, национальнӧй политика министерствояс да спонсоръяс отсӧгӧн.
* * *
Казьтыштам «Алӧй лента» медводдза выставка-ярмагаыс вӧлі Комиын 2018 воын.
<> Анна ПОПОВА.