Нацпроектъяс да госпрограммаяс серти стрӧйбаяс кыпӧдан да выльмӧдан регионса штаб чукӧртчылігӧн вӧлі пасйӧма, мый 2024 воӧ Комиын восьтасны куим бурдӧдчанін, кык школа да ва весалан станция.
Коми Республикаса правительствоӧн веськӧдлысьӧс вежысь – стрӧитчӧм да жилищно-коммунальнӧй овмӧс кузя министр Андрей Чибисовлӧн кывъяс серти, тайӧ стрӧйбаяссӧ кыпӧдасны «Дзоньвидзалун», «Образование» да «Оланін да карса гӧгӧртас» нацпроектъяс серти.
Арнас нин Печора районса Кӧджорӧм посёлокын воссяс выль поликлиника. Ӧні сэні нюжӧдӧны ва да шоныд сетан трубаяс, вӧчӧны кильчӧ да гараж. Босьтчӧмаӧсь и пытшкӧсса уджӧ – эжӧны керамика плиткаӧн стен, вольсалӧны джодж.
Сыктывса Визинын кыпӧдӧны 45 морт вылӧ артыштӧм бурдӧдчанін, а Емдін районса Емдін сиктын эштӧдӧны амбулатория, кӧні лоас и врачлӧн кабинет.
Сідзжӧ таво восьтасны ӧдзӧссӧ кык выль школа. Сыктывкарысь Эжва районса Емвальын велӧдчанінын тэчӧны ӧшинь да ӧдзӧс, вӧчӧны вевтсӧ да мукӧд удж.
Изьва сиктын тэчӧны кирпич школалысь мӧд судтасӧ.
«Оланін да карса гӧгӧртас» нацпроект серти Ухта бердса Пожня-Ёльын вӧчӧны ва весалан станция. Роспотребнадзор туялӧма нин, мый ваыс сэні лоас бур. Тулыснас пелькӧдасны станция йӧрсӧ да та бӧрын кутасны уджӧдны сійӧс.
Кыдзи пасйис Андрей Чибисов, 2024 воын жӧ эштӧдасны стрӧитны Изьва районса Бакурын детсад, Кулӧмдін сиктын тыр арлыдтӧм томуловӧс реабилитируйтан социальнӧй учреждение да Кӧрткерӧс районса Пӧдтыбокын кусӧдчан депо.
<> Гижӧдсӧ дасьтіс Павел Симпелев.
Снимокъясыс ӧтуввезйысь.