Коми Республикаын йӧзлысь дзоньвидзалун видзӧм кузя министрлысь удж вӧчысь Сергей Булатов Чилимдін районса овмӧдчӧминъясса администрацияясӧн веськӧдлысьяскӧд тшӧтш волӧма Трусов да Мӧскашор сиктъясӧ, Синегорье посёлокӧ, Замежнӧй, Карпушев, Чукчин да Загривочнӧй грездъясӧ, видзӧдлӧма, кыдзи сэтчӧс ФАП-ясын да бурдӧдчан амбулаторияясын специалистъяс могмӧдӧны висьысь-нёрпалысьясӧс медуслугаясӧн.
Шӧр райбольничаса главнӧй врач Вячеслав Захаровкӧд да бурдӧдчанінас зільысьяскӧд аддзысьлігӧн регионса минздравӧн юрнуӧдысь пасйӧма, мый Ылі Войвылын торйӧн нин тӧдчана могмӧдны медицинаса специалистъясӧс бур оланінӧн, мед ышӧдны найӧс кольччыны уджавны сиктӧ.
Чилимдін районса больничалӧн ӧні эм татшӧм позянлуныс. Юрсиктын вичмӧдӧмаӧсь медикъяслы куим благоустроитӧм патера. На пиысь ӧтиӧ овмӧдчӧмаӧсь нин гозъя: терапевт да фельдшер. Найӧ воӧмаӧсь Чилимдінӧ кольӧм во августын Калмыкияысь. Кыдз асьныс висьталӧны, ставыс тані воӧ налы сьӧлӧм вылас. И патераныс пӧ бур, и уджъёртъясыскӧд ладмӧны, и сикт-грездын олысьяс пӧ сибыдӧсь да шаньӧсь.
Содтӧд пасъям, мый матысса лунъясӧ нин Чилимдінын воссяс райбольничалы кыпӧдӧм выль корпус. Стрӧитӧмаӧсь сійӧс «Дзоньвидзалун» нацпроект весьтӧ ФАП-амбулатория выльмӧдӧм-бурмӧдӧм кузя регионса уджтас вылӧ подуласьӧмӧн. <>
Гижӧдсӧ дасьтiс Александра Артеева.
Снимокъясыс ӧтуввезйысь.