«Демография» нацпроектлӧн «Спорт – норма жизни» уджтас вылӧ подуласьӧмӧн Сыктывкарын нуӧдісны вольнӧя вермасьӧм кузя Коми Республикаса чемпионат да первенство.
Спортсменъясӧс Олимпиада кежлӧ дасьтан мӧд номера спортшколаын вын-эбӧс петкӧдліс юркарысь, Печораысь да Интаысь нелямын спортсмен.
Медся бура вермасисны «Эжва» спортшколаысь быдтасъяс, кодъяслӧн ӧкмис 13 зарни медаль.
Чемпионатын зарни босьтісны Сергей Пушкин, Евгений Якимов, Борис Власов, Данила Сидоров да Юнис Багиев
24 арӧсысь томджык юниоръяс пӧвстысь первенствоын медся бура петкӧдчисны Исмаил Кулуев, Михаил Обухов, Сергей Пушкин, Данила Сидоров да Юнис Багиев.
Медвылыс местаяс шедӧдісны и 18 арӧсысь томджык Данил Кирпичев, Станислав Дударь да Никита Андрушкевич.
Таысь ӧтдор «эжвасалӧн» – дас эзысь да ӧкмыс бронза.
Тайӧ вермасьӧмыс петкӧдліс, коді дась февральын нин петкӧдчыны Рытыв-Войвыв федеральнӧй кытшса чемпионатын.
<> Гижӧдсӧ дасьтiс Николай Размыслов.
Снимокыс ӧтуввезйысь.