Комиын бӧръя вит вонас «Оланін да карса гӧгӧртас» национальнӧй проект серти кар-сикт-посёлок чужӧмбансӧ мичмӧдӧм да такӧд тшӧтш йӧзлысь оланрусӧ кыпӧдӧм могысь дзоньталӧма-выльмӧдӧма да бурмӧдӧма-пелькӧдӧма 428 парк-сквер, шойччан-ворсан да вын-эбӧс песан площадка, а сідзжӧ уна патераа 327 керка ӧшинь ув.
Сідз, 2019 воын Воркутаын Воргашор посёлокса скверын вольсалӧмаӧсь асфальт да содтӧд ӧшлӧмаӧсь югыд лампаяс, дзоньталӧмаӧсь-выльмӧдӧмаӧсь челядьлы ворсанінъяс да спортплощадкаяс, а сідзжӧ скейт-парк.
Кольӧм во войвыв кытшсайса тайӧ карас пелькӧдӧмаӧсь-мичмӧдӧмаӧсь Спортивнӧй да Киров изэрдъяс.
Усинскын 2020 воын дзоньталӧмаӧсь Ленин уличаса 19-ӧд номера керка дорын челядьлы ворсанін да ывлавывса тренажёръяса площадка, 2021 воын пелькӧдчӧмаӧсь Мусир перйысьлы памятник гӧгӧрын.
2022-ӧдын «Оланін да карса гӧгӧртас» национальнӧй проект серти жӧ ыджыд удж вӧчӧмаӧсь Номлы памятникдорса скверын: выльмӧдӧмаӧсь-дзоньталӧмаӧсь памятник подувсӧ, югзьӧдӧмаӧсь гӧгӧрсӧ, орччӧн лӧсьӧдӧмаӧсь беседка да сувтӧдӧмаӧсь уна рӧмӧн югъялан-пӧртмасян кубъяс.
Тайӧ жӧ воас мичмӧдӧмаӧсь и В.Ефремова нима сквер. Сэні лӧсьӧдӧмаӧсь челядьлы ворсанін, сувтӧдӧмаӧсь лабичьяс да нюжӧдӧмаӧсь югыд би.
2020 воын Ухтаын мичмӧдӧмаӧсь Октябрь изэрд. Вежӧмаӧсь веркӧс кышӧдсӧ, выльмӧдӧмаӧсь газонъяссӧ, ывлавывса бисӧ, сувтӧдӧмаӧсь выль мича лабичьяс, урнаяс, дзоньталӧмаӧсь фонтан.
2022 воын тайӧ карас выльмӧдӧмаӧсь-пелькӧдӧмаӧсь Ветлосян микрорайонын «В.И.Ленинлӧн мыгӧр» дорын уна йӧза чукӧртчылан-шойччанін. Вольсалӧмаӧсь сэні выль асфальт, гӧгӧр югзьӧдӧмаӧсь, садитӧмаӧсь дзоридзьяс, сувтӧдӧмаӧсь ӧграда, лабичьяс, урнаяс, лӧсьӧдӧмаӧсь сідз шусяна смотрӧвӧй площадка. И Ленин мыгӧрсӧ выльысь мавтӧмаӧсь.
Сыктывкарын 2019 восянь босьтчӧмӧн благоустроитӧмаӧсь Мичурин парк, Коммунистическӧй уличаӧд Киров парклань лэччанін, шӧр бассейн дорын часі улын изэрд, «Строитель» микрорайонын сквер да уна мукӧдлаын шойччанін да прӧст кад колляланін.
Кольӧм во республикаса 46 муниципалитетын «Оланін да карса гӧгӧртас» нацпроект серти дзоньталӧма-выльмӧдӧма да пелькӧдӧма-бурмӧдӧма уна йӧза 73 шойччан-чукӧртчыланін да 50 керка ӧшинь ув.
Сідз, Айкатылаын пелькӧдӧмаӧсь-выльмӧдӧмаӧсь XX нэмӧ Айму дорйысьяслы памятник. Сы гӧгӧрын вольсалӧмаӧсь из брус, керамогранит плиткаӧн эжӧмаӧсь танклы подувсӧ. Асьсӧ танксӧ мавтӧмаӧсь да ӧшӧдӧмаӧсь сы вылӧ гижӧда кӧрт табличка.
Койгортын «Некодӧс абу вунӧдӧма, нинӧм абу вунӧма» памятник гӧгӧрын вольсалӧмаӧсь из брус, сувтӧдӧмаӧсь йӧзӧдлытӧм войнаса участникъяслы скульптура да флагштокъяс.
2024 воын шуӧма вӧчны-монтируйтны Первой мирӧвӧй войнаса участникъяслы сиӧм мемориальнӧй пӧвъяс, сувтӧдны ӧграда да вольсавны асфальт.
Изьваын восьтӧмаӧсь Яг-морт йылысь легенда-мойд вылӧ подуласьӧмӧн да изьватас-коми традицияяс тӧд вылӧ босьтӧмӧн «Радлун» этнопарк.
Сэтчӧ пыранінас ӧтарладорсяньыс сувтӧдӧмаӧсь чум, а мӧдарладорас серпасалӧмаӧсь йӧра сюръяс. Кельыдлӧз рӧма бетона пода туйяс чуклялӧны юяс моз. Парксӧ мичмӧдӧмаӧсь Яг-морт, Туган да Райда скульптураясӧн, кӧр мыгӧръясӧн, а сідзжӧ изьватас-коми ордпу пасъясӧн. Сувтӧдӧмаӧсь пыж сяма лабичьяс да уна мукӧдтор, мый нимкодьӧдӧ синтӧ.
Кӧрткерӧс районса Мордінын выльмӧдӧмаӧсь-мичмӧдӧмаӧсь Набережнӧй уличаын челядьлы площадка. Важ кӧрт качайяс пыдди сэні лӧсьӧдӧмаӧсь зонпоснилы быдсикас ворсанінсӧ, сувтӧдӧмаӧсь мича ӧграда, лабичьяс да урнаяс.
Сыктывкарын дзоньталӧмаӧсь-выльмӧдӧмаӧсь-бурмӧдӧмаӧсь «Уръяса парк», первой номера шӧр школа дорын сквер, Эжва районын, Лесозаводын да Гӧрд Затон посёлокын уна йӧза шойччанінъяс да керка ӧшинь увъяс.
<> Гижӧдсӧ дасьтіс Александра Артеева.
Снимокъясыс ӧтуввезйысь.