—Ыджыд классалы да абитуриентлы медбур журналыс… Сыктывкарысь «Йӧлӧга»! — грымӧбтіс А.П.Гайдар нима челядьлы библиотека сцена вывсянь.
Октябрь 13-14 лунъясӧ Калининградын нуӧдісны челядь СМИ-лы сиӧм ставроссияса фестиваль, та пӧрйӧ жӧ вӧчисны «Волшебное слово» конкурслы кывкӧртӧдъяс, нимӧдісны вермысьясӧс. Тайӧ конкурсас «Йӧлӧга» пырӧдчис коймӧдысь. Кольӧм во коми журналсӧ экспертъяс шуисны национальнӧй кывъя петасъясысь медбурӧн, воӧн водз «Йӧлӧга» вермис тавося жӧ номинацияын — лоис ыджыд классалы медся бур журналӧн.
—Чолӧмала вермӧмӧн! Долыд, мый ті эмӧсь, мый нинӧм вылӧ видзӧдтӧг йӧзӧдчанныд, журналлы отсалӧны! Тіян мича, ӧнія кадлы лӧсялана петас, и зэв жаль, ог гӧгӧрво гижӧдъяссӧ да, — висьталіс челядьлы гижысь, «Волшебное слово» конкурсӧ пырӧдчысьясӧс донъялысь Елена Усачёва.
Челядь СМИ-лы сиӧм фестиваль Россияса минцифры отсӧгӧн нуӧдӧ печать предприятиеяс союз. Вермысьясӧс быд во нимӧдӧны выль карын. Таво мойвиис Калининградлы. И пырӧдчысьяслы тшӧтш уси шуд воӧдчывны ылі пельӧсӧ. Кык лунъя уджтасыс вӧлі озыр: челядьлы журнал дасьтысьяс удитісны и уджавны, и тӧдмасьны Россияса Европаӧн.
Делӧвӧй программа дырйи чина йӧз висьтасисны челядь СМИ-лы государствосянь отсӧг йылысь; психолог зілис вочавидзны, кутшӧм ӧнія лыддьысьысьыс, мый сійӧ кӧсйӧ аддзыны; туясьысь тӧдчӧдіс, кутшӧм пайыс челядь воспитайтӧмын школаса библиотекаяслӧн, а «Росдетцентр» шӧринысь специалист тӧдмӧдіс ныв-зонлӧн медиацентръясӧн.
Фестивальса медводдза луныс помасис кыпыда — конкурсын вермысьясӧс нимӧдӧмӧн.
Мӧд лунас уджтасӧ пырӧдчысьяс петісны туйӧ — мӧдӧдчисны Зеленоградскӧ. Тайӧ курорт карыс Калининградсянь 30 кымын километр ылнаын. Мунігмоз фестивальса пыравлісны «МуМуКаӧ» — Калининградса лӧп-ёг музейӧ. Со сулалӧ кӧрт торъясысь вӧчӧм куим метр судта робот, водзынджык — жугалӧм чайникъясысь тэчӧм слӧн, музей пытшкас — машина свечаясысь мастеритӧм петук, важся микрочипъясысь Цойлӧн портрет… Мыйсӧ мастеръясыд оз думыштны!
Музейса экскурсия бӧрын фестиваль-конкурсӧ пырӧдчысьясӧс нуӧдісны челядьӧс видзан «Наш дом» социальнӧй шӧринӧ. Конкурсса экспертъяс нуӧдісны татчӧс ныв-зонлы мастер-классъяс, а журналистъяс та пӧрйӧ тӧдмасисны конкурсӧ медводдзаысь на пырӧдчысьяскӧд.
Сідз, тавося ордйысьӧмын вермысьясысь ӧти — Ростов-на-Дону карысь «Антирутин» газет редакция. Тайӧ петассӧ вӧчӧны-дасьтӧны школа-интернатысь омӧля аддзысь челядь.
—Кор ми сӧмын на думыштім тайӧ газетсӧ, миянӧс некод эз гӧгӧрво. Кыдзи пӧ омӧля аддзысьясыс кутасны босьтны интервью, вӧчны фото да видео, дасьтыны сюжет, печатайтчыны компьютерӧн? Но ми петкӧдлім, мый и вермытӧмъясыс ставсӧ вермӧны, — сьӧлӧмсянь юксис «Антирутинӧн» веськӧдлысь Лариса Боброва. — Миян газет отсаліс уна ныв-зонлы. Кор ми кутім петкӧдчыны, висьтавны ас йылысь, вермыны войтыркостса конкурсъясын, миянӧс казялісны журналист да гижысь союзъясын. Чина йӧз отсалісны инасьны медбур клиникаясӧ. Сёысь унджык ныв-зонлы вӧчисны синманыс операция. Найӧ ӧні аддзӧны. Таысь аттьӧ «Антирутинлы»! И сӧмын та ради коліс заводитны татшӧм уджтассӧ!
Тӧдмасьӧм бӧрын конкурсӧ пырӧдчысьяслы жюри нуӧдіс «разбор полётов» — индісны тырмытӧмторъяс вылӧ, гӧгӧрвоӧдісны, мыйла газет-журналыс вермис номинацияын либӧ эз.
—Окота эськӧ видыштны, но нинӧмысь, — босьтіс киас «Йӧлӧга» журнал серпасасьысь Алексей Капнинский. — Зэв бур вёрстка да дизайн, бӧрйӧмаӧсь бур шрифтъяс. Мукӧд лист бокыс тан Европаса нималана журналъясысь кодь.
А кутшӧм вӧлі нимкодь татшӧмсӧ кывны! Художниклӧн донъялӧм бӧрын позис самолёттӧг Сыктывкарӧдзыс и лэбовтны!
Помасис фестивальыс Зеленоградскын рытъя экскурсияӧн, код бӧрын журналистъяс мӧдӧдчисны бӧр Калининградӧ чукӧртны чемоданъяс — ӧд регыд петны туйӧ да мунны ас карӧ, мед бара локны редакцияӧ да быдтыны борд.
<> Ирина Терентьева.
Снимокъясыс авторлӧн.