Яръюгыд концертӧн пасйисны 50 вося юбилейсӧ «Монди СЛПК»-лысь. Сэнi зiльысьяслы да вӧвлӧм уджалысьяслы зэв бур козинӧн лои россияса «кодзувъяс» Юлианна Карауловалӧн да Дима Биланлӧн петкӧдчӧмыс.
«Нимкодь, мый оз вунӧдны»
Чужанлунасигас поводдяыс вӧлi кымӧра да зэра. Но Сыктывкарса шӧр стадионӧ чукӧрмис вель уна йӧз: том и верстьӧ. Абу тай повзьӧмаӧсь зэрысь да чизыр тӧлысь. И ловруыс быдӧнлӧн вӧлi зэв кыпыд. Öта-мӧднысӧ чолӧмалiсны предприятиелӧн тшупӧда пасӧн. Öд на пиысь быдӧн пуктiсны да пуктӧны «Мондилӧн» водзӧ сӧвмӧмӧ пай.
Шуам, Надежда Юрьевна Гладышева ЛПК-ын зiльӧма транспортировщицаӧн 27 во. Öнi пӧ пенсия вылын нин. А Комиӧ нывбаба локтӧма Вӧлӧгда обласьтса Великӧй Устюгысь 18 арӧсӧн.
—Ме эськӧ чери кыйны радейта, верӧскӧд весиг ордйысям, но талун эг мун, концерт вылӧ локтi. Зэв нимкодь, мый предприятиеын оз вунӧдны и вӧвлӧм уджалысьяссӧ. Быд гаж да концерт вылӧ корлӧны. Талун со пажын дырйи Юлианна Карауловаӧс телевизор пыр видзӧдi, а ӧнi «ловйӧн» кывза, — кыпыд ловруӧн висьтасис Надежда Юрьевна.
Том нывъяс Оля да Кристина концерт вылӧ жӧ локтӧмаӧсь. Висьталiсны, мый Олялӧн мамыс уджалӧ ЛПК-ын. Предприятие козинсӧ вӧчӧма мамыслы, а ань концерт вылӧ билетсӧ козьналӧма нылыслы.
Тимофейлӧн бать-мамыс кыкнанныс уджалӧны ЛПК-ын. Зон шуис, мый сылы ёнджыка кажитчӧ Дима Биланлӧн творчествоыс. Радейтана артистлысь сьылӧмсӧ видзӧдны локтӧма ӧтнас, а бать-мам пӧ смена вылынӧсь.
Клаус Пеллерлӧн кӧсйӧм
Концерт заводитчытӧдз стадион вылӧ сувтӧдӧм экранын петкӧдлiсны видеоролик, кыдзи быдмис Эжва вывса гигант — «Монди СЛПК». Комиӧ сэки СССР пасьталаысь локталiсны комсомолечьяс. Öнi жӧ предприятиеын зiльӧ вит сюрс гӧгӧр морт.
А сэсся чукӧртчысьясӧс чолӧмалiс «Монди СЛПК-ысь» генеральнӧй директор Клаус Пеллер:
—Талун збыльмис менам кӧсйӧмӧй: юбилей вылӧ чукӧртчисны миян уджалысьяс. Тайӧ тшупӧда пассӧ ме виччыси кӧкъямыс во. Аттьӧ, мый локтiнныд, аттьӧ уна вося бур уджысь! Ми ӧтвылысь вӧчам предприятиенымӧс вынаӧн да мир пасьтала нималанаӧн. И миян ставыс на во-дзын. А ӧнi шойччыштам да гажӧдчыштам!
Водзӧ «Монди СЛПК»-лы чолӧмалана кывъяс висьталiс Сыктывкарса мэр Валерий Козлов. Аттьӧалiс ёртасьӧмысь, карса уджтасъяс збыльмӧдны отсалӧмысь. Да пасйис, мый и водзӧ кутӧ топыд йитӧд вылӧ лача.
«Кодзувъяслӧн» сцена вылӧ пет-тӧдз ставӧн сьылiсны «Процветай, наш СЛПК» сьыланкыв.
«Кодзувъяс» зэрысь оз повны
Медводз видзӧдысьясӧс гажӧдны петiс Юлианна Караулова. Таӧдз зэрыс неуна кобыштлiс, но «кодзувлӧн» сьыланкыв бӧрын выльысь койыштiс.
—Шондiа кӧ вӧлi, гашкӧ, эз и коль вежӧраныд тайӧ кыпыд рытыс, а ӧнi некор оз вун. Эн яндысьӧй, га-жӧдчӧй, йӧктӧй мекӧд тшӧтш! — ышӧдiс видзӧдысьясӧс Юлианна.
Да ӧд войвылын олысьыд абу сёй монь. Сэсся и концерт вылӧ воысьяс бура дасьтысьӧмаӧсь: кодкӧ плёнка плаща, кодкӧ зонтика. Первой, дерт, пукалiсны, а мыйӧн сьылысь ачыс матӧджык локтiс — ыззисны. Быдӧн нин сьылiс Юлианакӧд «Маячки», «Лети за мной», «Аривидерчи», «Я попала в сети», «А ты не такой»… Весиг погона йӧзлӧн зумышлуныс воши, заводитiсны шпыннявны.
Юлианналы мужичӧй котӧртӧдiс жӧ зонтик, тыдалӧ, видзысьяс пиысь кодкӧ, но сiйӧ шеныштiс кинас, оз пӧ ков. Мӧдыс уськӧдчылiс на саймовтны Юлианнаӧс, а сiйӧ шуис: «Да расслабься ты!». А сэсся казьтыштiс, мый оз нин медводдзаысь зэр улын сьыв. Кольӧм во пӧ футбол кузя мирса чемпионат дырйи татшӧм жӧ поводдя вӧлi.
—Эн пукалӧй, йӧктӧй, шенасьӧй зонтикӧн. Ме быдӧнӧс аддза, тӧда кодi кӧнi олӧ, — водзӧ ыззьӧдiс зэр улын йӧктысьясӧс Юлианна.
Юлианна Караулова бӧрын сцена вылӧ петiс Дима Билан. А зэрыс нӧшта на ёнджыка койыштiс. Трибунаяс вылын пукалысьяс «шоналӧмаӧсь» нин вӧлi воддза «кодзулыскӧд» гажӧдчигӧн да, вочаалiсны Дима Биланӧс кыпыда горзӧмӧн да шутьлялӧмӧн: «Дима, Дима, Дима!».
—Меным зэв нимкодь тiян водзын петкӧдчыны. Ме важӧн нин радейта Сыктывкар, татчӧ эг нин медводдзаысь лок. Тӧда, танi олӧны шань йӧз, абу ёна варолӧсь, а сiдзкӧ, вӧрӧдчам! — шыӧдчис видзӧдысьяс дорӧ Дима Билан.
Артист эз жӧ повзьы руд енэжсянь сувтсӧн кисьтысь зэрысь, матыстчылiс йӧктысьяслань: «Зэв жаль, мый сценаыс тiянсянь ылын, но ме матыстчыла, окота кывны тiянлысь шоныд рунытӧ…» И, дерт, ставӧн кыпыда вочаалiсны артистӧс. Сыкӧд ӧтвылысь том войтыр и верстьӧ йӧктiгмоз сьылiсны «На берегу неба», «Держи», «Молния», «Невозможное возможно» да с.в.
Кыкнан артистсӧ «Монди СЛПК»-ӧн веськӧдлысь Клаус Пеллер аттьӧалiс сцена вылӧ кайлӧмӧн да козьналiс моздор тырныс мича дзоридз. А сэсся шыӧдчис йӧз дорӧ, мед оз на мунавны, нӧшта на пӧ козин лоӧ. И збыльысь, войся кымӧра енэж вель дыр дзирдалiс яръюгыд салютӧн!
Екатерина МАКАРОВА.
«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.