Выльгортса Раиса Сметанина нима спорткомплексын «Молодёжь Коми» республикаса форум дырйи нимӧдісны-чолӧмалісны тавося медбур студентъясӧс, а сідзжӧ гранта конкурсын вермӧм ныв-зонмӧс.
Гаж вылӧ воысьясӧс видеошыӧдчӧмӧн чолӧмаліс Коми Республикаса юралысь Владимир Уйба. Волісны и республикаын нималана да чина гӧсьтъяс. Форумыс ӧтувтіс регионса быд кар-районысь 200 сайӧ ныв-зонмӧс.
«Молодёжь Коми» республикаса форумыс – Томулов воӧ тӧдчана лоӧмтор. Аддзысьлӧмсӧ котыртіс том йӧз политика комитет. Конкурсӧ воӧма 53 шыӧдчӧм, 10-сӧ шуӧма вермысьӧн. Грантсӧ вичмӧдӧма 3 миллион дон.
Сідз, Никита Дерябин 100 сюрс шайт шедӧдіс «Медицина – моя жизнь» уджтас збыльмӧдӧм вылӧ, а Михаил Замыслов – 224 сюрс шайт «Точнее некуда» проект лӧсьӧдӧмысь. Андрей Ситарлы вичмис 400 сюрс шайта грант нуӧдны танкӧвӧй многоборье кузя В.Малышев нима регионса турнир, а Валерий Толмачевлы – 500 сюрс шайт томуловлы «Трӧича лун» фольклорнӧй мӧд фестиваль котыртӧм вылӧ. Дарья Кетова 173 сюрс шайтсӧ видзас «Жемчужина Сысолы» фестиваль нуӧдӧм вылӧ.
Форумдырся «Социальное проектирование» площадкаын том йӧз тшӧтш дасьтісны-гижисны проектъяс. Медбурӧн шуисны Сыктывкарысь Анастасия Жилионислысь да Сосногорскысь Александра Мамедовалысь уджъяссӧ.
Аддзысьлӧмсӧ сигӧртігӧн кывкӧрталісны и «Студент года – 2023» Россияса национальнӧй премиялысь регионса тшупӧд.
Медводдза местасӧ «Творческая личность года» нимпасын босьтіс Елизавета Зинченко, мӧдсӧ «Профессионал года» нырвизьын – Марина Загуменнова, а коймӧд местаыс вичмис Иван Чуяшковлы «Общественник годаын». Тайӧ жӧ нимпасас Гран-при шедӧдіс Валерия Кардашевская.
Комиын том йӧз политика комитетӧн веськӧдлысь Светлана Суворкина пасйис-чолӧмаліс «Молодёжь Коми» форумын медся водзмӧстчысь ныв-зонмӧс. А сэсся ставныс нимкодясисны кавер-группа да йӧктан котыр петкӧдчӧмӧн, бипур дорын сёрнитісны-варовитісны да сьылісны.
Во помӧдзыс уна на аддзысьлӧм сиасны томуловлы. Сідз, Ухтаын лоӧ том семьяяслы да уджалысь ныв-зонлы форумъяс, Сыктывкарын чукӧртчыласны военно-патриотическӧй котыръяс.
* * *
«Образование» нацпроектлӧн «Регион для молодых» уджтассӧ збыльмӧдӧ Коми Республикаса том йӧз политика комитет.
<> Гижӧдсӧ дасьтіс Екатерина МИКУШЕВА.
Снимокъясыс ӧтуввезйысь.