Коми Республикаса кардиология диспансерысь главнӧй медсестра Валентина Нестерова сиис медициналы нэм джынйысь унджык да эскӧдӧ, мый некор эз каитчыв татшӧм профессия бӧрйӧмсьыс.
Олӧмас кызвын кадсӧ сійӧ тӧждысис-ноксис висьысь-нёрпалысьяс дорын. И тайӧ каднас пӧ йӧзлысь дзоньвидзалун видзан юкӧныс тӧдчымӧн вежсис.
–Анестезиологияын дас вит во мырсигӧн ме бура велалі колана здукӧ ӧдйӧ воны отсӧг вылӧ. Онкологияӧ воӧм мысьт гӧгӧрвои, мый оз тырмы психологияын тӧдӧмлунӧй, да пырӧдчи сыӧ. Водзӧ вылӧ сэсся тайӧ тӧдӧмлуныс унаысь ковмыліс олӧмын и уджын. Коми Республикаса больничаын да онкология диспансерын чӧжӧм сям-кужӧмлунӧй сэсся ёна отсалісны кардиодиспан-серын уджавны босьтчигӧн, – казьтылӧ Валентина Петровна.
Ань тӧдчӧдӧ, медицинаын пӧ пыр колӧ мыйӧкӧ выльӧ велӧдчыны, да помся содтӧ тӧдӧмлун-сямсӧ.
А медсестра уджыд нэмсӧ вӧлі да и ӧні на зэв колана да тӧдчана. Тані быд лун кольӧ висьысь-нёрпалысьяс вӧсна тӧжд-нокын, ӧд йӧзыс виччысьӧны медсестрасянь шаньлун да гӧгӧрвоӧм.
–Ме серти, медсестра профессияыс медся интереснӧй да колана. Зэв тӧдчана бӧрйыны олӧмад нимкодьлун ваян удж. И меным тайӧ уджнас мойвиис. Ме гӧгӧр век вӧліны шань йӧз да опыта наставникъяс, – пасйӧ Валентина Нестерова да юксьӧ водзӧ вылӧ тӧжд-могнас: – Таво миян корпоративнӧй группаын босьтчисны велӧдчыны 100 медсестра. А та мында вӧснаыд кывкутӧмыс тӧдчымӧн содӧ: на бӧрся колӧ сюся видзӧдны, колана здукӧ чуйдыны-ышӧдны да отсавны. Окота, мед эськӧ кардиодиспансерын уджалысьяс и водзӧ сӧвмӧдісны тӧдӧмлун-сямсӧ, мед налы котыртлісны конкурс-ордйысьӧм да мукӧд ног ышӧдісны.
<> Иван Попов.
Снимокыс ӧтуввезйысь.