Сосногорск, Калач-на-Дону, Изьва, Сыктывкар, Летка – тайӧ кар-сиктыскӧд йитчӧма Алёна Тушиналӧн олӧмыс. А вужйыс сылӧн мамыс да Канев рӧдвужыс чужанінын – Изьва районса Кипиёвын. Алёналӧн ас олӧм йывсьыс висьтасигкості да юалӧмъяс вылӧ вочавидзигкості ме пыр думайті, кутшӧм крут вежсьӧмъяс сылы козьналӧма олӧмыс. Чужандырыс кольӧма Россия лунвылын, ичӧтдырыс – Изьваын, том кадыс – Коми юркарын, а сэсся ӧнӧдз – миян войвыв республикаса лунвылын. Збыльмӧдӧма детсадйӧ котраландырся на гуся кӧсйӧмсӧ – босьтӧма радейтана профессия, пырӧдчӧма творчествоӧ, чужтӧма куим пи…
Ижемка Надежда Канева велӧдчӧма Сосногорскын, сэн жӧ петӧма верӧс сайӧ да чужтӧма Алёна нылукӧс. Регыд мысти верӧс бать-мамыскӧд став семьянас вуджӧмаӧсь овны Волгоград обласьтӧ. Калач-на-Дону лунвыв карын водз тулыссянь кузь гожӧмбыд кежлӧ челядь мездмылӧмаӧсь керка-патераын нёль стенын пукалӧмысь. Алёна ворсӧма зонкаяскӧд «казаки-разбойникиысь», кавшасьлӧма пу вылӧ, уялӧма саридзса кодь солакодь ваа Донын, чӧсмасьӧма садйын фрукты-тусьӧн.
Мамыскӧд Изьваӧ воӧм мысьт ныв дыр велалӧма кӧдзыд поводдя дорӧ да, дерт, и тӧдтӧм кывйӧ. Сэк жӧ пуктӧма мог велӧдны пӧль-пӧч кывсӧ да збыльмӧдӧма шуӧмасӧ. Зільӧма варовитны изьватас ногӧн рӧдвужыскӧд да ёртъясыскӧд. Ветлӧма и коми кыв урок вылӧ, кӧть эськӧ и абу быть вӧлӧма тайӧс вӧчнысӧ.
–Зэв ёна сьӧлӧм вылӧ воис биология. Татьяна Александровна велӧдысьным медводдза уроксяньыс пестіс сы дорӧ муслун да, сэки и помшуи, мый збыльмӧда ичӧтдырся кӧсйӧмӧс – йита олӧмӧс медицинакӧд. Помнита, матыссаясысь кӧ кодкӧ висьмывліс, окота вӧлі сійӧ жӧ лунас бурдӧдны-лечитны, сувтӧдны кок йылас. Сэксянь и кӧсйи лоны медикӧн да отсавны ставныслы, тшӧтш и ме дорӧ приём вылӧ воысьяслы, – казьтыштіс Алёна.
Витӧд классянь Алёна котралӧма Елена Ярцевалӧн юрнуӧдӧм улын хореография студияӧ. Йӧктӧмыс ыззьӧдӧма да, весиг медицина колледжын велӧдчигас абу ӧвтыштчӧма. А талун Алёна Тушина йӧктӧ Леткаса культура керка бердын «Сикӧтш» ансамбльын. Тайӧ йӧзкостса йӧктан котырыс пыр ветлӧ гастрольӧн оз сӧмын ас районас, Луздорса мича нывъяс нимкодьӧдӧны видзӧдысьясӧс и Коми юркарын гажъяс дырйи.
Нӧшта ӧти лов бурмӧдантор – ки помысь вӧчасьӧм. И тані наставникнас мойвиӧма. Валентина Артеевалӧн «Вунӧдӧм ремеслӧ» студияын ныв вочасӧн сӧвмӧдӧма кужанлун-киподтуйсӧ. Алёна бергӧдчӧма радейтана кипом уджас мӧд пи – Роман – чужӧм бӧрын. Зонка вӧлӧма сэтшӧм лӧнь да лабутнӧй, мый мамыслӧн сюрӧма кад велӧдчыны вӧчасьны изолонысь. Кабала-картон моз изолоныс оз быгав, сійӧс позьӧ пожъявны-мыськавны, а сідзкӧ, и бусыс сэн оз чукӧрмы. Интернетысь изолонысь вӧчасьны велӧдан видеороликъяс аддзӧм бӧрын Алёна веськыда «ӧзйӧма» да воськов бӧрся воськов содтӧма сямсӧ. Вочасӧн кутӧмаӧсь артмыны абу сӧмын дзоридз-букет, но и абажур да мукӧдтор. А сэсся Сергей верӧсыс ас вылас «электрикасӧ» босьтӧма да, йӧз мӧдӧмаӧсь вӧчавны заказ. Вӧлӧмкӧ, и тайӧ хобби весьтас позьӧ нажӧвитчыштны.
Сергейкӧд Алёна тӧдмасьӧма медколледжын велӧдчигас. Зон муртса на воӧма армияысь да локтӧма юркарӧ уджавны. Мича ижемкакӧд тӧдмасьӧмыс вежӧма Сергейлысь водзӧ вылӧ дум-кӧсйӧмсӧ. Алёналӧн велӧдчӧмсӧ помавтӧдз на том йӧз гӧтрасьӧмаӧсь, а регыд мысти семьяын чужӧма Артём пи. Алёна сэки зільӧма республикаса кардиошӧринын.
2020 воын Сергейлы воӧма шыӧдчӧм вылас ошкана вочакыв да, сійӧ босьтчӧма уджавны полицияын. Тушинъяс сэк кежлӧ вит во нин олӧмаӧсь Луздорса Леткаын, Сергей чужанінын.
2017 восянь Алёна Тушина уджалӧма медсестраӧн Леткаса школаын. Буретш татшӧм специализация – челядьлы отделениеын медсестра – велӧдчигас бӧрйылӧма. Пандемия пансьӧм бӧрын медикъяслӧн лоӧма позянлун содтыны тӧдӧмлунсӧ, вежыштны специализациясӧ. Буретш сэки Алёна велӧдчӧма общӧй практикаа медсестраӧ да 2020 воын лоӧма участкӧвӧй медсестраӧн.
Дзик на неважӧн, тавося мартын, ань коймӧдысь лоӧма мамӧн. Дмитрий – семьяын медся ичӧт да медся радейтана. Мамыс чеччӧ квайт час асылын, а гырысьджык челядьыс ворсӧдӧны нин воксӧ. Алёна вевъялӧ вердны-удны ставнысӧ, бергӧдны гортгӧгӧрса удж, котӧртлыны культура керкаса студияӧ йӧктыштны, а рытнас пуксьывны вӧчасьыштны изолонысь. Узьны водтӧдзыс звӧнитлӧ мамыслы: Надежда зэв ёна гажтӧмтчӧ внукъяссьыс да виччысьӧмӧн виччысьӧ, кор Тушинъяс воласны гӧститны сы ордӧ. <>
Игорь Колесов.
Комиӧдіс Елена Плетцер.
Снимокъясыс Алёна Тушиналӧн гортса архивысь.