(Шмоньсорӧн)
Талапӧлын Муза,
Мӧдлапӧлын Муза.
Кодыс эськӧ меным
Радейтана, муса?
Ӧтиыс зэв мича,
Лунтыръяс кӧть видзӧд.
Гашкӧ, сійӧс аслым
Гӧтыр пыдди видза?
Мӧдыс сюся ветлӧ,
Мича нюм жӧ петлӧ.
Ок жӧ, ёна любӧ,
Кодыр сывйӧ шедлӧ.
Ӧти дінас вола,
Мӧд дорас тшӧтш ола.
Сӧмын ог тӧд, кодыс
Меным ёнджык колӧ.
Талы сьӧлӧм восьта,
Мӧдыс сьӧлӧм косьтӧ.
Мый нӧ тайӧ мекӧд?
Шог ӧд тадзтӧ босьтӧ…
Эй ті, муса нывъяс,
Лӧсьыд, небыд сывъяс,
Вай жӧ, ӧдйӧ шедӧй
Меӧн кыян тывъяс.
Кыкӧн пӧ ог пырӧй,
Сідзсӧ пӧ ог тӧрӧй…
Ӧтисӧ кӧ босьтан,
Мӧдсӧ он нин вӧрӧд…
Дзикӧдз вои пикӧ,
Пикӧ вои дзик ӧд.
Ог ӧмӧй нӧ сэсся
Некоднансӧ дзигӧд?
Мӧвпалі дыр сідзи,
Мӧвпалі дыр тадзи,
Сӧмын петан туйсӧ
Некытысь эг аддзы…
Сідз и лои пӧрысь,
Ӧдва вӧрысь-дзӧрысь,
Весиг унджык кадсӧ
Ог нин петав йӧрысь.
Юрӧй ставнас кушмис,
Мыйкӧӧй тшӧтш рушмис.
Мыйла эськӧ сідзи
Томдырйи ме ышми?!…
Александр Уляшев.
Серпасаліс Николай Парфентьев.