Коми печатьлӧн oлан туйыс пансис 1917 воын, «Зырянская жизнь» газет петтӧдз на. Сыӧдз йӧзӧдісны роч кывъя «Известия Общества обновления…», «Яренская газетa», «Известия Яренского уездного Совета крестьянских депутатов», «Коммунист», «Красный пахарь» газетьяс.
«Зырянская жизньлӧн» медводдза номерыс петіс 1918 вося июнь 10 лунӧ. Редакторнас лоис Дмитрий Степанович Попов.
Сэки редакторъясыс вежласисны зэв тшӧкыда. 12-ӧд номерсянь «Зырянская жизнь» газетын редактораліс Дмитрий Иванович Розанов – роч морт (тасянь и пансьӧма роч да коми кывйӧн вӧдитчысьяс костын веныс), сэсся – Дмитрий Яковлевич Попов, вичкоса вӧвлӧм уджалысь, 4-ӧд Государственнӧй Думаса член. Газет лэдзысьясыс зілисны чужтыны йӧзын царизм дорӧ лӧглун, сэк жӧ эз гӧгӧрвоӧдны том Сӧветскӧй государстволысь политикасӧ.
1918 вося июнь 16 лунӧ Усть-Сысольскын лӧсьӧдісны большевикъяслысь партийнӧй котыр. Сёрӧнджык коммунистъяс индісны редакторнас Виктор Алексеевич Савинӧс. Редколлегияӧ пырис тшӧтш Василий Ильич Лыткин.
Регыд мысти вӧлі шуӧма лӧсьӧдны Пинего-Печорскӧй крайса политотделениелысь, Сӧветъяслӧн Усть-Сысольскӧй уисполкомлысь да РКП(б) укомлысь ӧтувъя орган. 1919 вося апрель 10 лунӧ котыртчис сылӧн редакционнӧй коллегия, кытчӧ пырисны Ф.Чумбаров-Лучинский, Абрамов, Чижов. Веськӧдлысьнас бӧрйисны Фёдор Степанович Чумбаров-Лучинскийӧс.
Татшӧм ногӧн «Зырянская жизнь» пыдди 1919 вося апрель 11 лунсянь лоис «В зырянском краю» газет. Сійӧ петіс стӧч 50 лун. Усть-Сысольскын политическӧй отделение бырӧдӧм бӧрын дас лун мысти нин бара кутісны лэдзны «Зырянская жизнь» газет.
Вӧлі нӧшта ӧти коставлӧм. 1919 вося ноябрь 13 лунӧ петіс газетлӧн 76-ӧд номер. Сэки белогвардеечьяс матыстчисны нин Усть-Сысольсклань. Та вӧсна 77-ӧд номерсӧ лэдзисны сӧмын декабрь 5 лунӧ, карсӧ мездӧм бӧрын.
1921 вося январсянь газетлы сетісны «Удж» ним. Сы понда мый Гражданскӧй война вӧлі помасянвыйын, и партия веськӧдіс Сӧветскӧй Россиялысь вынсӧ мирнӧй удж вылӧ.
Газет петic вежоннас кыкысь, вӧлi кык лист бока. Унджык гижӧдсӧ йӧзӧдісны рочӧн, сӧмын ӧткымын кывбур, юӧр да лозунг – комиӧн. «Удж» медбӧръяысь петіс июнь 9 лунӧ.
1921 вося июль 15 лунӧ лыддьысьысьлы медводдзаысь воис «Югыд туй». Редактораліс Виктор Алексеевич Савин. А газетлӧн «Югыд туй» нимыс выль олӧм тэчысь-лӧсьӧдысь коми войтырлы вӧлі зэв ышӧдана да матысса. «Югыд туй» газет дорӧ коми кывъя содтӧдӧн 1925 воӧ заводитӧ петны «Коми сикт». 1930-ӧд воясӧ «Коми сиктын» редактораліс Дмитрий Ильич Зезегов (усис 1941 воын Ленинградскӧй фронт вылын).
Комынӧд воясӧ жӧ «Коми сикт» пыдди кутісны петны «Коми колхозник» да «Вӧрлэдзысь» газетъяс. 1936-ӧдсянь 1949 воӧдз «Вӧрлэдзысь» газетӧн веськӧдліс Николай Павлович Максимов (Ыджыд война вылӧ ветлігӧн коставлӧмӧн).
1955 вося март 8 лунсянь йӧзӧдісны кык кывъя ӧти газет – «Красное знамя» – «Гӧрд знамя», кӧні редактораліс Алексей Иванович Усов. Но регыд гӧгӧрвоисны, мый кыдъя комиа-роча газетыд сӧмын пӧдтӧ комисӧ. Та понда 1956 вося август 1 лунсянь кык кывъя газет чужтіс «Коми колхозник». 1956-1959 воясӧ редакторнас сэні вӧлі Василий Никитич Сельков.
1959 вося август 1 лунӧ коми газет бара вежис нимсӧ – «Югыд туй» вылӧ. 1959-1964 воясӧ газетын удж-нокӧн веськӧдліс Авив Дмитриевич Лыткин. 1963-1967 воясын «Красное знамя» газет борд улӧ ӧтувтчисны коми да роч газет редакцияяс. Став вылас «кӧзяитіс» локтӧм роч журналист Борис Баблюк.
1965-1971 воясӧ «Югыд туй» газетӧн веськӧдліс Василий Егорович Кушманов, сы бӧрын 1979 воӧдз – Александр Васильевич Сажин. 1979-1989 воясӧ «Югыд туй» газетын редактораліс Геннадий Васильевич Беляев, 1989-1992 воясӧ – Александр Васильевич Ульянов.
1991 вося январь 1 лунсянь «Югыд туй» вежис ассьыс нимсӧ, лыддьысьысьлы кутіс воны «Коми му». 1992-1998 воясӧ «Коми му» газетын уджӧн юрнуӧдіс Александр Андреевич Игнатов, 1998-2003 воясӧ главнӧй редакторӧн вӧлі Надежда Николаевна Быковская. 2003-2004 воясӧ «Коми муын» ыджыдаліс бара Александр Васильевич Ульянов.
2004 вося февральын республикаса правительстволӧн индӧд серти котыртчис «Коми му» газет редакция» Коми Республикаса государственнӧй учреждение, коді ӧтувтіс «Коми му» да «Йӧлӧга» газетъяс, «Би кинь» да «Чушканзі» журналъяс. Тайӧ ыджыд котырнас веськӧдлыны босьтчис Александр Васильевич Ульянов.
* * *
2008 воын государственнӧй учреждение пыдди лоис «Коми му» газет редакция», а 2012 воын – «Коми йӧзӧдчан керка» автономнӧй учреждение, кытчӧ ӧтувтчис тшӧтш «Войвыв кодзув» журнал редакция.
Коми йӧзӧдчан керкаӧн веськӧдлысьясӧн вӧліны Надежда Николаевна Быковская, Вячеслав Васильевич Попов, Елена Владимировна Плетцер, Инесса Николаевна Орёл. Кольӧм восянь директоралӧ Галина Валерьяновна Макарова. <>