Кольӧм пекничаӧ кыпыд ловруӧн нимӧдісны Сыктывкарса землячествояслысь «Восьтам пӧль-пӧчьяслысь куд» фестиваль. Таво сійӧс сиисны Коми кыв да гижӧд лунлы, кодӧс республикаса юралысьлӧн индӧд серти урчитісны дзик на неважӧн – апрельын.
Кыдз тӧдса, карса землячествояс нуӧдӧны чужан кыв, культура да традиция видзӧм-сӧвмӧдӧм могысь ыджыд удж. Топыда ёртасьӧны Сыктывкарса коми культура шӧринкӧд да асланыс районъяскӧд, збыльмӧдӧны ӧтувъя уджтасъяс. Карса да республикаса ни ӧти гаж оз коль землячествоястӧг – найӧ век мичмӧдӧны ставсӧ енбиа сьылысь-йӧктысьясӧн.
Асланыс котыръясын водзмӧстчӧмысь тавося фестиваль дырйи республикаса национальнӧй политика министерстволӧн аттьӧалан гижӧдъясӧн пасйисны-нимӧдісны Княжпогостса землячествоысь Галина Увароваӧс, Емдінсаысь Лидия Дубленниковаӧс, Кулӧмдінсаысь Марина Гуроваӧс, Изьвасаысь Евдокия Рочеваӧс да Кӧрткерӧссаысь Виктория Агарковаӧс.
Висьтавны кӧ земляк котыръясын став удж йывсьыс торйӧн, газетын лист бокыс оз тырмы. Сідзкӧ, казьтыштам та йылысь дженьыдика.
Сідз, луздорсаяс некымын во нин нуӧдӧны том войтырлы «Люблю и знаю родное Прилузье» фестиваль, неважӧн В.В.Юхнин нима библиотекакӧд ӧтув збыльмӧдісны «Не прервётся связь поколений села Лойма» уджтас.
Сыктыв землячество зіля пырӧдчӧ Сыктывкарса коми культура шӧринӧн збыльмӧдан «Ӧти рӧдысь», «Коми сикт лун», «Ас йӧз» проектъясӧ.
Емдiнсаяс шӧринсаяскӧд тшӧтш кыӧны торъя военнӧй операция вылӧ мунӧмаяслы маскируйтчан тыв, тӧвбыдӧн дасьтӧмаӧсь матӧ сё гоз носки.
Эжва йывсаяс некымынысь нин петкӧдчисны «Ӧти рӧдысь» уджтасын: чукӧртчылісны регионын тшӧкыда паныдасьлан ова войтыр, шуам, Игнатовъяс да Шомысовъяс.
Койгорт землячестволы муртса на куим тӧлысь. Ciйӧ сӧмын сувтӧ кок йылас, но котыртлісны нин «Койгородские истории» выставка.
Кӧрткерӧс землячество водзӧ нуӧдӧ ордпу туялан удж. Сідз, йӧзӧдісны кӧрткерӧссаяслы сиӧм «Не забывайте рода своего. Сведения о жителях села Корткерос XVII век – 1929 год» небӧг.
Княжпогостса котыр ӧтувтӧ матӧ куимсё мортӧс. Медшӧр могыс налӧн – видзны-сӧвмӧдны чужан культура да традиция. Землячествосаяс кутӧны топыд йитӧд ас районкӧд да ышӧдӧны таӧ томуловӧс.
Изьвасаяслӧн медтӧдчана проектыс – Изьва керка стрӧитӧм. Сы улӧ вичмӧдӧм мутасас нуӧдісны нин Ыджыд тышын усьӧмаясӧс да война кадся челядьӧс нимӧдан-казьтылан аддзысьлӧмъяс, пасйисны «Лым лун».
Удораса войтыр быд во чукӧртлӧны асланыс районысь медся енбиа сьылысь-йӧктысьяссӧ, гижысьяссӧ да ворсысьяссӧ «Удора паныдалӧ ёртъясӧс» гаж вылын.
Воысь-во землячествояс да коми культура шӧрин костын ёртасьӧмыс сӧвмӧ. А бур сьӧлӧмнад ӧд уджыд век артмӧ.
* * *
И кутшӧм фестиваль нӧ сьылӧм-йӧктӧмтӧг? Тайӧ гаж дырйиыс видзӧдысьясӧс мича петкӧдчӧмъясӧн нимкодьӧдісны Вера Михайлова, Игорь Мороков, Наталья Канова, Екатерина Мишарина, Ясон Напалков, Елизавета Чередова, Екатерина Немчинова, Мария Бабинова, Оля Сан, «Сударушка», «Катшасинъяс», «Олан гаж», «Хорошее настроение» да «Тагъя сур» котыръяс. <>
Сыктывкарса коми культура шӧринысь юӧр серти дасьтіс Елена Плетцер.
Снимокъясыс авторлӧн да Сыктывкарса коми культура шӧринысь.