Сыктывкарын вуджан висьӧмысь бурдӧдчан 
республикаса больнича бердын воссис гепатология шӧрин, кӧні медицина отсӧг кутасны сетны С вируса гепатитӧн нёрпалысьяслы.
Шӧриныс уджалӧ лунся стационар моз. ОМС полис серти таво помӧдз тані вермас пыдісянь туявны дзоньвидзалунсӧ ӧкмысдас морт.
Сэк жӧ С вируса гепатитнас висьысьыс миян республикаын квайт сюрсысь унджык. Ӧти мортӧс бурдӧдӧм вылӧ колӧ шӧркодя 300 сюрс шайт.
Гепатошӧринас врачьяс вӧдитчӧны дас миллион шайта ӧнія кадся выль фибро-сканӧн.
Вуджан висьӧмысь бурдӧдчан республикаса больничаысь главнӧй врачӧс вежысь Татьяна Безуглаялӧн висьталӧм серти, фибросканыс сетӧ позянлун гӧгӧрбок да пыдісянь туявны висьысьяслысь муссӧ. Водзті та могысь налы ковмыліс шыӧдчывны коммерческӧй медучреждениеӧ да сэні жӧ вӧчавны зэв дона тестъяс, ӧтисьыс медэтшасӧ 2,5 сюрс шайт мынтӧмӧн. Ӧні жӧ нёрпалысьяслы гепатология шӧринас став татшӧм услугасӧ сетӧны дон босьттӧг.
Таысь ӧтдор татчӧс специалистъяс консультируйтӧны регионысь мукӧд кар-районса больничаясысь терапевтъясӧс ӧтуввез пыр, и, шуам, висьысь кӧ оз вермы волыны Сыктывкарӧ, гепатология шӧринысь медикъяскӧд ӧтув сылысь дзоньвидзалунсӧ онлайн туялӧмӧн став колана отсӧгсӧ сетасны ас кар-районас.
Врачьяс эскӧдӧны, мый С вируса гепатитсӧ кӧ морт вир-яйысь ас кадӧ казявны, кор сійӧ абу на пыдӧдз вужъясьӧма, позьӧ мынтӧдчыны-бурдӧдчыны тайӧ сьӧкыд висьӧмсьыс суткинас ӧти таблетка ньылыштӧмӧн кӧкъямыс вежонӧн.
* * *
С вируса гепатитысь да вуджан-паськалан мукӧд висьӧмысь видзчысьӧм могысь Комиын, кыдзи и Россияса став регионын, унатор вӧчсьӧ «Демография» национальнӧй проектлӧн «Дзоньвидзалун» федеральнӧй уджтас серти.
<> Гижӧдсӧ дасьтіс Александра АРТЕЕВА.
Снимокъясыс ӧтуввезйысь.