Зэв бура олісны порсь гозъя,
И ставыс вӧлі шоныд позъяс.
Ай вӧлі эньыс дорын пӧт,
Но сэтшӧм нин тай мужик рӧд,
Друг аддзис ӧтчыд сійӧ томӧс,
Да синмыс ӧзйис… Воссис вомыс:
– Ме дыр нин тэ дорын тан пӧжси,
Да госӧй унакодь нин чӧжсис.
Ме мӧдӧс, лӧсьыдджыкӧс аддзи, –
Энь порсьлы айыс шуис тадзи.
И муніс сійӧ томджык дорӧ.
Том порськӧд койпаліс вой-лун
Да воштіс сійӧ дзикӧдз ун.
Но томыд быд лун сылысь корӧ,
Да оз на весиг луннас ӧтчыд.
Тадз дзоньвидзалун вылас мӧрччис.
И сёян эньлӧн эз вӧв, дерт,
Ӧд дышысла эз весиг пусьы.
И айсӧ нинӧмӧн эз верд,
Да дзикӧдз кок йывсьыс и уси.
Тадз, сёйтӧг, уджавны эз вермы,
И ставыс вынтӧммис да нэрмис.
И абу нин тай важ кодь брун,
Кор мусукасьліс вой и лун.
Ай довъялӧмӧн нин со ветлӧ
Да гӧлӧс омӧля нин сетлӧ.
Пыр том да лӧсьыдыд и вуніс,
Сы дорысь ӧдва, коньӧр, муніс…
Моральсӧ мӧвпышт ачыд татчӧ.
Тэ ставсӧ лыддьӧм бӧрын аддзан:
Кӧть инмӧ мортлы, кӧть и порсьлы –
Бур дорын бурджыкӧс оз корсьны.
Александр Уляшев
Серпасаліс Николай Парфентьев
