Помасьӧ велӧдчан во. Школаясын регыд триньӧбтас ныв-зонлы бӧръя звӧнок. Кытчӧ мунны велӧдчыны? Унаӧн, дерт, та йылысь ёна водзджык, аттестат босьттӧдз на, мӧвпалӧны. Шуам, Сыктывдінса Ыбысь Милена Шуктомова ӧкмысӧд класс таво помалӧ, но тӧдӧ нин, мый олӧмсӧ йитас артист уджкӧд.
Милена велӧдчӧ Коми Республикаса искусствояс гимназияын. Ичӧтсяньыс нин артиставны радейтӧ да, буретш та понда бӧрйӧма театральнӧй юкӧн. Сылӧн Юлия Сергеевна мамыс шуӧ, нылӧй пӧ быдсикас гаж дырйи сьӧлӧмсяньыс лыддьывліс кывбуръяс, мукӧддырйи кывзысь-видзӧдысьӧс весиг нормӧдліс.
Милена абу нин ӧтчыдысь вермылӧма и художествоа кыв кузя конкурсын. Радейтӧ йӧзкостса йӧктӧм да декоративно-прикладнӧй творчество, и гимназияын велӧдчӧмас тайӧ сылы ёна отсалӧ.
Театральнӧй юкӧнӧ Милена абу сідз-тадз пырӧма, ёна пӧ кажитчӧ уна боксянь петкӧдчывны, видлыны ачымӧс теш да драма рольын. Нывка окотитӧ лоны профессиональнӧй артистӧн. И мед сылӧн дум-кӧсйӧмыс збыльмас! <>
Екатерина МИКУШЕВА.
Снимокыс Милена ШУКТОМОВАЛӦН гортса архивысь.