Дмитрий Канев ичӧтдырсяньыс водзмӧстчӧма физкультураын. Став изьватасыслӧн моз медся радейтана спорт сикасыс – лыжиӧн котралӧм. Сэк жӧ и волейбол да баскетбол секцияясӧ окотапырысь волывлӧма. А мый нӧ, метр да 85 сантиметр судта тушанад да лыжиӧн котралӧмӧн чӧжӧм тырмымӧн вын-эбӧснад позьӧ и мач шыблавны.
Физкультура кындзи школаын медся радейтана предметъясыс – история да география. А кыдзи нӧ татшӧм мича муас да Сизяб сиктас олігӧн географиятӧ он радейт?!.
Бать-мамыс ошкӧмаӧсь пиыслысь водзмӧстчӧмсӧ. Кӧр дорын нэмсӧ зільысь батьыс ӧд бура гӧгӧрвоӧма, кутшӧм колана быдлунъя олӧм-уджас вын-эбӧс-пельклуныд. А детсадйын нянечкаӧн уджалысь мамыс ичӧтсяньыс чуйдӧма писӧ быдсикас ворсӧм-ордйысьӧмӧ.
Дмитрий семьяас медічӧт кага. Андрей ыджыдджык вокыс ӧні олӧ-уджалӧ Сыктывкарын, а Екатерина чойыс вужъясьӧма чужан Сизябын.
Школа помалӧм бӧрын изьватас зон пырӧма Сыктывкарса автомеханика техникумӧ босьтны автокрановщик специальносьт серти тӧдӧмлун. Тайӧ профессиясӧ бӧрйӧма водзвыв, ӧд унаысь кывлӧма верстьӧсянь, кутшӧма колӧны татшӧм специалистъясыс. Да и автокрановщик дипломнад Россияса быд регионӧ туйыс восьса.
Служитны кад воӧма да, Дмитрий веськӧдчӧма контрактӧн саридзса пехотаӧ. Майбыр, вын-эбӧсыс тырмӧ да, сійӧс босьтӧмаӧсь Мурманск обласьтса Спутник посёлокын десантно-штурмӧвӧй батальонӧ. Морпехлӧн быдлунъя удж-нокыс вӧлӧма тырмымӧн: вежоннас кыкысь лыйсьыны, а нӧшта тактика боксянь дасьтысьӧм, рукопашнӧй тыш, спецназ да ВДВ подразделениеяскӧд ӧтувъя тренировка…
Кык воыс лэбыштӧма тӧдлытӧг. Гортас бергӧдчӧм мысти Дмитрий Канев кӧсйӧма шойччыштны чужанінас да водзӧ мунны служитны, нюжӧдны контрактсӧ. Но газетысь аддзӧма Изьва районса МВД юкӧнӧ уджалысьӧс корсьӧм кузя юӧр да шуӧма шыӧдчыны сэтчӧ. Сыктывкарын петкӧдчӧма медкомиссиялы, вочавидзӧма психология юалӧмъяс вылӧ, сдайтӧма физподготовка норматив. Кык тӧлысь мысти звӧнитӧмаӧсь районса ОМВД-сянь да юӧртӧмаӧсь, босьтам пӧ удж вылӧ участкӧвӧйлы отсасьысьӧн. 2020 вося июль 8 лунсянь пансьӧма стажировкаыс.
Том полицейскӧй петкӧдлӧма асьсӧ тӧлка-вежӧра сотрудникӧн. Уджъёртъясыслӧн висьталӧм серти, Дмитрий Григорьевич кужӧ воӧдчыны йӧзыскӧд ӧти кывйӧ, мортыс сибыд, ыджыд терпенньӧа да, дерт, вына-винёв. Оз ӧд весьшӧрӧ быд прӧст здукӧ Дмитрий Канев котрав: тӧвнас – лыжиӧн, мукӧд кадӧ – кросс.
2022 воӧ Изьва районса ОМВД-ын медся том уджалысьясысь ӧти, участкӧвӧйлы кызь нёль арӧ-са отсасьысь Дмитрий Каневӧс бур службаысь пасйисны Россия Федерацияса пытшкӧсса делӧяс министерстволӧн аттьӧалана гижӧдӧн. <>
Игорь КОЛЕСОВ. Комиӧдіс Елена ПЛЕТЦЕР.
Снимокыс Дмитрий КАНЕВЛӦН гортса архивысь.