Сентябрь 11 лунӧ Улыс Новгородын Т.А.Маврина нима библиотекаын вӧчисны челядьлӧн газет-журналлы сиӧм ставроссияса «Волшебное слово» фестивальлы кывкӧртӧд. Коми Республикаса томуловлысь «Йӧлӧга» экспертъяс шуисны Россияса уна сикас войтырлӧн кывъяс вылын петысь журнал-газет пӧвстын медбурӧн. А дизайн боксянь медбур петасӧн – «Би кинь» журнал.
Коми йӧзӧдчан керка пырӧдчӧ тайӧ конкурсас мӧдысь нин. Кольӧм во «Йӧлӧга» вермис «Школьник-абитуриентъяслы медбур журнал» нимпасын.
–Кык пӧв нимкодь босьтны тайӧ дипломсӧ Россияса войтырлӧн культура наследиелы сиӧм воӧ. Конкурсын вермӧмыс нӧшта ӧтчыдысь петкӧдлӧ, мый коми – мича кыв, кодӧн сёрнитӧ томулов. Ми корсям выль геройясӧс, гижам сы йылысь, мый тӧдчана да колана уналы. Пыр зілям вежыштны-мичмӧдыштны журнал дизайнсӧ. «Йӧлӧга» – мича, яръюгыд да ӧнія кадлы лӧсялана петас. И тайӧ зэв тӧдчана национальнӧй СМИ-лы, ӧд миян газет-журнал серти йӧзыс донъялӧны и кывсӧ, – пасйис «Йӧлӧгаса» шӧр редактор Мария Игушева.
«Би кинь» журналӧн веськӧдлысь Алёна Нестеровалӧн тайӧ ыджыд вермӧмыс медводдза на. И буретш Алёна Николаевна Коми йӧзӧдчан керка нимсянь петкӧдчис Улыс Новгородын.
– Медъёна виччыси жюриӧ пырысьяскӧд сёрни. Зэв сюся кывзі художник Алексей Капнинскийӧс да гижысь Артур Грайсӧс, мый эськӧ миян петас йылысь висьталасны. Алексей вылӧ донъяліс журналсӧ серпасалысьясӧс. Сідзкӧ, и водзӧ накӧд кутам уджавны. А Артур ошкис куар-код йӧзӧдӧмсӧ, код серти позьӧ кывзыны, кыдзи авторыс лыддьӧ ассьыс кывбурсӧ. Роч вылӧ гижӧдъяссӧ вуджӧдӧм йылысь меным унаӧн нин висьталісны, но век на таысь мыйлакӧ нӧрӧвитам. Ми ӧд коми челядьлы да комиӧн сёрнитны окотитысьяслы журналнымӧс дасьтам, найӧс быдтам. И роч вылӧ вуджны ньӧти абу окота, – висьталіс Алёна Нестерова.
Ас му туялан медбур петасӧн экспертъяс шуисны сідзжӧ Коми Республикаса «Радуга» журнал.
* * *
Пасъям, «Волшебное слово» конкурссӧ Россияса минцифры отсӧгӧн быд во котыртлӧ печать индустрияса предприятиеяслӧн союз. <>
Лист боксӧ дасьтіс Ирина ТЕРЕНТЬЕВА.