Кольӧм субӧтаӧ мойвиис волыны Эжва йывса Пожӧгӧ. Сэтчӧс школаса спортзалын волейболысь ордйысисны командаяс, кытчӧ ӧтувтчӧмаӧсь ӧти семьяысь войтыр.
Кутшӧм жӧ нимкодь вӧлӧм видзӧдны ӧтлаын ворсысь верстьӧӧс и челядьӧс, кор гырысьджыкъяс аддзӧны посниджыкъяслысь сямсӧ да пыр ошкӧны найӧс таысь. Кутшӧм жӧ любӧ, кор ныв-пиыскӧд, внукъясыскӧд ӧти командаын ворсысь аньяс быттьӧ оз и чеччавны-котравны мач бӧрся, но сэк жӧ век удитӧны «босьтны» мачсӧ да мӧдӧдны сійӧс сетка сайӧ. И ворсігчӧжыс чужӧмсьыс нюмыс оз и быравлы – сэтшӧм мичаӧсь найӧ сэки. И кутшӧм жӧ долыд лов вылад, кор ордйысигӧн быдӧн пыдди пуктӧ мукӧд командаысь спортсменъясӧс да ас котырса моз «висьӧ» на вӧсна.
И сэтшӧм лӧсьыд, кор веськалан тӧдтӧм йӧз пӧвстӧ да, код дорӧ кӧ комиӧн шыасигӧн ньӧти он майшась, гӧгӧрвоас оз сійӧ. Чужан кывйӧн сёрнитӧмыс быттьӧ выйӧн сьӧлӧмтӧ мавтыштӧ.
Татшӧм ордйысьӧмсӧ Пожӧгын уна во нин котыртлӧны Екатерина Алексеевна да Иван Егорович Шаховъяс. Кулӧмдінын Мишаринлӧн водзмӧстчӧмӧн водзті семьяяс волейболасьлӧмаӧсь жӧ, сэки пӧ, висьтасис Иван Егорович, и ыззи да мӧвпышті Пожӧг кустын Шахов семьялӧн приз вӧсна ордйысьӧмсӧ нуӧдны.
– Ми фермер овмӧс кутам, и тӧрыт кук вузалім да 15 сюрс шайт торйӧдім: коймӧд места шедӧдысьлы сетам куим сюрс, мӧд местаысь – вит сюрс да вермысьлы – 7 сюрс шайт. Козинъясыс быд командалы лоасны, – шуис сійӧ. – Вермысь котыр босьтас и вуджан кубок. Бӧръя ордйысьӧм дырйи кубоксӧ шедӧдлісны Пожӧгдінысь Уляшевъяс, но та пӧрйӧ найӧ оз ворсны. Ӧти и сійӧ жӧ котыр кӧ куим во дорвыв босьтлас кубоксӧ, сійӧ пыр кежлӧ нин коляс налы.
Эг кутчысь да юалі на Иван Егоровичлысь, абу-ӧ жаль турнир вылас видзӧм сьӧмыс? Абу пӧ, веськыда вочавидзис сійӧ. Ме пӧ пыр шула, мый тайӧ рӧдительяслы пай.
– Таво ордйысьны воис дас команда, – висьталіс-лыддьӧдліс Иван Егорович. – Тайӧ Помӧсдінысь Шомысовъяслӧн да Уляшевъяслӧн, Діасёръяысь Мамонтовъяслӧн, Донысь Чалановъяслӧн, Ярашъюысь Пашнинъяслӧн, Пожӧгдінысь Третьяковъяслӧн, Мингалёвъяслӧн, Шаховъяслӧн, Кӧрткерӧс районса Ыджыдвиддзысь Симпелевъяслӧн да Пожӧгысь миян, Шаховъяслӧн, семьяяс. Ордйысьӧмыс районъяскостсаӧн нин лоис.
Шаховъяслӧн челядьыс медводдза турниръяс дырйи ичӧтӧн на ворслӧмаӧсь. И таво ставныс жӧ командаас вӧліны: асьныс Иван Егорович да Екатерина Алексеевна, Ангелина нылыс да Тимур Смирнов зятьыс (гозъя вужвойтырлӧн шылада-драмаа театрын артисталӧны), Миша (школаын соцпедагог) да Ваня (11-ӧд классын велӧдчысь) пияныс, 5-ӧд классын велӧдчысь Наталия нылыс, Витя племянникыс Катя гӧтырыскӧд, Люба Чаланова племянницаыс.
– Коронавируса вуджан висьӧм понда куим во кежлӧ коставлім. И пыр меным звӧнитчӧны, корӧны нуӧдны ордйысьӧмсӧ. Колӧ шуны, мый кызвын командаыс ӧткодь тшупӧдын ворсӧ, и веныс лоас ёсь. Чайта, Помӧсдінысь Шомысовъяс бура петкӧдчасны, – водзӧ висьтасис Иван Егорович. – А судьяясӧн талун лоасны Кулӧмдінса школаын физкультура велӧдысь Василий Егорович Шахов да челядьлӧн спортшколаысь Пожӧг кустын тренер Александр Гурьевич Мингалёв.
Пожӧгса школаысь жӧ аддзи Алексей Шомысовӧс, КВН-ын ворсысьӧс, да пыр и юавсис: «Тэ талун он али мый квн-ась?» (буретш тайӧ жӧ лунас Скӧрӧдумын вӧлі чукӧртчӧмаӧсь Кулӧмдін районысь да Кӧрткерӧс районса Одыбысь КВН командаяс).
– Тані медвойдӧр ворса да бӧрас муна квн-асьнытӧ, – вочавидзис сійӧ.
Кори висьтавны и асланыс команда йылысь.
– Менӧ таво капитанӧн индісны. Мекӧд тшӧтш кутасны ворсны Артём вокӧй, сійӧ асшӧр уджалысь, да сылӧн Дима пиыс, Денис воча вокӧй, коді ме моз жӧ лесничествоын зільӧ, Снежанна Левашова – коймӧд кӧленаын чой, Снежана Шомысова – воча воклӧн гӧтыр, – висьталіс Алексей. – Ачым ме волейболсьыс 4-ӧд классянь ворса, Виктор Игоревич Уляшев дорын сибӧдчи тайӧ спортас. Ӧні челядьӧс волейболасьны велӧдӧ Евгения Анатольевна Уляшева. Районын миян Помӧсдінса команда век буръяс лыдын.
Ордйысьӧм пансьытӧдз удиті сёрнитны и Тимур Смирновкӧд. Сійӧ тшӧтш жӧ школаас на волейболасьны заводитлӧма да и водзӧ абу эновтчӧма. Юалі сылысь, кутшӧм места шедӧдӧм вылӧ лача кутӧ да мыйла.
– Медводдза места вылӧ, – падъявтӧг шуис Тимур. – Миян ворсысьяс пиысь куимӧн – Иван Егорович, Миша да Витя – бура кужӧны «блок» пуктыны, та вӧсна и надеяыс ыджыд.
Тимур эз ёна сорсьы, налӧн командаыс и збыльысь вына вӧлі. Турнир дырйи даснан командасӧ юкисны кык пельӧ, и медводз найӧ ӧта-мӧдыскӧд ворсісны. Группаас нин вермысьяс сэсся венласисны кубок да призъяс вӧсна. Помӧсдінысь Уляшевъяс да Ыджыдвиддзысь Симпелевъяс костын пансьыліс 3-ӧд места вӧсна кось. Тайӧ венас кужысьджыкӧн да винёвджыкӧн вӧліны помӧсдінсаяс, найӧ и шедӧдісны брон-засӧ. Зарни да эзысь вӧсна ордйысисны Пожӧгысь Шаховъяс да Помӧсдінысь Шомысовъяс. На костын веныс вель ёсь артмис, некоднанныс эз кӧсйыны ворссьыны. Бӧръя здукас нин водзӧ петісны Шомысовъяс да шедӧдісны кубоксӧ.
Вермысьяслӧн радлӧмыс гӧгӧрвоана, но и мукӧд командаса войтыр кыпыд ловруӧн муналісны гортас. Тӧдӧмысь, мӧвпалісны, мый во мысти бара на воласны Пожӧгӧ Екатерина Алексеевна да Иван Егорович Шаховъяс дорӧ волейбол гаж вылӧ.
Павел Анохин.
Снимокъясыс Светлана Симпелевалӧн.