Конкурслӧн могъяс — видзны да водзӧ сӧвмӧдны коми литература кыв, кыпӧдны авторъяслысь зільлунсӧ да содтыны авторъяслысь лыд да ышӧдны гижны босьтчысьясӧс.
Конкурссӧ нуӧдӧны Коми Республикаса национальнӧй политика министерство, Коми Республикаса гижысь котыр да «Войвыв кодзув» журнал редакция Ёртасян керка отсӧгӧн.
Кутасны донъявсьыны «Войвыв кодзув» журналын 2018 вося ноябрсянь 2019 вося ноябр тӧлысьӧдз йӧзӧдӧм коми кывъя гижӧдъяс.
Конкурс нуӧдсьӧ вит номинация кузя: «Проза», «Поэзия», «Публицистика да литературнӧй критика», «Драматургия» да «Коми кыв вылӧ вуджӧдӧм».
Быд номинацияын бӧрйыссьӧ ӧти вермысь. Комиссия донъялӧ конкурснӧй уджъяслысь художествоа да культура боксянь тӧдчанлунсӧ, налысь аслыспӧлӧслунсӧ и коми литература да литературнӧй кыв сӧвмӧдӧмӧ пай пуктӧмсӧ. Конкурс котыртысьясыс, кывкӧртӧдъяс вӧчӧм бӧрын, вермӧны лӧсьӧдны содтӧд номинацияяс да призъяс.
Конкурс вылӧ гижӧдъяс мӧдӧдны кабала вылӧ печатайтӧмӧн либӧ электроннӧй ногӧн. Быд удж дорӧ содтӧд пасйыны авторсӧ, гижӧд нимсӧ, номинация, адрес да телефон.
Уджъяссӧ позьӧ вӧзйыны некымын номинация серти. Гижӧдъяс бӧр оз мӧдӧдсьыны. Гижӧдъяс ыстыны: 167982, Сыктывкар, Карл Маркс улича, 229 номера керка, «Войвыв кодзув» журнал редакция, либӧ kodzuv@mail.ru электроннӧй почта вылӧ. Конкурслы кывкӧртӧд лоӧ вӧчӧма 2019 во помӧдз.
«Войвыв кодзув» журналысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмӧяс, гижӧй komi-kerka@ya.ru.