И бипур пестыны, и пыжӧн кывтны…

Август помын Кӧрткерӧс районса Адзорӧмын муніс сиктса нывбабаяслӧн котыръяс костын мӧдӧд туристическӧй фестиваль.

Пырӧдчылісны сизим команда: Висерысь «Обаяшки», Пӧдтыбокысь «Ромашки», Адзорӧмысь «Клюковки», Пезмӧгысь «Улыбка», Лӧкчимдінысь «Котелок», Мордінысь «Девчата» да Кӧрткерӧсысь «Полосатый рейс».

Медводз быд команда сувтӧдіс палатка, пузьӧдіс тшай, пелькӧдіс-мичмӧдіс ас «керка-йӧр» гӧгӧр. А сэсся пудъясьӧм бӧрын заводитчис фестиваль.

Аньяс петкӧдлісны ассьыныс сям-тэрыблунсӧ да кужанлунсӧ спортивнӧй эстафетаын, палатка сувтӧдӧмын, бипур пестӧмын. Лыйсисны ньӧввужйысь да пневматическӧй винтовкаысь, шыблалісны шы, резина пыжӧн панъясисны.

Фестиваль помасис туристическӧй сьыланкывъяс ливкйӧдлӧмӧн. Быд котыр дасьтысьӧма сьӧлӧмсяньыс. Нывбабаяслӧн гажыс нин бырӧма татшӧм петкӧдчӧм-аддзысьлӧмсьыс. Молодечьяс! Ок, и гажа вӧлі! Бара на ставӧн аддзысьлім, нимкодясим, снимайтчим.

А вермысьӧн лоис Мордінысь «Девчата» нывбабаяслӧн котыр. Мӧд да коймӧд местаяс юкисны Пезмӧгса «Улыбка» да Кӧрткерӧсса «Полосатый рейс» котыръяс.

Ставныслы вичмисны кубокъяс, медальяс да грамотаяс. Ыджыд аттьӧ Кӧрткерӧс районса спорт шӧринлы фестивальсӧ котыртӧмысь да нуӧдӧмысь. Аттьӧ муса аньяслы ордйысьӧмӧ пырӧдчӧмысь. Кутам виччысьны локтан вося фестиваль.

Оксана ПИНЯГИНА.

Висер сикт, Кӧрткерӧс р.

И бипур пестыны, и пыжӧн кывтны…

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх