Ичӧтӧн меным кузь гӧленя сапӧг эз ньӧблыны, мед ва гуранъясті эг чеччав. И со кадыс тай меным воис жӧ… Кык вежон пидзӧсӧдз ваын. Асывсянь рытӧдз. Кроссовкиӧн. Кӧдзыд ваын изъяс вывті збодера восьлала катамаранкӧд орччӧн. Ном-геб, енэж да чӧв-лӧнь кытшын. И ме йӧймытӧдз шуда бара веськавны сэтчӧ, кӧні абу интернет ни телефон. Но эм кӧтасьӧм кок.
Ӧні оз и эскыссьы, мый ставыс тайӧ вӧлі. Збыльысь-ӧ миян вӧліны Тшугӧр ю дорын кык вежоныс, уна судтаа керкаяс кодь джуджыд крежъясыс, дас вит метр вылнасянь бузгысь ва-водопадыс? Ставыс тайӧ миян вӧлі!
Вӧрас вотім чӧд, ӧктім сус коль да корсялім чайӧ сорлавны быдсикас турун. Аддзылім еджыд бӧжа чери варышӧс, сюзьӧс, кынь шырӧс, кӧр кок туй да катамаранысь пышйысь-уйысь комъяслысь пемыд мышъяссӧ. А нёль кӧндозмӧр гортса курӧгъяс моз повтӧг тапикасисны миян бипур дорын.
Кодъяс нӧ ми ветлім Тшугӧрас? Александр – бипур медбура пестысь, пес корсьысь да чер видзысь. Аркадий вӧлі понъя, а Владимир – пыдӧстӧм нопъя, кӧні вӧлі ставыс, мый виччысьтӧг ковмыліс: кепыссянь пӧртйӧдз. Галинаӧс нинӧмӧн он шензьӧд ни он шӧйӧвошты. Ирина дась вӧлі лун и вой купайтчыны. Людмилаыс котырын вӧлі кык. Ӧтиыс (кодыс абу ме) пуліс миянлы тӧдлытӧм на сёян да пӧттӧдз вердліс ставнымӧс. Ми, кык Люда, и ыззьӧдім мукӧдсӧ ветлыны Тшугӧрӧ. Анялысь, Сонялысь да Катялысь арлыдсӧ кӧ ӧтув артыштны – нӧшта эськӧ ӧти верстьӧ морт лоис. Быдмасны да, тӧда, бара на окотитасны кывтны Тшугӧрсӧ йывсяньыс вомӧдзыс. Став куимсё километрсӧ…
Людмила Игушева.
Снимокъясыс авторлӧн.