Чилимдін районӧ уджмогъясӧн ветліганыс республикаса юралысь Владимир Уйба, регионса правительствоӧн веськӧдлысьӧс вежысь Галина Габушева, вӧр-ва видзӧм, стрӧитчӧм да жилищно-коммунальнӧй овмӧс, видз-му овмӧс, йӧзӧс велӧдӧм кузя министръяс Алексей Кузнецов, Игорь Кузьмичев, Денис Шаронов да Наталья Якимова, а сідзжӧ эмбурӧн вӧдитчан комитетӧн юрнуӧдысь Александр Сажин тӧдмасисны сэтчӧс ылі сикт-грездса войтырлӧн олӧмӧн да уджӧн.
Трусовын да Хабарихаын олысьяскӧд аддзысьлігӧн сёрниыс пансьыліс социальнӧй юкӧн сӧвмӧдӧм, тӧвся туйяс да ю вуджанінъяс дӧзьӧритӧм, йӧзӧс лекарствоӧн могмӧдӧм, ичӧт бизнеслы отсалӧм да чими кыйӧм йылысь.
Трусовын чина гӧсьтъяс видзӧдлісны, кыдзи сиктса школаас дасьтысьӧны выль велӧдчан во кежлӧ. Велӧдчанінсӧ колӧ капитальнӧя дзоньтавны либӧ кыпӧдны выльӧс, ӧд сэтчӧс да орчча Рочев, Филиппов, Мыла да Нонбург грездъясысь 98 ныв-зонлы ӧні лоӧ велӧдчыны Чилимдінса школаын.
Хабарихаысь фермер Василий Захаров кыпӧдӧ 80 мӧс видзӧм вылӧ артыштӧм карта.
Та могысь кольӧм во сійӧ шедӧдӧма видз-му овмӧс министерствосянь сьӧма грант – 19,8 миллион шайт. Ставыс жӧ колӧ 32 миллионысь унджык.
Картасӧ кыпӧдӧны кирпичысь да пуысь, ортсысяньыс стенсӧ эжасны, ӧшиньясыс лоасны пластикысь. Стрӧитчӧм могысь став коланасӧ вайӧмаӧсь нин. Ӧні вӧчӧны вевтсӧ, лӧсьӧдӧны куйӧд петкӧдан транспортёръяс, матысса лунъясӧ босьтчасны сувтӧдны ӧшинь-ӧдзӧс. Картасӧ эштӧдны кӧсйӧны тавося октябрын.
Василий Захаровлӧн овмӧ-сын 148 мӧс, вонас вузалӧны 300 тонна йӧв, 8 тонна вый, 26 тонна яй. Рӧспута дырйи Чилимдін сиктӧ йӧв-яйсӧ сӧмын тайӧ овмӧсыс вайлывлӧ.
Мӧскашор сиктын республикаса юралысь да правительствоысь чина войтыр волісны кадетъяслӧн школаӧ.
«ЛУКОЙЛ» компаниякӧд сёрнитчӧмӧн сэні дзоньталӧны школаын велӧдчысьяслы интернат.
Интернатсӧ, кӧні олӧны Неридзысь челядь, кыпӧдлӧмаӧсь 1960 воясӧ да, сійӧ ёна нин важмӧма.
Капитальнӧя дзоньтасигӧн вежӧмаӧсь нин вевтсӧ, ортсысяньыс эжӧмаӧсь стрӧйбасӧ, шоныд сетан радиаторъяс сувтӧдӧмаӧсь. Ӧні пелькӧдӧны вежӧсъяссӧ, сувтӧдӧны ӧдзӧсъяс, розетка-лампаяс.
Уджсӧ эштӧдны шуӧма сентябрь 1 лун кежлӧ.
Карпушевкаын олысьяс кольӧм во нин шыӧдчылӧмаӧсь республикаса юралысь дорӧ, мед грездса войтырӧс могмӧдасны сӧстӧм юан ваӧн.
Таво июльын писькӧдӧмаӧсь 347 метр джуджда скважина. Суткинас сэтысь позяс босьтны 80 кубометрӧдз ва. Но колӧ на сувтӧдны насос да ва весалан оборудованиесӧ, грездлӧн вылыс юкӧнӧдз васӧ вайӧдӧм могысь нюжӧдны 700 метр кузьта труба. Сылысь проектсӧ дасьтӧма нин.
Бугаев сиктын кольӧм во ытва дырйи ва улӧ веськавлӧм школасӧ «ЛУКОЙЛ» отсӧгӧн жӧ дзоньталӧмаӧсь, а «Лузалес» вичмӧдӧма сьӧм ӧшиньсӧ вежлавны, стен-джоджсӧ мавтны. Выль школасӧ жӧ Бугаевын шуӧма лэптыны 2025 воӧдз.
Новый Борса школаын велӧдчӧны тшӧтш Харъягаысь, Йӧрмидзысь да Медвежкаысь челядь. Сійӧс ӧні тшӧтш дзоньталӧны, дасьтӧны выль велӧдчан во кежлӧ.
Новый Бор посёлокын да Йӧрмидз сиктын Владимир Уйба аддзысьліс сэтчӧс
олысьяскӧд, сёрнитіс накӧд овмӧдчӧминъяслӧн да ставнас Чилимдін районлӧн аскиа лун йылысь. Республикаса юралысь тшӧктіс регионса правительстволы да районса администрациялы босьтны тӧд выланыс йӧзыслысь быд корӧм-вӧзйӧм.
Снимокъясыс ӧтуввезйысь.