Ольга Александровна Лушкова дас кык во нин зільӧ небӧгъяс пӧвстын, а кольӧм восянь босьтчӧма кывкутана уджӧ – юрнуӧдӧ Сыктывкарса челядьлӧн шӧр библиотекаын челядькӧд удж кузя юкӧнӧн.
Ачыс сійӧ Сыктыв районса Гагшор сиктысь, кӧні велӧдчӧма начальнӧй классъясын, а сэсся нин помалӧма Поёлса шӧр школа. Вылыс тшупӧда тӧдӧмлун босьтӧма Сыктывкарса госуниверситетысь финн-йӧгра факультетын.
Юалі, мися, мыйла буретш библиотекарлысь удж бӧрйин?
–Ме ичӧтсянь радейті ёна лыддьысьны, – висьталӧ Ольга Александровна. – Ӧд лыддьысигад пыр мыйкӧ выльтор тӧдмалан, унатор гӧгӧрвоан, мӧвпалан, тшӧтш и выль сьӧлӧмкылӧмъяс чужӧны. Окотапырысь тӧдмася выль небӧгъясӧн, газет-журналӧн. Библиотекарлӧн уджыс зэв аслыспӧлӧс: тані колӧ лоны и литература тӧдысьӧн, и велӧдысьӧн, и психологӧн, а уна сикас гаж-аддзысьлӧм нуӧдігӧн тшӧтш и актёрӧн да режиссёрӧн. А ичӧт лыддьысьысьяскӧд торйӧн нин кажитчӧ уджавны, ӧд найӧ пыр зільӧны козьнавны шань да бур сьӧлӧмкылӧмъяс.
Колӧ пасйыны, Ольга Александровна аслас уджын пуктӧ ыджыд пай коми кыв сӧвмӧдӧмӧ, пыр зільӧ дасьтыны-нуӧдны посниуловкӧд кутшӧмкӧ уджтас. Зэв нимкодь, мый водзмӧстчысь ань уна во нин ёртасьӧ «Коми йӧзӧдчан керкакӧд», тшӧкыда вӧзйӧ ӧтув нуӧдны конкурс-аддзысьлӧмъяс.
Галина МАКАРОВА.
Снимокыс авторлӧн.