Таисия Рочева уджалӧ Сыктывкарса администрацияысь велӧдан управлениеын том йӧзлӧн политика нырвизьын.
Университетын велӧдчигӧн на ныв пырӧдчӧма быдсикас уджӧ: водзмӧстчӧма студсӧветын, волонтёралӧма, котыртлӧма гажъяс. Сэсся веськалӧма «Волонтёры Победы» котырӧ да юркарса том йӧзлӧн сӧветӧ. Тані Таисияӧс казялӧмаӧсь да корӧмаӧсь уджавны управлениеӧ. Нылӧс позьӧ шуны шуда мортӧн, ӧд мый сылы вӧлӧм кажитчӧ сьӧлӧмсяньыс вӧчны – сійӧ и лоӧма шӧр уджнас.
–Медводдзаысь «Северный десант» акцияӧ пырӧдчи 2017 воын, – казьтылӧ Таисия. – Ёна жӧ кажитчис! 2018 воын бара жӧ артмис сэні водзмӧстчыны. Сэсся велӧдчӧмӧс помалі да, чайті, та вылын менам «десантыс» помасис жӧ. Но менӧ бӧрйисны Коми Республикаын акцияӧн юрнуӧдысьӧн… И со, куим во нин нуӧда-котырта тайӧ уджсӧ.
Отсалас «Войвывса десант»
Томуловӧс патриотъясӧн быдтан «Северный десант» акция Коми Республикаын котыртлӧны 2017 восянь. Тайӧ гажыс — «Снежный десант» ставроссияса акциялӧн юкӧн.
Тавося январь-мартын волонтёръяс ветлӧмаӧсь республикаса 12 сикт-грездӧ: Кулӧмдін районса Зимстанӧ, Улыс Вочӧ, Керчомъяӧ да Кулӧмдінӧ; Емдін районса Зӧвсьӧртӧ, Лесобазаӧ, Гамӧ; Удораса Чимӧ, Благоевӧ да Йӧртымдінӧ; Кӧрткерӧсса Намӧ да Мордінӧ. Томулов отсалӧмаӧсь ветеранъяслы, тылын уджалысьяслы да вермытӧм йӧзлы. Зыртӧмаӧсь памятникъяс дорысь, челядь ворсанінъясысь лым; пелькӧдчӧмаӧсь бать-мамтӧм челядьӧс видзанінын, культура керкаын, вичкоын; поткӧдлӧмаӧсь детсадлы пес, мавтӧмаӧсь стенъяс, библиотекаын дзоньталӧмаӧсь небӧгъяс.
Уджлы сиӧм акцияӧ таво пырӧдчӧма нёль отряд: «Шонді», «Пера-багатыр», «Биармия» да «Вӧрса». Донъялысьяс сэтчӧ бӧрйӧмаӧсь 51 волонтёрӧс. Сикт-грездъясын отсасьӧмаӧсь абу сӧмын миян республикаысь студентъяс да том войтыр, но и Архангельск обласьтысь да Карелияысь томулов.
Акция котыртысьяс пасйисны, мый абу быд районӧ таво удайтчӧма веськавны: ӧти-кӧ, пандемия ыджыдалӧм понда, мӧд-кӧ, торъя районъясын абу вӧлӧмаӧсь дасьӧсь овмӧдны уна йӧзтӧ, а коймӧд-кӧ, мукӧд сикт-грезд костын и туйыс абу вӧлӧма.
—Мытшӧдъяс вӧліны жӧ, — висьталіс Таисия Рочева, Коми Республикаын акцияӧн юрнуӧдысь. — Тшӧкыда ветеранъяс, пенсионеръяс полӧны тӧдтӧм волонтёръясысь, абу дасьӧсь отсӧгсӧ корны. Водзӧ вылӧ колӧ бурджыка юӧртны налы «Северный десант» йылысь. Овлӧ, мый торъя районъясын сетӧны уджсӧ, кыдз шуласны, «галочка» ради — тшӧктасны зыртчыны-идрасьны сэні, кӧні эмӧсь нин торъя уджалысьяс, либӧ сетасны вӧчны ковтӧм удж. Татшӧмыс этша, но эм жӧ. Ми ӧд районӧ отсасьны локтам, а ог сӧмын петкӧдчӧм ради туйӧ петӧ.
Волонтёръяс тӧдчӧдӧны, мый оз тырмы зыр. Локтан воын пӧ проектсӧ грант вылӧ гижигӧн сметаӧ быть содтам и зыр ньӧбӧмсӧ.
Отсӧг сетӧм кындзи томулов котыртӧмаӧсь сиктса йӧзлы уна аддзысьлӧм-гаж: дасьтӧмаӧсь челядьлы мастер-класс, ордйысьӧм-ворсӧм, концерт. Восьса урокъяс дырйи сёрнитӧмаӧсь университет-колледжын велӧдчӧм, студотрядъясын удж нуӧдӧм да проектъяс гижӧм йылысь.
—Ми дасьӧсь котыртны ставсӧ, мый корасны йӧзыс, — пасйис Таисия Николаевна. — Век зілям корсьны выльтор, кӧсъям туявны мытшӧдъяс да корсьны петан туйяс. Таво ми сетім отсӧгсӧ куим сюрсысь унджык мортлы.
«Северный десант» акция 2020 воын лоӧма вермысьӧн «Росмолодёжлӧн» сьӧма грантын.
—Ыджыд аттьӧ меставывса администрацияяслы, школаяслы, культура керкаяслы акциясӧ збыльмӧдны отсалӧмысь, — тӧдчӧдіс Таисия Рочева. — Сиктса йӧз миянӧс зэв пӧся вочаалісны, а налӧн шаньлуныс ёнджыка на ышӧдӧ и водзӧ зільджыка уджавны. Ставӧн корӧны волыны нӧшта, а сідзкӧ, ог весьшӧрӧ тайӧ уджсӧ котыртӧй. Миян шӧр могным ӧд абу сӧмын отсасьны да гаж нуӧдны, но и ыззьӧдны томуловӧс мыйкӧ буртор вӧчӧм вылӧ! И збыльысь, лысьӧмным удж бӧрти висьӧ, но руным кыпыд, и ловнымлы долыд!
Ирина Терентьева.
Снимокъясыс «Вконтактеын» «Северный десант» группаысь.