Рытыв-Войвылын  Коми – нёльӧд

Москваын аддзысьлігӧн республикаса юралысь Владимир Уйба да Россияса минпромторгӧн веськӧдлысь Денис Мантуров донъялісны Комиын промышленносьт сӧвмӧдан позянлунъяс.

Владимир Уйба аттьӧаліс странаса минпромторгын зільысьясӧс республикаса промышленносьт ёнмӧдӧм-паськӧдӧм вӧсна тӧждысьӧмысь. Рытыв-Войвыв кытшын регионса сідз шусяна валӧвӧй прӧдукция серти Коми босьтӧ нёльӧд места.

Республикаса экономика подуласьӧ мупытшкӧсса озырлун – мусир, биару, из шом – перйӧм вылӧ. Ставнас жӧ Комиын сӧвмӧдӧны промышленносьтлысь комын сайӧ юкӧн, но век жӧ производстволӧн матӧ 80 прӧчентыс – тайӧ энергетика комплекс да вӧр, вӧр обработайтан, целлюлоза да кабала вӧчан промышленносьтъяс.

Комиын вӧр промышленносьтлӧн тӧдчанлуныс ыджыд. Тайӧ юкӧнас 2008 восянь збыльмӧдӧны 112,9 миллиард шайт дон инвестицияа 16 уджтас.

Проектъяслысь вынйӧрсӧ артыштӧма 16,7 миллион кубометр вӧр переработайтӧм вылӧ.

Инвестицияа уджтасъяссӧ веськӧдӧма тьӧс-плака, целлюлоза, кабала, фанера, МДФ, брус, пеллет да мукӧд прӧдукция вӧчӧм вылӧ. Тырвыйӧ нин збыльмӧдӧма квайт уджтас: «Монди Сыктывкарса ЛПК»-ын, «1-ӧд номера лесозавод», «ПечораЭнергоРесурс», «Лузалес», «Зӧв-сьӧртса ЛПК», «Промтех-инвест» предприятиеясын. Матысса кадӧ эштӧдасны нӧшта нёль проект серти став уджсӧ.

Тайӧ аддзысьлӧм дырйиыс сёрниыс вӧлі тшӧтш Комиын промышленно-производственнӧй тэчаснога торъя экономическӧй зона лӧсьӧдӧм йылысь.

–Вӧр переработайтан юкӧн сетӧ позянлун ӧддзӧдны Комиын экономика сӧвмӧдӧмсӧ, – пасйис Владимир Уйба. – Регыдъя кадӧн республикаса правительстволы колӧ вӧчны став позянасӧ, медым регионын воссисны выль предприятиеяс, кӧні вӧрсӧ кутасны шыбластӧг переработайтны да быд кубометрысь унджык сьӧм нажӧвитны. Та могысь и колӧ лӧсьӧдны торъя экономическӧй зонасӧ. /ткымын регионын татшӧмыс эм нин. Эска, Россияса минпромторглӧн отсӧгӧн да республикаса вӧр предприятиеяслӧн водзмӧстчӧмӧн ми пӧртам олӧмӧ тайӧ могсӧ.

Денис Мантуровлӧн кывъяс серти, Комиын торъя экономическӧй зона лӧсьӧдӧмыс отсалас корсьны регионӧ унджык инвестиция.

–Россияса минпромторг матысса кадӧ нин донъялас республикалысь вӧзйӧмсӧ да видлалас Комиын индустриальнӧй парк либӧ промышленнӧй технопарк стрӧитӧмсӧ сьӧмӧн могмӧдӧм йылысь юалӧмсӧ, – висьталіс министр.

Сідзжӧ Денис Мантуров пасйис, мый Комиын промышленносьт вочасӧн сӧвмӧ, да кӧсйысис, мый министерствоыс и водзӧ кутас отсасьны республикалы.

Снимокыс ӧтуввезйысь.

Рытыв-Войвылын  Коми – нёльӧд

«Коми му» газетысь, кодӧс позьӧ судзӧдны пошта пыр, позьӧ ньӧбны «Ордым» лавкаын. Медым лыддьыны электроннӧй версия, личкӧй татчӧ. Эмӧсь кӧ юалӧмъяс, гижӧй komi-kerka@ya.ru.

Пролистать наверх