«Комиыд и Филиппиныын коми» социальнӧй тӧдчанлуна гранта проект серти талун тӧдмӧдам газет лыддьысьӧс Наталия Нацевакӧд, Изьваса нывкӧд, кодӧс олан туйыс вайӧдіс Македонияӧдз.
Наталияӧс муртса помнита школа кадсянь на. Кыкнанным помавлім Красноборса школа, сӧмын, кор ме велӧдчи начальнӧй классын на, ныв йӧктіс нин аслас выпускнӧй рыт вылын.
Наталия Ануфриева чужис-быдмис Красноборын. Школа помалӧм бӧрын пырис велӧдчыны Сыктывкарса вӧр институтӧ. Бӧръя курсъясас нин заводитӧма менеджеравны ресторанын.
–Комиын колис сӧмын Алина чойӧ, сійӧ олӧ Ухтаын, сэні и уджалӧ бухгалтерӧн, – висьталӧ Наталия. – Бать-мамӧй водз кувсисны.
Тӧлысь кежлӧ Македонияӧ
Институт помалӧм бӧрас Санкт-Петербургӧ ас дорас сійӧс корӧма Ирина нывъёртыс. Тайӧ гожӧмнас Наталия чойыскӧд мунӧмаӧсь шойччыны Черногорияӧ, и сэні пӧ, кыдз шуласны, судьбаӧс паныдалі, тӧдмаси верӧспукӧд.
–Казьтыла тайӧ кадсӧ да, сьӧлӧмӧй долыда топавлӧ, – телефон пыр, кыла, нюмъёвтіс вомъёртӧй.
Но шойччан кадыс помасьӧма, да ныв бӧр локтӧма Питерӧ, босьтчӧма ресторанын тӧдса нин уджӧ. А регыд войвыв карӧ воӧма Миля верӧс-пуыс. Корӧма ас дорас Македонияӧ – олыштан пӧ тӧлысь кымын, видзӧдлан менсьым чужанінӧс, гашкӧ, кажитчас.
–Ме и кольччи. Петі верӧс сайӧ, венчайтчим, чужтім челядь, – водзӧ нуӧдӧ сёрнисӧ Наталия. – Пиукӧс шуӧны Кирил, сылы 6 арӧс, велӧдчӧ первой классын. Милена нылукӧй 3 арӧса. Кыкнанныслы нимсӧ бӧрйим православнӧйӧс, медым и рочьяслы, и македонечьяслы лӧсялас.
Удж вылӧ инасьны
зэв сьӧкыд
Наталия кутӧ горт овмӧссӧ, быдтӧ челядьсӧ. Чӧскыда пусьӧ-пӧжасьӧ, весиг кулинарнӧй шоуясын сійӧс снимайтлӧмаӧсь да телевизор пыр петкӧдлӧмаӧсь.
–Пырся удж менам абу на, – водзӧ висьтасьӧ сійӧ. – Да и веськыда кӧ, ог ёна тэрмась, ныв-пиӧй ичӧтӧсь на да. Ӧні зіля эскӧдны Македонияын ассьым экономическӧй факультетса дипломӧс. Удж вылӧ инасьны тані зэв сьӧкыд, ӧд странаыс абу ыджыд да уджаланіныс этша.
Олӧ вомъёртӧй Велес карын, сэтысянь Скопье юркарӧдзыс машинаӧн колӧ час мунны. А странаыс Наталиялы ёна кажитчӧма медводдза лунъяссяньыс. Ичӧт, но мичлуныс тані уна.
Лунвыв гожӧм
Македонияын гожӧмыс зэв жар, и та дорӧ войвыв мортыдлы велавны жӧ коліс.
–Гаж сайын вермӧ лоны І400С, а коркӧ, помнита, и І500С вӧлі. Татшӧм жарнас некутшӧм кондиционер оз отсав. Эг на велав татчӧс гожӧм дорас, да быттьӧ ёнасӧ ог и виччысь сылысь воӧмсӧ, – юксьӧ Наталия. – А тӧлыс кӧдзыд, кӧть эськӧ сӧмын -3 градусӧдз и ыркавлӧ. Но тані сійӧ Изьваса -20 градусысь ёна кӧдзыдджык.
Македония озыр гӧраясӧн, найӧ гӧгӧрбок, а вӧрыс тані, мӧдарӧ, зэв этша. И тайӧ, дерт, зэв аслыспӧлӧс мичлун. Туристъяс пӧвстын медся нималӧ Охрид карбердса татшӧм жӧ нима ты. Сэні тшӧкыда позьӧ кывны роч сёрни.
Журнал отсӧгӧн
Медся сьӧкыдыс вӧлӧма, дерт, кывсӧ велӧдны.
–Но во мысти менӧ ёна нин ошкисны, – ошйысьыштіс вомъёртӧй. – Ӧтнам нин верми ветлыны поликлиникаӧ, салонӧ, мукӧдлаӧ. Верӧсӧйлӧн кыв боксянь отсӧгыс эз нин ковмы.
Кывсӧ велӧдны Наталия заводитӧма журналъяссянь. Ньӧби пӧ журнал да дышӧдчытӧг сьӧрсьӧн-бӧрсьӧн сэтысь быд кыв зіли вуджӧдны. Кор мӧд петас босьті киӧ, зэв уна кыв нин вӧлі тӧдса.
Миля да сылӧн рӧдвужыс ёна жӧ отсасьӧмаӧсь Наталиялы кывсӧ велӧдны, сёрнитӧмаӧсь сыкӧд сӧмын македонскӧйӧн. Верӧсыс зэв бура тӧдӧ и роч кывсӧ.
Ӧні Изьваса аньлысь гежӧд морт нин юавлӧ, татчӧс сійӧ али абу. Кодсюрӧ сӧмын акцент сертиыс вермас гӧгӧрвоны, мый сійӧ Россияысь, Украинаысь либӧ кутшӧмкӧ мӧд вӧвлӧм сӧветскӧй странаысь.
Куим кывъя «рок»
–Гортын верӧскӧд сёрнитам рочӧн и македонскӧйӧн, а челядькӧд зіля рочасьны, – висьталӧ Наталия. – Пиӧй рочнас бура нин сёрнитӧ, нылукӧй гӧгӧрвоӧ жӧ. Шуам, тшӧкта сылы ӧдзӧс пӧдлавны – пыр и вӧчас тайӧс. А коми кывнас ме тані зэв нин гежӧда вӧдитча.
Коминас Наталия сӧмын Красноборысь Оксана нывъёртыскӧд и сёрнитлӧ. Ань тӧдчӧдӧ, мый македонскӧй кывлӧн рочыскӧд ӧткодьлуныс зэв уна, но акцентыс коми кодь. Та понда пӧ юрам куим кывъя «рок».
Гуся инъяс
Чужанінас вомъёртӧй важӧн нин абу вӧлӧма. Верӧс сайӧ петӧма да, сыкӧд волӧмаӧсь. А ичӧт челядькӧд пӧ ог лысьт кузь туйӧ петны – ӧд Москваӧдз колӧ кык самолётӧн лэбны, а сэсся кык лун поездӧн мунны да машинаӧн на нӧшта.
–Туйыс кузь и зэв дона, – шуис Наталия. – Торйӧн нин нёль морт вылӧ артыштӧмӧн.
Ань ӧнӧдз на помнитӧ Красноборын ассьыс гуся инъяссӧ. Чужан керка мышкас вӧлӧма неыджыд эрд, а сы сайын сулалӧма пашкыр кыдз пу. Син водзам на пӧ, кыдзи ёртъяскӧд кавшасьлім сэтчӧ да вывсяньыс нимкодясим сиктнаным. Зэв шуда кад пӧ вӧлі.
–Ёна гажтӧмтча челядьдырся ёртъясысь, кодъяс ӧні Красноборын да Комиын мукӧд сикт-карын олӧны, – висьталіс Наталия. – Дерт, ставныслӧн нин семья да челядь.
Кольӧм во Нацевъяс лӧсьӧдчылӧмаӧсь нин Комиӧ волыны, но пандемияыд торкӧма. Шогӧ абу усьӧмаӧсь, коркӧ пӧ да коронавируссьыд мынтӧдчам.
–И сэки быть вайӧдла чужанінӧ челядьӧс, – асьсӧ тшӧтш эскӧдіс ань. – Тӧдмӧда найӧс аслам радейтана гуся инъясӧн. И чайта, зэв бура коллялам сэні кадсӧ.
* * *
Сёрни помын Наталия ыстіс пӧсь чолӧм Коми Республикалы да торйӧн нин Изьва районлы да чужан сиктыслы. Сійӧ пӧ нэм кежлӧ йиджис лолам да сьӧлӧмам, и тшӧкыда вӧтӧн аддзывла.
Ирина Терентьева.
Снимокъясыс Наталия НацевалӦн гортса архивысь.