«Коми му» лыддьысьяслы Игорь Колесовлӧн нимыс бура тӧдса, уна во нин тайӧ енбиа мортыс ёртасьӧ миянкӧд. Ен сыкӧд, ёна жӧ нин бур да интереснӧй гижӧдъяс сылӧн артмӧны! И буретш сійӧс шуим 2020 воӧ миян газетса медбур внештатнӧй авторӧн.
Чужӧма-быдмӧма Игорь Колесов Изьва сиктын. 1990 воын помалӧма КГПИ-ысь географо-биологическӧй факультет.
Гижны босьтчӧма кольӧм нэмся ӧкмысдасӧд воясӧ – буретш сэки заводитӧмаӧсь йӧзӧдны районса газетын сылысь медводдза гижӧдъяссӧ. И со кызь сайӧ во нин сійӧ зільӧ корреспондентӧн Изьваса «Новый Север» газетын.
Лариса радейтана пӧлыскӧд чужтӧмаӧсь-быдтӧмаӧсь ныла-пиаӧс: Валерийлы 34 арӧс, Ксениялы – 21. Ӧні нин нимкодясьӧны 5 арӧса Ульяна внучкаӧн.
–«Коми му» газетын зільысьяс вӧчӧны йӧзлы колана да тӧдчана удж, – висьталӧ Игорь. – Видзӧй да водзӧ нимӧдӧй коми кыв. Мед эськӧ лыддьысьысьяс тайӧс тшӧтш гӧгӧрвоисны да донъялісны тіянӧс сӧмын бур боксянь да унджыкӧн судзӧдісны коми петас.
Галина МАКАРОВА.
Снимокыс Игорь Колесовлӧн гортса архивысь.