Сыктывдін районса Ыб сиктын «Вичкодор» ТОС вӧлі лӧсьӧдӧма 2017 воын. Миян котырӧ ӧтувтчисны зіль да уджач йӧз. И тайӧ воас нин конкурсӧ пырӧдчӧмӧн районса администрациялӧн отсӧгӧн збыльмӧдім пу тротуар вӧчӧм кузя проект. Мӧд вонас администрациялӧн ышӧдӧмӧн жӧ кыпӧдім челядьлы ворсан площадка.
Миян асвеськӧдлан котырын водзмӧстчысьяс окотапырысь пырӧдчӧны Коми Республикаса экономика министерстволӧн, а сідзжӧ РФ-са президентлӧн гранта конкурсъясӧ. 2019 воӧдз асланым 6 проект серти Ыбын сувтӧдім вын-эбӧс песан ывлавывса тренажёръяс, лӧсьӧдім футболӧн да волейболӧн ворсан, спортын ордйысьӧмъяс нуӧдан площадкаяс. Ставыс тайӧ зэв колана сиктын олысьяслы, торйӧн нин томуловлы.
2020 воын шуим паськӧдыштны уджалан нырвизьнымӧс да дасьтім «Ыб сиктса почёта йӧз» да «Патриотъясӧс воспитайтан «Нам не дано забыть!» клуб» проектъяс.
Кыдз тыдовтчис, ми асьным чужан сиктын ог тӧдӧй ни почёта олысьясӧс, ни война кадӧ тылын зільысьясӧс. Гоз-мӧдӧс сӧмын, гашкӧ. А томулов и на йылысь оз тӧдны.
Та вӧсна кыкнан проект сертиыс кутам туявны почёта олысьяслысь да тылын зільысьяслысь олан туйсӧ, а сэсся йӧзӧдны на йылысь видеороликъяс.
Кольӧм во гожӧмнас лӧсьӧдім Ыб сиктса почёта йӧзлы сиӧм стенд. Тайӧ проектсӧ ошкисны Сыктывдін районса администрацияын. «Томуловӧс патриотъясӧн воспитайтан «Нам не дано забыть!» клуб» проектыс тӧдчанаджык, збыльмӧднысӧ колӧ унджык сьӧм да, пырӧдчим президентлӧн гранта конкурсӧ, кӧні лоим вермысьяс лыдын. Проект сертиыс шуим быд тӧлысь нуӧдны чужан му нимӧдан чукӧртчылӧм-аддзысьлӧмъяс, ньӧбны колана небӧгъяс, водзӧ туявны война кадӧ тылын зільысьяслысь олӧмсӧ. Тайӧ уджас босьтчисны и Ыбса школаын велӧдысьяс да велӧдчысьяс. И позьӧ нин вӧчны медводдза кывкӧртӧдъяс. 4-ӧд классысь Анастасия Колегова да Игнат Мартышев босьтісны «Менам чужанін — Сыктывдін» 17-ӧд районса конференцияын асланыс арлыдаяс пӧвстын медводдза места. Найӧ тӧдмӧдісны тылын уджалысь Ариана Григорьевна Муравьёвалӧн олан туйӧн.
Ыбын зэв уна енбиа йӧзыс, тшӧтш и гижысьяс, кывбуралысьяс, литература туялысьяс… Ми лыддям, мый колӧ пыдісяньджык тӧдмӧдны ныв-зонмӧс налӧн олан туйӧн да творчествоӧн. Дасьтім «О той земле, где ты родился» проект да ыстім сійӧс президентлӧн гранта конкурс вылӧ. Зэв нимкодь, мый и тайӧ уджтасыс лоис медбуръяс лыдын.
Таво томуловкӧд кутам туявны Владимир Безносиковлысь, Анатолий Микушевлысь, Валерий Мартыновлысь да Егор Колеговлысь творчествосӧ. Ыбса гижысьяс лыдӧ пыртім и нималана йӧзӧс, кодъяслӧн дачаясыс миян сиктын. Тайӧ Аркадий Климов, Елена Габова да Пётр Столповский.
Аддзысьлӧмъяссӧ кутам нуӧдны сиктса библиотекаын. Медся тӧдчанаӧн лоӧ Сыктывдін районса краеведъяслӧн «Творим историю вместе» слёт, кодӧс котыртлам таво октябрын.
Гожӧмнас библиотека дорӧ сувтӧдам «Книжный дворик «Литераторы села Ыб» арт-объект. Сэні лӧсьӧдам гижысьяс йылысь стендъяс, сцена-площадка, вевта качай, сувтӧдам кӧрт лабичьяс, садитам дзоридзьяс. Таысь кындзи кӧсъям лэдзны сиктса гижысьяс йылысь сборник да видеороликъяс.
Содтӧд колӧ пасйыны, мый ёна отсасьӧны миян асвеськӧдлан котырлы сиктын олысьяс, районса библиотекаясын да музейясын зільысьяс, Ыбса администрацияӧн веськӧдлысьяс.
И ӧтув зільӧмӧн ставыс миян артмӧ. Кольӧм 4 воӧн збыльмӧдім 8 проект. Таво пӧртам олӧмӧ нӧшта ӧтиӧс.
Марина Колегова.