Комиын крестьянскӧй (фермер) овмӧс вӧдитысьяс да видз-му кооперативъясын зільысьяс видеоконференция вылӧ чукӧртчылӧмӧн вӧчисны 2020 воын асланыс уджлы кывкӧртӧд. Та дырйи вӧлі вайӧдӧма вель уна лыдпас.
И сідз, тавося январын регионын артавсьӧма 244 фермер овмӧс. Сы лыдын медся уна – Изьва районын – 16 прӧчент, Кулӧмдін районын – 11, Емдінын – 10 да Чилимдінын – 9 прӧчент.
Видз-му вӧдитысьяс да скӧт видзысьяс вӧчӧмаӧсь 458 миллионысь унджык шайт дон прӧдукция, сы лыдын матӧ 386 миллион шайт доныс – йӧв-яйысь сёян-юан да 73 миллион шайт доныс – град выв пуктасысь вӧлӧга.
Республикаса фермеръяслӧн уджын медшӧр нырвизьыс – скӧт видзӧм. Найӧн дӧзьӧритӧны 21 прӧчент мӧссӧ, лысьтӧны 14% йӧвсӧ.
Яй вылӧ быдтӧм скӧтсӧ да пӧткасӧ вузалӧмаӧсь 827 тонна, йӧвсӧ – 8,0 сюрс тонна. Гӧрӧмаӧсь-кӧдзӧмаӧсь 4,2 сюрс гектар угоддьӧ. Кызвыннас, стӧчджыка кӧ 90 прӧчент му-видз вылас, быдтӧны скӧтлы кӧрым. Картупель улӧ торйӧдлӧмаӧсь 3-6 да град выв пуктас быдтыны – ӧти прӧчент мусӧ.
Бӧръя вит вонас угоддьӧяссӧ содтӧмаӧсь 34 прӧчент, медым быдтыны скӧтлы унджык кӧрым.
Таво кооперативъяс ньӧбӧмаӧсь асшӧр овмӧс кутысьяслысь 10 тонна яй, 300 тонна йӧв, а сідзжӧ 80 гӧгӧр тонна чери.
–Коми Республика окотапырысь пырӧдчӧ «Агростартап» уджтасӧ, кодӧс дасьтӧмаӧсь «Малое и среднее предпринимательство и поддержка индивидуальной предпринимательской инициативы» национальнӧй проект серти. «Агростартап» уджтассӧ збыльмӧдӧны кӧкъямыс фермер овмӧсын. Тайӧ нырвизяс жӧ зільӧны гортса пӧтка рӧдмӧдысьяс.
Видз-му овмӧсын асшӧр уджын водзмӧстчысьяслы вичмӧдӧма грантъяс весьтӧ 25 миллион шайт. Фермеръяс кӧсйӧны ньӧбны бур пӧрӧдаа 158 юр скӧт, 17 выль техника. Проектъясӧ босьтчӧмӧн жӧ мӧвпалӧны могмӧдны уджӧн содтӧд 39 мортӧс, – пасйис конференция вылӧ чукӧртчӧмаяс водзын сёрнитігас Коми Республикаысь видз-му овмӧсса министрӧс вежысь, главнӧй государственнӧй ветеринарнӧй инспектор Илья Суворов.
Тавося декабрь 1 лунӧдз кырымалӧма государствосянь фермеръяслы сьӧма отсӧг (232 миллион шайт) вичмӧдӧм йылысь 215 сёрнитчӧм (кольӧм во 189 сёрнитчӧм серти татшӧм кокньӧдыс артавсьӧма 193 миллион шайт).
Пасъям, видз-му овмӧс вӧдитысьяслы государствосянь отсӧгыс воӧ грантъяс весьтӧ сійӧ либӧ мӧд конкурсӧ налӧн пырӧдчӧм бӧрын. Бӧръя кӧкъямыс воӧн татшӧм ногӧн налы вичмӧма 328,7 миллион шайт. Тайӧ сетӧма позянлун збыльмӧдны сідз шусяна семейнӧй ферма кутысьяслы 30, асшӧр уджӧ сӧмын на босьтчысь фермеръяслы 56 да кооператив сӧвмӧдысьяслы 14 проект.
Видз-му овмӧсын зільысьяслӧн кывъяс серти, государствосянь отсӧгыс зэв колана, сы весьтӧ найӧ кыпӧдӧны выль гид-карта, дзоньталӧны важсӧ, ньӧбӧны ӧнія оборудование-техника, а сідзкӧ, и содӧ налӧн позянлуныс босьтны унджык йӧв да яй. И, дерт жӧ, кокньыдджык лоӧ уджавнысӧ.