Республикаса юралысь Владимир Уйба аддзысьліс вермытӧм челядя бать-мамлӧн ставроссияса котырысь Комиын юкӧнӧн веськӧдлысь Юлия Белоусовакӧд, Коми Республикаын челядьлысь инӧдъяс дорйысь Татьяна Козловакӧд, регионса правительствоӧн веськӧдлысьӧс вежысь Лариса Карачёвакӧд, министерство-ведомствоын, медицинаын да сьӧм водзӧсалан организацияясын уджалысьяскӧд. Чукӧртчылӧм дырйиыс сёрниыс вӧлі вермытӧм йӧзлы отсӧг сетӧм да налысь инӧдъяс дорйӧм йылысь.
–Вермытӧмлысь правояс дорйӧмӧ ассьыныс пай колӧ пуктыны и власьт тэчаслы, и об- щественнӧй котыръяслы, – висьталіс Владимир Уйба. – На вӧсна тӧждысьны колӧ сьӧлӧмсяньыд, тырвыйӧ гӧгӧрвоны, мый тайӧ – зэв тӧдчана мог.
Юлия Белоусова тӧдмӧдіс чукӧртчӧмаясӧс общественнӧй котырыслӧн проектъясӧн. Найӧс дасьтӧма вермытӧм челядя семьяяслы отсалӧм да налысь инӧдъяссӧ дорйӧм могысь, мед тыр арлыдтӧм инвалидъясӧс эз ӧтдортны йӧзкотырын.
Сідз, 2020 вося сентябрь 1 лунӧ Ухтаын восьтӧмаӧсь торъя приёмнӧй, и кык тӧлысьнас сэтчӧ шыӧдчылӧмаӧсь нин кӧкъямысдас сайӧ семьяысь, кӧні быдмӧны вермытӧм челядь.
–Татшӧм ныв-зонмыслӧн бать-мамлӧн, опекаӧ босьтысьяслӧн тӧжд-могыс уна, – пасйис Ольга Белоусова. – И отсавны налы колӧ нюжмасьтӧг, та вӧсна и корам власьт тэчасын зільысьясӧс тшӧтш пырӧдчыны тайӧ уджас.
Аддзысьлӧм дырйиыс видлалісны республикаын вермытӧмлысь олӧмсӧ бурмӧдӧм кузя вӧзйӧмъяссӧ, вӧлі пасйӧма, мый колӧ содтыны регионын реабилитация шӧринъяслысь да сьӧкыда висьысьяслы отсалан учреждениеяслысь лыдсӧ.