Матӧ кызь во нин Сыктывкарын нуӧдсьӧ Коми Республикаса канму символикаӧн, каналан кывъясӧн да коми серӧн учрежденньӧяс медбура мичмӧдӧм кузя конкурс.
Таво тшӧтш май тӧлыссянь август 22 лунӧдз юркарса велӧдчанiнъяс, челядь видзанiнъяс, ас вылӧ уджалысьяс да мукӧд сикас учреждениеяс пырӧдчисны тайӧ конкурс-ордйысьӧмас.
Тайӧ конкурсыслӧн медшӧр могыс – сӧвмӧдны юркарын сiдз шусяна национальнӧй колоритсӧ, петкӧдлыны сылысь коми чужӧмбансӧ.
Сыктывкарса администрациялӧн да сэні культура юкӧнӧн веськӧдланiнлӧн водзмӧстчӧмӧн сійӧс котыртлӧны Сыктывкарса коми культура шӧрин да «Коми войтыр» дiнмукостса ӧтйӧза ӧтмунӧмлӧн Сыктывкарса представительство.
Положение серти, карлысь коми чужӧмбансӧ позис петкӧдлыны 5 нимпасын: «Коми му кузя ме муна» («Экскурсия по земле Коми»); «Медбур лыддьысян юкӧн» («Лучший книжный уголок»); «Медбур коми жыр» («Лучший уголок коми избы»); «Коми кывйӧн вӧдитчӧм» («Использование коми языка в оформлении»); «Брендын коми визь» («Этноэлементы как часть бренда»).
Таво конкурс вылӧ воис 16 шыӧдчӧм. На лыдысь 11-ыс – челядь видзанiнъяссянь, 4 велӧдчанiнсянь да 1 ас вылӧ уджалыссянь. Дерт, абу вывтi уна, но жюрилы ковмис вель дыр бӧрйысьны.
Уджъяссӧ донъялан котырӧн юрнуӧдiс «Коми войтырлӧн» Сыктывкарса представительствоӧн веськӧдлысь Марина Серафимовна Федина.
Сылы отсасисны «Чушканзi» журналса шӧр редактор Анжелика Геннадьевна Елфимова да Сыктывкарса администрацияысь культура юкӧнӧн веськӧдланiнын зiльысь Татьяна Михайловна Агаркова.
И со вермысьясыс!
«Медбур лыддьысян юкӧн» номинацияын ставнысӧ ордйис 43-ӧд номера детсадлӧн 2-ӧд корпус. Веськӧдлысьыс – Юлия Валерьевна Смирнова, содтӧд тӧдӧмлун сетысь педагог – Елена Евгеньевна Карагулина. Проектсӧ дасьтысьыс да сійӧн веськӧдлысьыс физкультура кузя инструктор Алёна Николаевна Мингалёва. Кужысь киясын ловзьӧма мича мойд! Садйын зільысьяс дасьтӧмаӧсь аслыспӧлӧс ворсан-лыддьысянiн – кӧлеса вылын ичӧтик коми керка. А пытшкас мыйыс сӧмын абу! И библиотека, и театр, и фотозона, и уна мукӧдтор. Быд юкӧн нимтӧма комиӧн и рочӧн. Эм тані и уна рӧма пу, и коми серӧн мичмӧдӧм мойдвывса сундук. Кудъяс поздысьӧмаӧсь коми мойдъясысь пемӧс-геройяс.
«Медбур коми жыр» дасьтӧмаӧсь 5-ӧд номера челядь видзанiнын. Веськӧдлысьыс – Светлана Николаевна Романенко. Мича жырсӧ лӧсьӧдӧмаӧсь во сайын. Отсасьӧмаӧсь став кагульничаыс, республика пасьталаысь пӧ ӧктысим. Водзмӧстчысь войтыр вайӧмаӧсь пӧль-пӧчсянь на кольӧм эмбур да ас киӧн ловзьӧдӧмаӧсь коми керкалысь пытшкӧссӧ. Сiдзжӧ дасьтӧмаӧсь «Путешествие в коми избу» пособие. И быд лун сэнi тӧдмӧдӧны дзолюкъясӧс коми культураӧн да пестӧны Коми му дорӧ муслун.
«Коми му кузя ме муна» нимпасын вермис 53-ӧд номера детсад. Веськӧдлысьыс – Светлана Павловна Косарева, медшӧр кагульничаыс – Снежана Равиловна Рупняк. Татчӧс зiльысьяс нуӧдӧны коми культура видзӧм да сӧвмӧдӧм могысь ыджыд удж. Дасьтӧмаӧсь «Коми край – родной, любимый» мини-музей. Пӧртӧ
ны олӧмӧ «Радейта ме тэнӧ, ас чужан муӧй» уджтас: котыртлӧны-пасйӧны Иван лунлы, Илля лунлы да чомӧрлы сиӧм йӧзкостса гажъяс. Котыртлӧны коми сёян-юан лунъяс, коми серӧн мичмӧдӧны преник-пӧжас, узьны водтӧдiгӧн лыддьӧны дзолюкъяслы коми мойдъяс. Нимкодь, мый Сыктывкарын эмӧсь коми культурасӧ та выйӧдз пыдди пуктысьяс.
«Брендын коми визь» номинацияын медбурӧн шуӧма «Мича Райда» мичмӧдчанiн. Веськӧдлысьыс – Галина Харитонова. Кыдз и век, Галина Васильевна аслыснога, кужӧмӧн да шемӧсмӧдана пӧльыштӧ коми русӧ дзик роч уджӧ. Тавосянь «Мича Райдаӧ» волысьяс вермӧны аддзыны ассьыныс гуся мӧвпъяссӧ. Бур мастерсьыд, вӧлӧмкӧ, нинӧм он дзеб.
«Коми кывйӧн вӧдитчӧм» нимпассӧ вӧлi шуӧма киритны, сэтчӧ ыстӧм уджъясыс жебиникӧсь да. Но ми кутам лача, мый мӧд во тайӧ номинацияыс век жӧ бӧр ловзяс.
Но, кыдзи шуласны, лёктӧгыс и бурыс абу. Илля Вась нима 3-ӧд номера велӧдчанiнын зільысьяс ышӧдiсны жюриӧс урчитны торъя козин-спецприз – «Музейлысь жыр дасьтӧмын важ коми эмбурӧн вӧдитчӧмысь». Веськӧдлысьыс – Галина Васильевна Киваева; музейса жыр дасьтӧмын водзмӧстчысьыс – история велӧдысь Марина Вениаминовна Крюкова.
* * *
Конкурсын вермысьяслы вичмисны диплом да 4.000 шайта сертификат. Дипломӧн лои пасйӧма и ордйысьӧмӧ став пырӧдчысьсӧ.
Став сьӧлӧмсянь аттьӧалам конкурсантъясӧс да чолӧмалам вермысьясӧс! Ыджыд аттьӧ тiян водзмӧстчӧмысь да коми кыв да культура видзӧм-сӧвмӧдӧмысь!
Ольга Камаева,
Сыктывкарса коми культура шӧринӧн
веськӧдлысь.
Снимокъясыс Ольга Камаевалӧн
да Анна Ульяновалӧн.