Гоз-мӧд тӧлысь сайын, кор юӧртлісны, мый Комиын коронавирусӧн бара на висьмӧма куим морт, повзьӧмыдла он тӧд вӧлі, кытчӧ и воштысьны. А бӧръя кадас выльӧн висьмысьыд быд лун дас пӧв унджык, но миянлы дзик веськодь нин.
Медикъяс серти, республикаын выль пӧрӧсыд кӧвъясьлӧма квайт сюрс сайӧ мортлы нин, на пиысь матӧ вит сюрсыс бурдӧма, сизимдас квайтыс – кувсьӧма.
Лыдпасъяс серти, тайӧ каднас висьысьыс медуна вӧлӧма Воркута-Усинскын (матӧ сюрс сайӧӧн), Ухтаын – куимсё гӧгӧр морт. Неуна этшаджык Интаын, а сідзжӧ Печора, Сосногорск, Сыктывдін да Княжпогост районъясын (сё сайӧӧн). На бӧрынӧсь Луздор, Кулӧмдін, Кӧрткерӧс, Удора да Сыктыв районъяс. Сэні висьӧмсӧ аддзӧмаӧсь 89-33 мортлысь. Дасысь этшаджыкӧн нёрпалӧмаӧсь Мылдін, Койгорт, Чилимдін да Вуктыл районъясын.
А талун Сыктывкар ордйӧ став кар-районсӧ. Республика пасьталаын висьысьысь джынйыс – тані.
Но юркарын олысьясӧс тайӧ, буракӧ, ньӧти оз майшӧдлы. Карса улич вылын маскаа морттӧ гежӧда нин паныдавлан. Лавка ӧдзӧсын кӧть быдлаын, видзӧдан да, ӧшалӧ «чиршӧдлан» кабалаыд: «Вход только в масках и перчатках!», некод нин сы вылӧ оз видзӧдлы. Со «Макси» вузасянінті жӧвъялігӧн да быд пельӧсӧ нырӧс сюйлігӧн менӧ сӧмын ӧтилаын корисны маскаасьны, а сэсся некӧн некодлы мог эз вӧв.
А вот менам ёртӧй неважӧн локтіс Казаньысь да висьталӧ, кӧсйи пӧ пыравны сэтчӧс «Ашан» ыджыд вузасянінӧ, но кӧть и маскаа вӧлі, корисны нӧшта на и чуня кепысясьны.
Сыктывкарса и мукӧд кар-районъясӧ ветлан автобусъясын серпасыс лавкаясын кодь жӧ – окота кӧ, маскаась, а абу кӧ, и сытӧг мун. Сӧмын мед вӧлі вештысьӧмыд-а.
Сэсся со и республикаса юралысьлысь удж вӧчысьыд ӧтарӧ «небзьӧдӧ» карантинтӧ. Сідз, кафеяслы позьӧ нин войбыд уджавны, и спортзалъяс воссялісны…
Сэк жӧ эг нин ӧтчыдысь кывлы, мый сентябрь помас страна пасьталаын, тшӧтш и Комиын, бара на паськалас ковидыд. Да, гашкӧ пӧ, ставсӧ бӧр ковмас тупкавны, а йӧзсӧ гортаныс йӧртны.
Дерт, ог кӧ удитӧй сэтчӧдз уколасьны коронавируссьыд. Помнитанныд кӧ, вежон сайын Владимир Путин ошйысис, мый татшӧм препаратсӧ вӧчӧмаӧсь нин Н.Ф. Гамалеи нима эпидемиология да микробиология шӧринын. Нимтӧмаӧсь выль пистисӧ «Спутник V»-ӧн. Сійӧс ас вылас видлӧма нин и президентлӧн нылыс да, некутшӧм пӧ «серьёзнӧй побочнӧй эффект» оз тӧдчы.
Шӧринӧн веськӧдлысь Александр Гинцбург серти, выль вакцинасӧ йӧзыслы пондасны вӧчавны тӧлысь мысти нин, кӧть эськӧ водзтіджык ачыс Александр Леонидович шуліс, мый лекарствосӧ бура видлавны ковмас на 4-6 тӧлысь.
Анжелика Елфимова.