Майбыр лыа вылын мачасьыштны. Физкультурниклӧн лун кузя Кӧрткерӧс районса Одыбысь да Висерысь спорт радейтысьяс волісны Ыджыдвидзса ёртъясыс дорӧ, волейболасьыштам пӧ.
Висер ю бокӧ сувтӧдісны кык зіб, нюжӧдісны сетка, чукӧртісны лыасьыс ув-чаг, мед кӧмтӧг ворсігӧн эз доймыны.
Юксисны кык пельӧ, командаясӧ веськалісны быд сиктысь нывъяс и зонъяс: оз ӧд кубок вӧсна ордйысьны, а сьӧлӧмпӧт шедӧдӧны. Но ставсӧ правилӧяс серти вӧчисны. И вермысьыс лоис, а ворссьысьыс – эз: праздник лунӧ кутшӧм нӧ ворссьысь вермас лоны!..
Нӧшта на и пионерболасьны удитісны. Кӧть и шуӧны, челядьлы ворсӧм пӧ тайӧ, но винёвлуныд, сямыд ыджыд жӧ колӧ.
А бӧрас бипур вылын пузьӧдӧм чай юисны, ас йӧрын быдтӧм помидор-ӧгуречӧн чӧсмасисны. А Виктория Макарова и пӧжасьӧма на. Сэтшӧма кажитчӧма ставныслы да, мӧдысь чукӧртчылігкежлӧ пӧ бара на пӧжась.
Снимокъясыс
Марина Макаровалӧн.