Кольӧм во гожӧмнас, помнитанныд кӧ, ойдлім помасьлытӧм зэръясысь. Таво косьмим «енэжса ватӧг».
Град выв пуктасъясысь да клумбаса дзоридзьясысь ӧтдор кос да жар поводдяыд, дерт жӧ, медъёна мӧрччӧ парма-яглы.
Коми регионса вӧрын кусӧдчан шӧринысь лыдпасъяс серти, талунӧдз республикаын 639,46 гектар вылын ӧзйылӧма 62-ысь. Та кузя ми таво весиг панйим орчча Карелияӧс, кӧні биыд ыджыдалӧма 508,6 гектар вылын.
Слабог, мый кӧть неуна зэрыштіс на да, ӧзйылӧмъясыд ваймыштісны. Но биысь видзчысян кадыс нюжалас сентябрӧдз на, синоптикъяс со туналӧны жар да кос поводдятӧ.
Кусӧдчысьяс шуӧны, мый вӧрад сӧмын гоз-мӧдлаын ыпнитлӧма гымньӧвсянь, пӧжарыдлӧн жӧ унджык помкаыс – вотчысь-кыйсьысь-шойччысьяс, кодъяс кок уланыс чӧвталӧны кусӧдтӧм чигарка пом, кольӧны ас бӧрсяыс стеклӧ дозмук, оз прамӧя тыртны бипур местасӧ. А поводдяыд кӧ и водзӧ бур лоӧ, бара на зэв унаӧн уськӧдчасны вӧрад.
Но кӧть мый понда сэн вӧрыд сотчӧ, а кусӧдны сійӧс быть колӧ. А тайӧс вӧчны республикаын ёнасӧ и некодлы.
Вӧвлӧм юралысь Сергей Гапликов дырйи на «Авиалесоохранаын» зільысьяслысь удждонсӧ чинталӧмыс да уджсӧ содтӧмыс вайӧдіс сэтчӧдз, мый коркӧ нёльсё парашютист-кусӧдчысьысь сэні колис сӧмын комын кӧкъямыс. На пиысь жӧ буретш жар поводдя заводитчигас ӧні юралысьлысь удж вӧчысь Владимир Уйба кызь сизимӧс ыстіс отсӧг вылӧ Красноярск крайӧ. И тайӧ китыр мортыс лэбалӧ республика пасьта сӧмын ӧти Ан-2 самолётӧн…
Быд во кусӧдчысьяс аслыныс отсӧг вылӧ корлӧны районъясын олысьясӧс. Но доброволечыс воысь-во пыр этшаджык. Ӧд тайӧ сьӧкыд уджсӧ бертӧмысь мынтӧны часнас сӧмын 270 шайт, сэк жӧ паськӧм-сёянӧн ни ном лекарствоӧн некодӧс, кыдзи водзті вӧлі, оз могмӧдны. А ӧд лунтыр колӧ зырйӧн шенасьны да, ва кӧ орччӧн эм, 15-20 литра ва резан огнетушительӧн кусӧдчыны. Сэсся мукӧд-дырйиыс, мед веськавны коланаинӧдз, колӧ на нюрӧд ныр вылад усьтӧдз болсъявны да некымын ю вуджны, кыті биыд вермӧ ӧти здукӧн «воськовтны».
Таво вӧр дӧзьӧритӧм да кусӧдчӧм вылӧ шуӧма вичмӧдны 211 миллион шайт, 148 миллионсӧ кӧсйӧны сетны федеральнӧй бюджетысь.
Но, кыдз тыдалӧ, весиг став тайӧ сьӧмыс кӧ воис сэтчӧ, кытчӧ колӧ, вӧрса биыдлы паныд водзсасьны та мындаыд – тшаква.
Анжелика Елфимова.