Комиын тавося январсянь матӧ 3,5 сюрс семьялы, кӧні чужӧма медводдза кага, мынтӧмаӧсь федеральнӧй кудйысь быд тӧлысся сьӧм. Та могысь первой кварталын видзӧма 124,8 миллион шайт.
Казьтыштам, 2018 вося январь 1 лунсянь бать-мамлы татшӧм социальнӧй отсӧгсӧ сетны шуӧма Россияса президент Владимир Путинлӧн водзмӧстчӧм серти, а 2019 восянь тайӧс урчитӧма «Демография» национальнӧй проект вылӧ подуласьӧмӧн вынсьӧдӧм «Кага вайигӧн семьялы сьӧма отсӧг» регионса уджтасын нин.
2020 восянь татшӧм кокньӧдыс вичмӧ семьялы, кӧні морт вылӧ доходыс артавсьӧ регионас 2019 вося январь-мартын овны судзсьымӧн кык пӧвста сьӧмысь этшаджык. Содтӧд на, шуӧма мынтыны сьӧмсӧ кагалы куим арӧс тыртӧдз.
Кольӧмвося мӧд кварталын Комиын верстьӧлы овны судзсьымӧнсӧ вӧлі артыштӧма 14.868 шайт.
Таысь кык пӧв унджыкыс лоӧ 29.736 шайт. Сідзкӧ, талун медводдза кага вайӧмкӧд йитӧдын социальнӧй отсӧгла вермас шыӧдчыны гозъя, семьяаныс куим морт вылӧ артыштӧмӧн кӧ доходныс 89.208 шайтысь этшаджык.
А нывбаба кӧ абу верӧс сайын, кага чужтӧм бӧрас сылы кутасны мынтыны сьӧмсӧ, удждоныс кӧ 59.472 шайтысь абу унджык.
Регионса удж, занятосьт да йӧзӧс социальнӧя дорйӧм кузя министерствоысь специалистъяслӧн висьталӧм серти, первойсӧ семьялы сьӧма отсӧгсӧ сетасны кагалы арӧс тыртӧдзыс, сэсся бать-мамыслы колӧ шыӧдчыны, мед мынтасны дзолюкыслы кык да водзӧ – куим арӧс тыртӧдзыс.
Сэк жӧ бать-мамлы, каганыслы кӧ кольӧм во тырис 1,5 арӧс, колӧ выльысь шыӧдчыны соцучреждениеӧ дзолюкныслы кык, а сэсся куим арӧс тыртӧдз сьӧма отсӧгысла.
Тайӧ социальнӧй кокньӧдысла вермасны выльысь шыӧдчыны сідзжӧ найӧ, кодъяслы водзтіджык, кор та дырйи овны судзсьымӧн сьӧмсӧ арталӧмаӧсь 1,5 пӧвстӧн, абу шулӧмаӧсь сетнысӧ.
Колӧ сідзжӧ пасйыны, мый странаын да миян республикаын коронавирусысь видзчысьӧм могысь чорыд мераяс вынсьӧдӧмкӧд йитӧдын став сикас социальнӧй отсӧг-кокньӧдсӧ, сы лыдын и медводдза кага вайысьяслы, шуӧма водзӧ мынтыны йӧзыслӧн выльысь шыӧдчывтӧг нин.
А кодъяс медводдзаысь на кӧсйӧны тайӧс вӧчны, налы колӧ юӧртны та йылысь соцучреждениеӧ госуслугаяслӧн портал пыр либӧ мӧдӧдны кар-районса йӧзӧс социальнӧя доръян шӧринъясӧ став колана документ-кабаласӧ пошта пыр.