Тадзи вöлöм шуö менам пöрысь пöч, Эжва йывса Польеысь Тима Анна, коді кык пиöс – Митипер Васьöс да Митипер Миколайöс – ыстіс Айму вöсна Ыджыд тыш вылö. Миколай вылö похоронка воöма 1944 вося мартын. Васьöс дзебисны 1947 вося апрельын.
Малеысь Демит Öдя пöрысь ыджыд мам, коді колльöдіс верöссö – Семен Иёнинöс – война вылö, казьтывліс: «Ранитчылöм бöрас гортö воліс да, абу нин колöма лечитны, мед гортö кольччис».
Ме аслам семьяысь фронтöвикъясöс некодöс эг су. Сы вöсна юкся сійöн, мый кывлі да мый бöрыннас нин тöдмалі.
Митипер Миколай (Николай Никифорович Шахов, 1925-1944)
Зэв этша тöда, та понда нöшта на ёнджыка жаль. Кöсйи кöть нин фотосö корсьны, но эз сюр. Важ карточкаяс петкöдлі Митипер Марья облы, но сійö шуис, сы мында во нин пö эг аддзыв да, ог помнит чужöмсö. Сэсся тайö карточкаяссö нулі польчиса Педöр Саньö тьöтлы. Сійö вöлі тылса ветеран. Тöдінныд кö, кутшöм ён да зіль вöлі шонъянöй. Сизимдаснас вöлі ытшкö сідзи, кызь арöсаыс эз вермы суöдны! Видзöдліс карточкаястö да шуö, ме пö Миколайтö помнита, но фотояс вылас сійö абу.
Кулöмдінса райвоенкоматсянь тшöктöмаöсь локны 1943 вося январь медводдза лунö. Митипер Миколайöс война вылö босьтöмаöсь Гöрд Затонса ремесленнöй училище помалöм бöрын. Педöр Саньö тьöт висьталіс, война вылö колльöдігöн пö зэв нин вöсньыдик да дзоляник вöлі. Кос гöгöрыс пö гартыштісны ки чышкöд, бабаяс ёна лыддьöдлöмöн бöрдісны, том йöз гудöкасисны.
Гортас Миколайсянь дзик öти письмö и волöма. Гижлöма, армияын пö нюжалі да ёнми.
Служитöма 1193-öд стрелкöвöй полк бердын 360-öд стрелкöвöй Невельскöй Краснознамённöй дивизияын (360 СД). 1944 вося февраль 3 лунсянь 360-öд дивизияыс пырöдчöма Витебскса наступательнöй операцияö (03.02-13.03.1944). Усьöма Миколай дядь буретш тайö тыш-косяс февраль 4 лунö.
Наградаяс абуöсь. Дивизия, кöні служитöма Миколай дядь, пырöма Калининскöй фронтö. А война дырйи наградаяссö сеталöмаöсь абу öткодя: Калининскöй фронт наградаясöн абу лышкыдасьлöма.
Паметь небöгын вöлі пасйöд, мый дзебöмаöсь Николай Шаховöс Белоруссияын Витебск бердса Волково грездын.
Война кадö и сы бöрын похоронка сетöма позянлун гижöдны пенсия мамъяслы да гöтыръяслы, кодъяслöн пиыс либö верöсыс усисны фронт вылын. Менам Тима Анна пöчлы похоронка кузя тшöтш жö воöма пенсия дорö содтöд сьöм. Шулывлö вöлöм, Миколай пö менö вердö.
2015 воын «Томлун» сьылан котырлы, кытчö ме сэки ветлöдлі, шуисны петкöдчыны Белоруссияын концертöн. Ме сэки тöді нин, мый Миколай дядьöс сэтöн дзебöма. Пöчö вöлöм шуö, Вась пö гортын куліс да, гусö кöть тöда, а Миколайлы йöз муын и лоö куйлыны. Ме эськö и пöрысь пöчöс ловйöн эг аддзыв, но, мися, дась ветлöмöн колö видлыны Миколай дядьлысь гусö.
Тöлысьöн водз заводиті корсьны тайö сиктсö. А сійöс война дырйи кушöдз бырöдöмаöсь, карта вылын некöн абу. Гижи Россияса да Белоруссияса оборона министерствоясö. И мунтöдз душ-мöд лун водзджык Белоруссиясянь воис письмö, мый Николай Никифорович Шаховöс выльысь дзебöмаöсь Витебск районса Старое Село грездын.
Муöдз копыр Рыбинскысь поискöвик-ёрт Александр Владимирович Савельевлы Брест карса туялысь Павел Пашкевичöс медалöмысь, коді вочааліс менö Витебскын да лунтыр новлöдліс тöдтöминöд.
Электричкаöн Витебсксянь Старое Селоöдз Пашакöд воöдчим часöн-джынйöн. Дзоляник сиктад эз вöв сьöкыд аддзыны братскöй гутö. И сэтшöм жö нин мен вöлі нимкодь, мый ачым аддзи плитасö, кöні гижöма Миколай дядьлысь ним-вичсö. Эжва йылын шуöны, рöдительяслы пö тшöтш колö, мед найöс видласны. Нуышті мутор, öзтывлі сись. Нулі фото, кöні Митипер Валерьян ыджыд бать, Митипер Тамара пöрысь вежань да Митипер Марья об. Петкöдлі ловъя мортлы моз. Дерт, найö эськö мöдаръюгыдсянь меысь унджык аддзöны и тöдöны да. Ог тöд мыйла, синваöй сідзи и тюрис. Ме и тöднысö эг тöд, весиг фотосö эг аддзыв Миколай дядьлысь. Но абу öд бокöвöй морт сылы. Дас öкмыс арöсöн пöгибнитöмаыд, дерт, семья ни нинöм эз удит лöсьöдны, кодлыкö öд колö видлыны да казьтыштны.
Татшöм артмис менам Митипер Миколай дядькöд тöдмасьöм.
Семен Иёнин
(Иона Семёнович Мартюшев, 1907-1944)
Тайö менам пöрысь ыджыд бать. Олöмаöсь пöрысь ыджыд мамкöд Эжва йывса Малеын. Война вылö мунтöдзыс уджалöма колхозын. Демит Öдя гöтырыскöд чужтöмаöсь нёль челядь. Кык ыджыдджык кагаыс кулöмаöсь. Кольöмаöсь менам Иёнин Лия ыджыд мам да Иёнин Евлогöй чожöй.
Иона Семёнович Мартюшевöс призывайтöмаöсь 1942 вося август нёльöд лунö. Служитöма рядöвöйöн 22-öд отдельнöй стрелкöвöй бригадаын (22 ОСБр).
Тайö бригадаыс пырöма шудтöмсьыс-шудтöм Волхов фронтса 2-öд ударнöй армияö. На водзын вöлі пуктöма зэв кывкутана мог – мездыны Новгород, Любань, Луга каръяс да, дерт жö, Ленинград. Но öружие, боеприпас, сёян-юан, самолёт-танк, весиг связь нюжöдны телепон провод тырмытöм вöсна 2-öд армия веськалöма налькйö.
Öтуввезйын «Память народа» сайтысь аддзи гижöд, мый ыджыд батьöс – Мартюшев Иона Семёновичöс – гижлöмаöсь нин вошöмаяс лыдö: «Пропал без вести 10.09.1942-20.09.1942 г. Ленинградская обл., Мгинский р-н, Синявинский сÖс, р.п. Синявино». Ыджыд бать сьöкыда ранитчылöма, артмö, Синявино бердса тыш-косьын. Госпитальсяньыс сійöс мöдöдлöмаöсь бурдöдчыны гортас.
Демит Öдя пöрысь ыджыд мам сувтöдöма сійöс кок йылас турунъясöн да гортса улльöлöн. Мыйöн нöшта сиктын позис бурдöдны?!
Выльысь мунöма фронт вылö. Веськалöма 229-öд стрелкöвöй дивизияö (229 СД), бара жö Волховскöй фронтö. Рöкыс, тыдалö, Семен Иёнинлöн сэтшöм вöлöма – пöгибнитны Ленинград мездігöн. Пöрысь ыджыд бать усьöма 1944 вося февраль 12 лунö. Дзебöмаöсь Ленинград обласьтса Заречье грездын, сёрöнджык вуджöдöмаöсь «Новая Малукса» братскöй гуö.
Пöрысь ыджыд мам кольöма дöваöн 34 арöсöн, но верöс сайö абу и петавлöма. Думсьыс пыр виччысис ассьыс Иёнинсö. Сылысь вöлі юасьöны, локтас кö Иёниныд да шуас, мöд бабакöд пö олі, прöстит, Öдя, да примит бöр, примитан он? Примита пö, дерт, мед сöмын локтас…
Кöсйи эськö пöрысь ыджыд бать гу вылö 2016 воын ветлыны. Миколай дядь да пöрысь ыджыд бать кузя письмöсö тшöтш Россияса оборона министерствоö гижлі. Вочакывъяс юöртісны, мый выльысь мöдлаö дзебöмаöсь. Но артмис сöмын таво.
Петыр карсянь неылын мича пожöма ягын куйлö Иона Семёнович Мартюшев. Эз аддзывлы сійö внукъяссö, но кöть челядьсö тöдліс. Менам Иёнин Лия ыджыд мам чужöма 1941 воын, сы вöсна батьсö эз помнит. Но Эжва йывса ылі Пожöгдін грездын Победа лунö Семен Иёнинлöн внукъясыс, правнукъясыс да праправнукъясыс нин нуöны сылысь да Демит Öдя гöтырыслысь фотосö «Кувлытöм полкын».
Митипер Вась
(Василий Никифорович Шахов, 1923-1947)
Вась дядь миян семьяын легенда: Пожöг кустын ветеранъяс пöвстын сыысь кындзи некодлöн эз вöв кык Слава орден.
Сюсь жö и морт вöлöма. И уджын сюсь, и бурлакалігас. Ачыс, буракö, олöм помсö тэрмöдлöма. Зэв сибыд вöлöма. Тима Анна пöчöс вöлöм ыдждöдлö мамукöн, дзоляджык чойяссö – Томукöн да Машукöн, а меддзоля воксö Валюкöн. Ставнысö, вöлöмкö, мунігас и локтігас век дзигöдлö да окыштлö. Дерт, öні тайöн некодöс он чуймöд, но сё во сайын кутчысьлöм да окасьöм мода эз вöв. Пиля Митипер пöльö вöлöм оз мича синмöн видзöд татшöмтор вылас. Да и Томук (Митипер Тамара пöрысь вежань) эз жö лэптывлы.
Но татшöм сибыд зонтö нö кыдзи он радейт? Тамара вежань вöлі висьтавлö: «Миян Васьлöн Пузласянь карöдз быд сиктын мусук вöлі. Мудзсö вöлі оз тöд. Помöсдінса МТС-ын трактористалігас удж бöрас вöлі подöн локтас, Польесö кытшовтас и Кекурöдз лэччылас, а войнас подöн бöр кайö удж вылö».
Рытйысигöн гудöк кисьыс абу лэдзлöма. Радейтöма йöктыны, медъёна польчиса Горди Еленакöд да Вась Öдякöд. Ачыс шулöма, тайö кык нылыс пö бобувъяс кодьöсь. Йöктіганыс муас кокыс оз инмывлы.