Улыс Чов посёлокын судзсьытӧма олысьяслы да ыджыд арлыда вермытӧм войтырлы #МыВместе акцияӧ пырӧдчысьяс дон босьттӧг вайисны помидор-ӧгуреч, шыдӧс-макарон, печенньӧ-кампет, чай да кослунъя вый.
Посёлокын кӧкъямыс олысьлы сёян-юансӧ вичмӧдіс «Ольга» лавка.
–Дерт, йӧзыслы отсавны колӧ. И меным нимкодь, мый волонтёръяс да доброволечьяс нуисны вӧлӧгасӧ гортӧдзыс налы, кодъяслы татшӧм отсӧгыс медъёна колӧ, – висьталіс лавкасӧ кутысь Ольга Коробицына.
Олӧма йӧз аттьӧалісны «Молодёжка ОНФ» да йӧзӧс социальнӧя могмӧдан «Югыд лун» шӧринын зільысьясӧс сёян-юан вайӧмысь, а Анна Юркина содтіс на, ме пӧ и ачым уна во сайын вӧлі волонтёрӧн да тшӧтш отсаси ветеранъяслы.
Водзтіджык волонтёръяс разӧдӧмаӧсь нин вӧлӧгасӧ Сыктывкарын сё олысьлы, а сідзжӧ Гӧрт Затонса, Вылыс Максаковкаса, Сьӧдкыркӧтшса да Выльтыдорса кызь мортлы.
#МыВместе акцияӧ пырӧдчысьяс сетӧмаӧсь «Сытый гражданин» уджтас збыльмӧдысьяслы, кодъяс отсасьӧны оланінтӧм йӧзлы, сюрс кепысь, нёльсё маска да кыксё доз антисептик.
–Миян волонтёръяс зільӧны-водзмӧстчӧны республика пасьталаын, – висьталіс #МыВместе акцияӧ пырӧдчысь, «Молодёжка ОНФ» котырысь Кирилл Обрезков. – Ӧтуввезйын мывместе2020.рф сайт отсӧгӧн Комиысь 400 морт нин босьтіс сертификат да лоис волонтёрӧн.
Акцияыс мунӧ страна пасьталаын. Быдӧн, коді кӧсйӧ отсавны пикӧ воӧмаяслы, вермас звӧнитны 8-800-200-34-11 телефон пыр либӧ пасйысьны мывместе2020.рф сайтын да пырӧдчыны тайӧ акцияас.