Тавосянь республикаын семьялы, кӧні чужис медводдза кага, шуӧма сетны регионса 150 сюрс шайта капитал (РСК). Кыдз пасйисны удж, занятосьт да йӧзӧс социальнӧя доръян министерствоын, тайӧ кокньӧдсӧ вичмӧдӧны «Демография» национальнӧй уджтаслӧн «Кага чужтігӧн семьялы сьӧма отсӧг» регионса проект серти кыдз уна челядя, сідз и ӧти дзолюка гозъялы.
150 сюрс шайтсӧ позьӧ видзны медшӧр тӧжд-мог вылӧ. Шуам, банк пыр вештысьны патера вылӧ кредитысь либӧ ипотекаысь. Том семьялы тайӧ зэв тӧдчана отсӧг.
Регионса семейнӧй капиталсӧ позьӧ видзны и кагаӧс велӧдӧм, бурдӧдчӧм, патераын капитальнӧй да мукӧд сикас ремонт вӧчӧм вылӧ. Вонас ӧтчыд позьӧ босьтны оланпасӧн урчитӧм рӧскод вылас 25 сюрс шайт.
–Сертификатсӧ босьтіс нин Комиын олысь матӧ 300 ань. Бӧръя тӧлысьнас та могысь шыӧдчысьыс чиніс. Тайӧ и гӧгӧрвоана, коронавирусысь видзчысьӧм могысь том мамъяслы бурджык пукавны гортаныс. Но РСК-сӧ позьӧ босьтны и керка-патераысь петавтӧг. Тырмымӧн пошта пыр ыстыны став колана документсӧ йӧзӧс социальнӧя доръян кар-районса шӧринӧ. Позьӧ и нӧрӧвитлыны, кор лёк висьӧмсӧ бырӧдасны. Сэки медводдза кагаысь регионса капитал босьтӧм могысь бать-мамлы аслыныс позяс шыӧдчывны кар-районса социальнӧй шӧринӧ либӧ «Мои документы» МФЦ-ӧ, – юӧртісны Комиын удж, занятосьт да йӧзӧс социальнӧя доръян министерствоын.