Комиын кöсйöны автоматизируйтны удж вылö ветлысьяслы торъя пропуск сеталöмсö.
Медводз тайöс вöчасны кутшöмкö ыджыд предприятиеын, казяласны кö нелючкияс — бырöдасны найöс да сöмын та бöрын тшöктасны тадз жö вöчны быд кар-районын.
Та могысь дасьтöма нин «Пропускная система» тэчас, кытчö пасйöма сiдз шусяна самоизоляция режим дырйи уджалысь предприятие-организацияяс. Тшöтш и сэнi зiльысь войтыр йылысь юöр чукöртöма.
Быд предприятиелысь шыöдчöмсö медвойдöр видлаласны кар-районса, а сэсся республикаса юралысьлöн администрацияясын да пропуск сетöм йылысь индöдсö пыртасны онлайн-тэчасас.
—Полицияын уджалысь улича вылын вермас сувтöдны мортöс да сылысь ним-вич-овсö, паспортсьыс бöръя нёль лыдпассö «Пропускная система» тэчасö пыртöм бöрын видзöдлыны, позьö-ö вöлi сылы петны ывлаö. Мортыслы кö тшöктöмаöсь карантинын пукавны, тайö тшöтш пыр жö тыдовтчас, — висьталiс республикаса юралысьлöн администрацияысь электроннöя сöвман, связь да реклама управлениеöн веськöдлысь Кристина Майнина.
* * *
Коронавируса вуджан висьöм туялöм могысь анализсö Комиысь Новосибирскö ыстывны оз нин ков.
Та йылысь апрель 14 лунö регионын олысьяс дорö шыöдчигас висьталiс республикаса юралысьлысь удж вöчысь Владимир Уйба.
—Öнi оз нин ковмы куим-нёль лун виччысьны Новосибирскса «Вектор» лабораторияысь вочакывсö, — пасйис сiйö. — Ми быд лун кутам стöча тöдны висьысь лыдсö.