Апрель 3 лунӧ Комиын пасйӧма COVІD-19 коронавирусысь медводдза кувсьысьясӧс. Вирус орӧдӧма олӧмсӧ кык аньлысь (чужлӧмаӧсь 1958 да 1948 воясын), пасйӧмаӧсь тайӧ шог лоӧмторсӧ Сыктывкарын да Княжпогост районын.
Апрель 2 лунӧ Эжваса больничаын эрдӧдісны коронавирус инфекцияӧн нӧшта 2 висьысьӧс. Тӧдчӧдам, мый кык вежонся карантин улӧ веськалісны больничалӧн кыкнан корпусыс.
Нёрпалысьяс бӧрся видзӧдӧны медикъяс. А вирусӧн висьысьяскӧд водзынджык сёрнитлӧм-аддзысьлӧм йӧзӧс вирусӧн висьысьяскӧд корсьӧны да туялӧны вирнысӧ лабораторияын.
«Став выль висьысьсӧ эрдӧдӧма Эжваса больничаын, найӧс заводитісны нин бурдӧдны, – водзынджык юӧртліс Коми Республикаса йӧзлысь дзоньвидзалун видзӧм кузя министр Дмитрий Березин. – Ми вӧчам ставсӧ, медым висьӧмыс эз паськав водзӧ. Эжваса больничаысь ылӧджык коронавирус оз пет, бурдӧдчанін уджалӧ стрӧг карантин серти. Коронавируслы паныд удж ми нуӧдам Роспотребнадзорлӧн Комиын веськӧдланінкӧд ӧтвылысь».
Роспотребнадзорлӧн Комиын веськӧдланін юӧртіс: апрель 2 лун кежлӧ республикаын пасйӧма COVІD-19 вирусӧн висьысь 56 мортӧс, на пӧвстысь ӧти висьмӧма мӧд муын да воӧма Комиӧ висьысьӧн (сійӧ бурдіс нин), нӧшта 55 мортӧс пасйӧма Эжваса больничаын. Сэтчӧс куйлысьясӧс видзӧны мукӧдысь торйӧн, тырвыйӧ бурдӧдӧны да туялӧны дзоньвидзалунсӧ. Карантин улӧ веськалӧм йӧз сёйӧны ӧтчыдысь вӧдитчан тасьті-паньӧн, став коланаторйыс налӧн эм. Висьысьяслы отсалӧны психологъяс, нуӧдсьӧ гӧгӧрвоӧдана удж.
Содтӧд юӧрӧн позьӧ тӧдмасьны Коми Республикалӧн “Коронавирус. Оперативная информация» порталын . Юалӧмъяс вылӧ вочавидзас чат-бот: https://vk.com/іm?sel=-193074467 (ВКонтактеын) да http://cіt.rkomі.ru/vіber (Vіber-ын).