МВДын уджалысьяс быд лун синйӧны Россияӧ суйӧр сайысь воӧм войтыр бӧрся, кодъяслы индӧма овны гортысь петавтӧг. Россияӧ мӧд канмуысь воысьяслы (торйӧн нин сэтысь, кӧнi ыджыдалӧ вирус) 14 лун чӧж колӧ овны ас кежысь да сюся видзӧдны дзоньвидзалун бӧрся. Тайӧ вӧчӧны сы могысь, мед висьӧм эз паськав.
Та кындзи полицияын зiльысьяс видзӧдӧны, кыдзи уджалӧны быдсикас котыр да вузасянiнъяс, кодъяслысь уджсӧ эз сувтӧдны. Индӧд торкалысьяс йылысь юӧр полиция ыстӧ Роспотребнадзорӧ. Сiдзжӧ республикаса быд олысь вермас юӧртны МВД-лы на йылысь, кодъяс уджалӧны индӧд вылӧ видзӧдтӧг.
Март 31 лунсянь апрель 12 лунӧдз республикаса олысьяслы тшӧктӧны овны гортын. Ывлаӧ позьӧ петны вит помка серти: бурдӧдысьяслӧн тэрыб отсӧгла шыӧдчигӧн, удж вылӧ мунiгӧн (налы, кодлӧн эм та вылӧ лэдзан кабала – пропуск), матысса лавкаын да аптекаын ньӧбасьӧм могысь, гортса пемӧсъяскӧд гуляйтiгӧн (оланiнсянь 100 метрысь мед абу ылын) да ёг петкӧдiгӧн.
МВД корӧ: эн петӧй ывлаӧ тӧдчана помкатӧг. Ывлаын, лавкаын да мукӧд йӧзаинын сулалӧй мӧд мортсянь 1,5 метр ылнаын. Видзӧй асьнытӧ да матыссаястӧ.
Юӧрсӧ сетiс Коми Республикаса МВД-лӧн пресс-служба